三味香菜炒蛋

香菜三種：韭黃、芫茜、蔥。

蛋：三隻。

調味：雞粉、鹽、魚露。

呢個炒蛋風味獨特，如果鍾意食香菜，一定要試下。今次專揀三種最易熟既香菜黎炒蛋，快、靚、正！

做法：

1 韭黃、芫茜、蔥徹底清洗乾淨，剪成短度，瀝乾水備用。

2 蛋三隻，落少少雞粉、鹽、魚露，打勻。

3 將香菜直接倒入蛋液中，撈勻。

4 燒熱鑊，搪勻油，燒至出煙，校中火倒入蛋液快炒。

5 邊炒邊校火力，炒至蛋液剛好凝固，即可上碟。

呢碟蛋要趁熱享用，放得耐香菜會出水(所以最好先瀝乾水)就影響食味。