蝦仁節瓜炒蛋白

廚房網誌點可以冇蝦仁炒蛋丫，今次想食得健康D，所以加入節瓜，減左蛋黃。

料：冰蝦仔一斤16元。節瓜兩個4元。蛋六隻5元。實際用量：蝦半斤已夠，節瓜半個岩岩好，買果陣唔好意思買太少，買半個節瓜係咪博鬧？

做：

節瓜半個切幼條備用。

蝦剝乾淨去腸，加少少鹽省下佢，啤水十分鐘，瀝乾再用廚房紙索乾水放入雪柜備用。

蛋白六隻打勻。

炒節瓜、炒蝦(先撲粉)。

將料放入蛋白，加半茶匙魚露 (冇魚露可用蒸魚豉油) 撈勻。

改用易潔鑊中火加入蛋料，推炒。

加葱粒。

上碟喇！

掛住影相，蛋白有D變左一塊塊一舊舊，無法啦。。。

 

 

 

菜遠牛肉絲手摷鮑魚麵

料：壽仔鮑魚麵四個。菜心10條(12元斤寧夏菜心)。牛肉一舊20元。指天椒兩隻。 街市賣牛肉哥哥幫我片薄左舊牛肉，方便切絲。

做：

1 牛肉切絲，加入糖、鼓油、胡椒粉、孖蒸酒、欖油醃一小時後入鑊炒熟。

2 菜遠十條炒熟。

3 鮑魚麵四個用滾水灼1-2分鐘搞散過冷河，用筲箕瀝乾水備用。

手摷麵：

用個大盆，將麵、牛肉絲、一包鮑魚麵調料、蠔油、指天椒粒全部放入去。洗乾淨雙手，用十隻手指將所有材料摷勻，至完全均勻入味為止。

準備易潔鑊一隻，將摷好既麵放入去慢火煎至部分麵身微脆。

準備大碟一隻，排上菜遠伴碟，再放上煎好既麵，加少許葱絲椒絲，即成一碟美味既菜遠牛肉絲手摷鮑魚麵！

 

 

海水花蜆湯飯

琴晚屋企食剩兩碗飯，今日本來諗住炒左佢，行到街市見到肥大花蜆，於是乎……

買料：花蜆斤半35元，草菇四兩4元，芫茜一扎2元，絲瓜一條同夜香花一渣12元。

整：

要分三頭行事。第一頭：隔水蒸熱D飯。

第二頭：蒸花蜆15分鐘

蒸完留起d蜆汁，即係海水

，有成350cc

花蜆拆肉備用

第三頭：滾個湯底。草菇、絲瓜切粒滾十分鐘，落埋隔左渣既蜆汁(海水)、夜香花，再滾一陣。

最後落埋花蜆，滾兩滾，倒入準備好熱飯既有蓋大湯盅內，落芫茜，蓋上蓋局一陣。

工夫比較多，不過好好味呀。

白豆角炆脢頭豬肉

料：白豆角一扎8元。脢頭豬肉一舊20元，只需用三分一。

做：

白豆角切度備用。

脢頭豬肉切較厚片或粒，落豉油、糖、孖蒸酒醃一小時。

燒熱鑊，落欖油、薑蓉、蒜片爆香，落白豆角，贊水炒煮至開始腍身。將白豆角推埋一邊，落豬肉炒散。兜勻，搣兩隻指天椒落鑊，落水加蓋炆至豆角腍身，埋薄獻，上碟。

趁熱食咯！

 

 

甜梅菜蒸鯇魚腩+清炒蠔汁菜心

鯇魚腩一舊20元。甜梅菜一棵3.5元，只需用一半。

鯇魚洗淨，用粗鹽省一省，索乾水。梅菜徹底清洗乾淨浸水後切粒，鋪在魚上。

蒸12分鐘爆葱油，落蒸魚豉油。

整多一小碟欖油蠔汁炒菜心六條。

整左大約半粒鐘，開飯咯！

白鑊乾煎鹹雞翼

昌昌雞翼食剩7隻，今次試用白鑊乾煎。

雞翼解凍洗淨，用鹽醃一小時。索乾水。

準備易潔鑊一隻，燒熱，用白鑊將雞翼煎熟，上碟。

韭菜炒蛋

韭菜一小扎2元。蛋四隻，其中三隻只要蛋白。無技可言，去相！

 

酸菜炆豬手

料：
1 惠記豬手一包，22元。
2 街市酸菜兩棵，9元。
3 李記鹵水汁，屋企買落。
4 八角四粒，屋企買落。

煮：
1 豬手出水洗淨去毛去碎骨修剪好
2 酸菜浸鹽水用白鑊烘乾
3 瓦煲一個落少少油落兩片薑爆一爆豬手
4 贊水至大半煲
5 落鹵水汁、八角、落少少糖同少少酒
6 煮滾後中火炆之(唔記得炆左幾耐，大概一個鐘)
7 落酸菜，再炆一陣至收汁。