炒貴刁個名聽左好耐，唔知貴刁係乜，後來先知係「粿條」既音轉。「粿條」即係粉條，好似同廣東河粉差唔多。
於是就試下炒。炒之前仍然沿用肥哉「摷」法，校好晒味，摷勻所有材料先落鑊炒。
材料：
1) 幼河粉一斤 2) 蝦仔半斤 3) 脢頭豬肉四兩 4) 韭菜、韭黃、芫茜適量 5) 芽菜四兩 6) 蛋一隻 7) 指天椒五隻
肥哉版做法：
1) 蝦仔剝好洗好醃好索乾水，先炒至八成熟兜起。
2) 豬肉切絲，調好味，炒熟兜起。
3) 芽菜炒熟兜起瀝乾水。
4) 韭菜過一過鑊略炒兜起瀝乾水。
5) 蛋一隻煎成蛋皮切絲。
6) 指天椒去籽切粗絲。
7) 河粉略剪短，加入靚頭抽、蠔油、魚露、雞粉，撈勻靜置一陣。
8) 將1)至6) 拌入7)中，再加埋韭黃、芫茜，用手摷勻。
9) 燒熱鑊，落適量油，校大火，放入8)，邊炒邊調整火路。
炒呀炒呀炒呀，抛鑊，拋呀拋呀拋呀，炒至香氣四溢鑊氣沁透粉條，收乾身即可上碟。
好好味！！話咁快就成碟掃清喇！
蓮藕除左用黎煲湯，用黎炆都唔錯。今日買左一塊豬骨腩，就用黎炆蓮藕。
加埋冬菇，就可以整到一個「蓮藕冬菇豬腩煲」。
蓮藕今次唔用切，係拍開成碎塊，呢個方法係行政總廚教落既。
有骨(軟骨)腩出水後切大塊。冬菇一開三調味醃好。
燒熱鑊，落油，落一磚南乳，兩片薑爆香。再落豬腩爆炒至微焦香。
落蓮藕、冬菇，炒勻，贊水至蓋過材料，加鑊蓋用中文炆至腩肉腍身。
最後轉入瓦煲仔，落葱段，加蓋再炆至開始收汁滋滋聲。
一餐一次過食唔晒成煲，可以分出一部分上檯，留起另一部分，唔駛響個煲內夾夾下，食唔晒下餐食個感覺就好似食送尾。
買左斤半蜆，本來想連殼炒，不過覺得蜆殼唔容易洗乾淨，因為殼面有好多細坑紋，容易藏污垢，即使擦都唔擦得咁多。於是浸左幾個鐘之後，就決定蒸熟取肉，再用豉椒炒。
加個生菜底，一來啖啖肉，一來又有菜食，肉菜平衡下。又好味。
不過有部份蜆仍有少少沙，食時唔敢大力咬，美味蜆肉有沙，真係美中不足喇。
葫蘆瓜真係奇瓜，形態獨特，若人喜愛。如果我有個天台，我一定會種葫蘆瓜，種D老葫蘆，曬乾用黎莊水。呢個真係由細到大都想既。
街市賣既葫蘆瓜都係嫩瓜，用黎食，整唔到乾瓜莊水，咁點食法好呢？
睇下幾得意，真係唔捨得切開佢。
同屋企人去試美心既客家菜，叫左其中一味係呢煲「古坑炆全豬」，睇個名初時覺得「全豬」喎，點食得晒呀，原來係：
豬腩肉 + 豬肺 + 豬潤 + 豬粉腸 + 豬肚 + 豬手一齊炆，用白蘿蔔墊底。哈，咁又係可以算「全豬」喎，個名幾有意思。
加埋豬耳、豬利、豬心、豬腰就更好更全啦。
我從未食過炆豬肺，食牛雜既牛肺就食得多。味道都唔錯，中意食內臟既應該會幾開心。呢個煲有幾大陣內臟味，唔中意內臟就千祈唔好點呢味。
個刀削麵個包裝袋張相，係一碗好似作醬撈麵既圖，於是又試下整碟撈麵。
我用牛肉做料，加埋芫荽，辣椒，再加D脆菜(例如青瓜粒、菜粒、我今次用左白瓜粒)。
刀削麵先煮熟處理好，牛肉醃好醃至入味，燒熱鑊，落油，落牛肉爆炒，再落辣椒，贊酒，埋獻炒至牛肉剛熟。轉極細火，落芫荽、白瓜粒、刀削麵，撈勻即可上碟。
牛肉醃料：豉油、蠔油、水、糖、食用梳打粉、雞粉。
聽講木瓜有分公 [也母]，少核既係公，多核既係 [也母]。
咁究竟長身既係公，肥身既係 [也母]，定係長身既係 [也母]，肥身既係公？
感覺上長身應係公，肥身係 [也母]。不過網上又有文章話長身係 [也母]喎。
睇下我呢個長身木瓜，八蚊雞，好少核喎，咁佢係公定 [也母]？
我煲過幾次木瓜湯，多數都會買肥身多核既木瓜。
今日煲木瓜湯，街市唔知點解檔檔都得番呢類長身木瓜。
呢個煲出黎唔夠以前D甜，熟多少少好D。
Chumama 快D黎鑑證下！
