638一罐車輪鮑

嘩真係通脹得好厲害。今晚同阿媽想話買罐車輪鮑做冬，阿媽以為五百元有找，點知大昌賣608元，咩唔係四百幾咩？走去華潤堂，638一罐。唔食喇，四百幾元罐都覺得好奢侈，六百幾元真係頂佢唔順。唯有睇番以前D相，呢度罐罐都俾我食左架。。。。。。

 

 

25元一個茶餐廳早餐

係咪最低工資立法既後遺症呀，定係茶餐廳年尾借勢呀？D平民早餐加下加下加到25元，一碗雞扒腸仔火腿湯米+一杯奶茶，入到去坐低左先知，本來諗過想起身走人以示抗議，不過諗落都係多餘，佢老闆都唔響度，班侍應都係打份工姐，卒之都食埋呢次。

仲有就係連暖水一杯都慳埋，仲美其名話節省用水，埋單仲多謝都冇聲。

以後都唔再黎食勒，食埋晒呢D高脂餐，仲要俾成25元。佢令我的起心肝唔再食…………一於自己整。

聽日自已淥碗出前一丁都係三個幾，後日食乜？摷番櫃入面罐老人牌燕麥片出黎。。。

 

 

鑄鐵煲：上海街Vs美國 Cast Iron Pots: Shanghai Street Vs U.S.

美國個煲係上海街個煲10倍價錢。

鑄鐵鍋雞扒菜飯 Fried Chicken Vegetable Rice in Cast Iron Pot

用鑄鐵鍋煮飯快靚正，又唔黐底，如果鍾意食飯焦，可以成底刮出黎淘湯食。

買左個Lodge Cast Iron Serving Pot 鑄鐵煲仔，煮過幾次煲仔飯，今次搞搞新意思，整個煲仔菜飯，事但加塊雞扒，睇下效果如何。

用左絲苗米一嘜，白菜仔適量，雞扒一塊，薑幾片。

將白菜仔切粒用少少油炒一兩分鐘兜起備用

醃透雞扒(生抽、糖、鹽、紹酒、少少生粉)，用個鐵煲仔煎焗至八成熟，Lodge鑄鐵鍋既好處係「鎖水煲濕」，全賴佢個蓋夠重，再加上蓋內既一排排乳頭狀滴水設計，鎖水真係好掂。

將雞扒切件備用。倒去煲內多餘雞油，加米加水，一嘜米加一碗水可以煮出有咬勁蝦仔飯，不過阿媽鍾意食腍D，今次落多D水。

用中火燒5-6分鐘，開蓋，加入白菜仔，撈勻，再在飯面鋪上雞件，加D薑絲，再加蓋，改用慢火燒5-6分鐘。

熄火，原煲焗10分鐘，開蓋，可落少少煲仔飯豉油撈勻，莊飯喇喂！

試下玩下都OK，不過我都係鍾意食煲仔臘味飯多D。

同場加映鑄鐵鍋臘腸飯，一嘜米加一碗水，中火燒5分鐘，開蓋，加臘腸(如下圖)

再加蓋慢火燒5分鐘，焗10分鐘即成。

 

 

 

窩蛋番茄肥牛 Fresh Egg in Fried Fat Beef on Tomato Paste

新鮮蛋白四流，令肥牛更滑。

響惠記買左包美國肥牛，再買多三個番茄同一個洋蔥，雪櫃仲有一隻走地雞蛋，呢四樣加埋就整左呢碟野喇。

我首先切碎半個洋蔥，再切碎三個番茄。落油用薑片起鑊，將洋蔥同番茄爆炒，落兩片Bay leaf，落鹽、糖、生抽、雞粉、水，將佢洋蔥同番茄煮溶煮杰身，再落油、埋獻試味，兜起放入大碟底。

再大火燒紅鑊，落油爆炒肥牛(已預先用蠔油、油、生粉、糖、生抽醃一小時以上)，炒至剛熟收汁，立即兜起放在洋蔥番茄葺上。

最後在肥牛中心開一個窩仔，傾入新鮮雞蛋一隻。

喂，趁熱開飯啦！

 

電子瓦罉金銀菜陳腎豬展湯 Slow Cooker Double Vegetables Duck Kidney Pork Soup

整左八個鐘。個罉蓋都幾存汽下喎。

買左個電子瓦罉，以前細個時屋企有個依瑪牌，係橙色外殼啡色內膽既，阿媽成日用黎燉湯炆牛腩，而家依瑪牌變晒樣，改買樂聲牌，不過係馬來西亞造既。

用金銀菜陳腎豬展湯黎開罉，凍水落晒料↓

燉左四個鐘之後係咁樣↓

D菜乾未諗，陳腎直情咬唔入，倒番入去再燉，燉到天黑燉左超過八個鐘。

飲落有D似正式果D燉湯，同明火煲既老火湯效果完全唔同。

 

苦瓜脆柿片炒牛肉 Stir Fried Beef with Bitter Melon and Persimmon Slice

而家柿子當造，又平又靚又新鮮。十元買左四個甜脆柿，搞搞新意思，黎個甜苦炒牛肉先。

脆柿一個切片備用。苦瓜一個切片，用鹽醃至出汁，渣乾水，沖幾次水，再渣乾備用。

牛肉加少少水，醃好備用。

用薑片起鑊，爆炒苦瓜，落鹽、糖調味。此時應兜起苦瓜，再起油鑊大火爆炒牛肉，不過我臨時偷懶，就咁就倒牛肉落鑊，再爆炒。

炒至牛肉九成熟，放埋柿片，兜亂，埋獻上碟。

苦瓜牛肉冇乜特別，最特別係柿片炒牛肉，此送又苦又甜，一齊食都幾好玩個喎。起碼送到兩碗飯啦。

 

鯰魚柳燕麥粥+清炒絲瓜 Catfish Oatmeal + Stir Fried Silk Melon

急凍鯰魚柳一包，去雪水，索乾水，加少少胡椒粉、鹽醃至入味，再切大粒。

煲好一煲燕麥粥，放入鯰魚粒，再煲滾，落少少薑絲，調味即成。

另加一碟清炒絲瓜。

呢餐用黎清清腸胃都唔錯啦。

 

冬菇拼雙蔬 Mushroom with Double Vegetables

冬菇。菜心。通菜。三種各適量。

蠔油炆冬菇。

薑片起鑊清炒菜心，蒜片起鑊清炒通菜。

三樣排好上碟即成，可以再打個蠔油獻，不過我想食清D，冇打獻。

 

80年代樂聲牌電飯煲 Vintage 80's National Electric Rice Cooker

梗係樂聲牌啦。

呢個古董飯煲仔而家仲可以煲到飯架。仲好快添架。

支竹豆腐蘿蔔火腩煲 Bean Curd Stick, Bean Cure, Turnip and BBQ Pork Stew

琴日斬料斬左兩條骨燒肉，要成96元，食燒肉好貴。

食剩左今日用黎炆支竹豆腐，我仲落埋蘿蔔同中芹，一於整一大煲。

先煎好豆腐，再煮蘿蔔，煮到咁上下放埋支竹入去炆。

再爆燒肉，加埋蘿蔔支竹，加水炆。

調味校個獻，略收水，將所有野轉落瓦煲。

加中芹，加蓋炆至收汁趁熱食。

 

絲瓜蜆肉湯 Silk Melon Clam Meat Soup

蜆一斤。絲瓜一個。


將蜆浸洗乾淨，然後放深碟上先蒸熟取肉，保留碟內的蜆汁。


將蜆汁過濾入煲，加水，落兩片薑，煮滾。
絲瓜刨皮，切滾度，放入已煲滾既蜆水內，落少少油。


絲瓜滾後，落蜆肉，再滾起，調味即成。