車仔麵出街食冇咩特別，但係響屋企整就多功夫。
呢一大碗五餸車仔麵，整左我兩日。好彩整出黎效果同街鋪一樣！
材料：
1) 碱水麵一大個(我買左三個10元，只須用一個)。
2) 豬大腸三條27元。
3) 豬皮(乾品，自己浸發，5元，只用一半)。
4) 白蘿蔔一條4元。
5) 韭菜4元。
6) 炸魚蛋一包11.9元。
整料：
1) 咖喱豬皮：豬皮兩塊浸水渣水浸過夜，然後原塊用調味同咖喱粉炆至微腍身。
2) 水煮蘿蔔：一開四用地魚粉同其他味料煮至腍。
3) 滷水大腸：豬腸徹底洗淨，落少量白醋先出水，再用八角、老抽、味料炆至腍。
4) 魚蛋：用蘿蔔水煮。
5) 韭菜：用淥麵水灼至八成熟。
淥麵：
碱水麵放入滾水快速弄散，過冷河瀝乾水放入大碗內，再淋上滾湯(用炆煮豬皮、大腸、蘿蔔既湯汁做湯底。)
剪料：
最好玩係呢個步驟，出動肥哉廚房鎮房之寶，牛雜大較剪，將豬皮、豬腸、蘿蔔剪落大碗內。嘩嘩嘩，一大碗五寶車仔麵做好喇！拿碗來！食喇！！
花膠食開唔好停，今日又食六隻，用黎煲雞湯。
材料：花膠適量，雞半隻，脢頭瘦肉一塊，瑤柱適量，淮山杞子圓肉適量，冬菇適量。
工具：樂聲牌電子瓦撐(煲)，紅福壽湯鍋(上枱)
做法：花膠發好洗淨切好備用。淮山杞子圓肉冬菇浸洗乾淨備用。瘦肉、雞出水洗淨備用。
電子瓦撐注入十二碗清水，放晒所有材料入去，開高火後轉自動火煲六個鐘，調味即成。
用電子瓦撐煲好方便，唔駛睇火，又可以做出同燉湯差唔多既效果。個湯好清，好正！
呢碟送既特色係大細荳芽一齊炒，再加埋韭菜花同肉絲，好爽口，好好味。
大荳芽一斤，細荳芽半斤，韭菜花一札，脢頭瘦肉少量，陳年辣椒乾四隻。大荳芽用白鑊烘乾烘至微焦香兜起。
爆炒肉絲，落韭菜花炒勻兜起。
炒細荳芽，然後將大荳芽回鑊炒勻。
再將韭菜花肉絲回鑊，落乾辣椒絲，調味，炒至收汁，埋個薄獻上碟。
呢個份量可以炒出一大碟，除左送飯，仲有剩可以送麵！
嘩而家花膠貴左好多，以前買一盒大大隻六百幾元，而家升到千幾元。
發左六隻，再買八隻新鮮鳳爪，八隻冬茹，就炆左呢煲野。
當然要阿Joel出黎幫手。先用鑊炆好冬菇雞腳，炆到差唔多夠腍，然後連汁倒入煲，此時加入切好既花膠，用慢火慢慢炆至花膠腍度適中。
花膠雞腳，夠晒補膠，食完「漏」到而家。
我好鍾意炒冷飯架，食剩飯多數會用黎煲粥，唔係就炒飯。
今次炒碟生炒牛肉飯。買左十元一包新鮮免治牛肉。本來諗住落生菜絲，去到街市轉左買中芹。
又落少少陳皮絲，多多薑粒，再加埋適量乾蔥頭同青蔥。
飯底係蛋炒飯，落左一隻雞蛋。整出黎就係一碟「五味生炒牛肉飯」。
呢排忙到嘔電，睇怕要忙到復活節之後先會得閒少少。所以冇時間煮野食喇。
黎人呀！沙煲罌撐個個排好隊，同我逐個上場頂住檔先！
打頭陣既係呢個日本南部鐵茶壺，寬扁平圓底，無論用明火或者電爐都適合架。
煲水沖茶，水質聽講正好多，仲可補充身體鐵質咁話。
呢個叫「平丸正形櫻」，矮扁平圓底，全身灑滿櫻花瓣圖案，幾有型架！
黎多幾張特寫：
煲完水個底滾熱辣，又平又大，可以做燙斗！
上次買罌廣西三蒸酒，話諗起兩樣野，另一樣而家開估。其實主要係俾佢個樽吸引！佢令我諗起細個時屋企一款家品，就係冷水瓶。冷水瓶以前屋企撞崩坎裂淥爆過好多個，老媽子一個都冇留低。
童年時印象中既冷水瓶，全個用玻璃造，係個長嘴大肚罌，瓶身刻有暗花，「瓶蓋」其實係一隻高身玻璃水杯，都雕有暗花，覆蓋套住個瓶嘴。要斟水，就拎起個杯形「瓶蓋」，可以就咁當水杯用。
果時人既設計都幾聰明架，而家呢款冷水瓶我搵唔到了。
果個三蒸酒瓶，我一睇見就俾佢吸引，真係醉翁之意不在酒！佢個嘴唔係「羅絲」嘴，更加似個冷水瓶。
再加番隻玻璃杯做蓋，真係fit晒。
唯一不足之處係，個酒瓶造得好粗糙，玻璃唔夠平滑。冇法啦，因為佢預左你飲完酒就掉！
上個月浸左一樽士多啤梨酒，而家就係咁樣。
今日將酒過濾，取出酒渣就係咁樣。
酒味都算OK，不過雙蒸都幾「辣」，果味同甜味都不足。
於是再買盒美國長柄士多啤梨，再加多冰糖，兩片檸檬。
加料再浸佢一個月睇下點。
買左斤半大花蜆40元，用黎炆髮菜，就係呢味發財大顯喇！
大蜆浸佢兩個鐘噴水吐沙，再蒸熟取肉，留起蜆汁，共有兩碗。
髮菜浸洗乾淨，再渣乾水，燒熱鑊落油，爆香薑片，落髮菜，再落蜆水慢火炆至軟身撈起。
再用蒜頭薑片爆香蜆肉，將髮菜回鑊再炆至收汁，埋獻即成。髮菜索晒蜆汁，超好味！
