韭菜鮮蝦粉果

又學人整下粉果先，以下呢碟三隻係第一籠，皮較厚，蒸左七分鐘。

以下呢碟三隻係第三籠，皮較薄，蒸左九分鐘左右。

第一次試整，麻麻地，不過都幾好味架。

餡料：

1 雪蝦一斤32元。(用四分一已夠)。

2 竹筍適量。(要買成罐)

3 沙葛適量。(都要買一個7元)

4 韭菜一扎2元。

5 芫茜一扎2元。

皮料：

1 澄麵7份。

2 生粉1份。

3 粟粉1份。

做法：

炒餡料

1 蝦剝淨去腸，用鹽、生粉醃一陣，然後清洗乾淨，吸乾水再切粒備用。

2 竹筍、沙葛、韭菜、芫茜全部切粒備用。

3 落少少油同少少肥豬肉起鑊，爆炒竹筍、沙葛，炒至乾身。

4 落蝦粒，打獻(鹽、糖、生粉、雞粉)，將材料略炒勻。

5 落韭菜粒，熄火，炒勻兜起。

6 攤凍後，包之前，撈入芫茜粒。完成餡料。

做皮

1 澄麵350克，生粉50克，粟粉50克放入大盆內。

2 燒開450克水(水同粉比例係1比1)，趁水大滾分幾次沖入粉中，一邊沖一邊攪。

3 趁熱用手將粉搓勻成粉糰，再逐次取出，搓成長條，切成一粒粒。

包餡

1 將粉粒掐成圓片，放入餡料，收邊。

蒸

1 蒸片搽油，放入粉果，再在粉果上搽少許油。

2 加蓋蒸7分鐘即成。

上圖係第一籠，皮唔夠透明，不過餡剛熟，韭菜同芫茜都翠綠，蝦都爽口。

我第二籠蒸左十幾分鐘，皮透明好多，不過D餡已過熟，韭菜同芫茜已變黃，蝦又鞋口。第三籠我整薄D個皮，蒸左九分鐘左右，賣相似乎好D。

以下呢籠係第三籠，皮較薄，蒸左九分鐘左右，較透明，韭菜芫茜雖仍能保持青綠，但蝦已略老。結論係：皮要薄，蒸七分鐘即可。

以上餡料、皮料份量，可以做好多隻粉果，我只係用左三分一左右，已經整左18隻，如果全部整晒，應可以整四十隻以上。