整左八個鐘。個罉蓋都幾存汽下喎。
買左個電子瓦罉，以前細個時屋企有個依瑪牌，係橙色外殼啡色內膽既，阿媽成日用黎燉湯炆牛腩，而家依瑪牌變晒樣，改買樂聲牌，不過係馬來西亞造既。
用金銀菜陳腎豬展湯黎開罉，凍水落晒料↓
燉左四個鐘之後係咁樣↓
D菜乾未諗，陳腎直情咬唔入，倒番入去再燉，燉到天黑燉左超過八個鐘。
飲落有D似正式果D燉湯，同明火煲既老火湯效果完全唔同。
2010年11月27日 星期六
苦瓜脆柿片炒牛肉 Stir Fried Beef with Bitter Melon and Persimmon Slice
而家柿子當造，又平又靚又新鮮。十元買左四個甜脆柿，搞搞新意思，黎個甜苦炒牛肉先。
脆柿一個切片備用。苦瓜一個切片，用鹽醃至出汁，渣乾水，沖幾次水，再渣乾備用。
牛肉加少少水，醃好備用。
用薑片起鑊，爆炒苦瓜，落鹽、糖調味。此時應兜起苦瓜，再起油鑊大火爆炒牛肉，不過我臨時偷懶，就咁就倒牛肉落鑊，再爆炒。
炒至牛肉九成熟，放埋柿片，兜亂，埋獻上碟。
苦瓜牛肉冇乜特別，最特別係柿片炒牛肉，此送又苦又甜，一齊食都幾好玩個喎。起碼送到兩碗飯啦。
2010年11月22日 星期一
鯰魚柳燕麥粥+清炒絲瓜 Catfish Oatmeal + Stir Fried Silk Melon
急凍鯰魚柳一包，去雪水，索乾水，加少少胡椒粉、鹽醃至入味，再切大粒。
煲好一煲燕麥粥，放入鯰魚粒，再煲滾，落少少薑絲，調味即成。
另加一碟清炒絲瓜。
呢餐用黎清清腸胃都唔錯啦。
冬菇拼雙蔬 Mushroom with Double Vegetables
冬菇。菜心。通菜。三種各適量。
蠔油炆冬菇。
薑片起鑊清炒菜心，蒜片起鑊清炒通菜。
三樣排好上碟即成，可以再打個蠔油獻，不過我想食清D，冇打獻。
2010年11月21日 星期日
支竹豆腐蘿蔔火腩煲 Bean Curd Stick, Bean Cure, Turnip and BBQ Pork Stew
琴日斬料斬左兩條骨燒肉，要成96元，食燒肉好貴。
食剩左今日用黎炆支竹豆腐，我仲落埋蘿蔔同中芹，一於整一大煲。
先煎好豆腐，再煮蘿蔔，煮到咁上下放埋支竹入去炆。
再爆燒肉，加埋蘿蔔支竹，加水炆。
調味校個獻，略收水，將所有野轉落瓦煲。
加中芹，加蓋炆至收汁趁熱食。
2010年11月14日 星期日
絲瓜蜆肉湯 Silk Melon Clam Meat Soup
蜆一斤。絲瓜一個。
將蜆浸洗乾淨，然後放深碟上先蒸熟取肉，保留碟內的蜆汁。
將蜆汁過濾入煲，加水，落兩片薑，煮滾。
絲瓜刨皮，切滾度，放入已煲滾既蜆水內，落少少油。
絲瓜滾後，落蜆肉，再滾起，調味即成。
酸菜蜆肉蝦仁炒飯 Preserved Vegetable Shrimp and Clam Meat Flied Rice
琴日買左游水蝦，因事唔得閒食，放左人冰格。今日要黎炒飯。
有葉酸菜半棵。蜆肉適量。蝦仁適量。蛋兩隻，冷飯約兩碗。薑米約兩湯匙。蔥適量。
做法：
1 酸菜浸一陣水，切粒，落白鑊烘乾備用。
2 用薑米起鑊，放入酸菜、冷飯，炒至冷飯一粒粒分開，混合酸菜。
3 撥開飯中間，落少少油炒蛋，快手兜勻蛋液同飯粒。
4 再撥開飯中間，又落少少油，炒蜆肉蝦仁至熟，兜勻飯粒。
5 調味，落蔥粒快炒至適度乾身，上碟。
2010年11月7日 星期日
晶彩透明鍋Visions Saucepan
屋企除左個佛山單柄瓦煲，一個寶迪單柄煲仔之外，就爭一個夠大既單柄煲，有時煮麵想單手倒湯入碗都唔得。想買番隻煮麵用單柄煲好耐，一直忍住手。今日心血來潮話買就買，終於買左呢隻康寧單柄透明煲。貪佢夠大又唔太大，又透明，好玩D。
容量2.5公升。保養10年。買左450元，冇折扣都算抵啦。
2010年11月6日 星期六
港式茶餐廳火腿蛋包 Hong Kong Style Bacon and Egg Bun
行過旺角兩利餐廳，見佢D麶包幾飽滿幾靚，買左兩個火腿蛋包，3元個兩個6元。
補記：旺角茶餐廳3元個火腿蛋包，原來超值。屋村街市半邊鋪買5元個，收檔前減價都要4元。紅圈K賣5.5元個，仲要扁達達，冇呢個咁靚。
兩個包仲係暖既，唔知個麵包櫃係咪暖櫃黎呢。
返到屋企，肚仔餓餓，一路搣一路食，好滋味。塊蛋同火腿都幾正。
沖菜免治牛肉燕麥粥 Preserved Vegetable Minced Beef Oatmeal
澳洲免治牛肉一包。沖菜適量。燕麥一碗。
先爆炒免治牛肉，收乾肉汁備用。可以醃肉，又可以唔醃。
沖菜浸洗切細粒。
燕麥一碗，用六至八碗水煲至稠滑。
落牛肉再煲一陣，再落沖菜滾一滾就食得。
簡單容易整過煲粥架！
訂閱：
文章 (Atom)