咖哩豬柳飯 Curry Pork With Rice

要食咖哩豬柳飯，除左要煲飯，當然就係要煮一大兜咖哩豬柳啦。


唔鍾意豬柳，可以整牛柳、牛腩，不過咖哩牛食得太多，所以想試下豬柳。

材料：咖哩粉兩包，今次用左冠益華記小包咖哩粉。洋蔥一個。番茄一個。豬柳一條。椎果適量(可以唔落)。香葉兩片。


肥哉版做法：豬柳切片，用醃料醃夠時間，最好醃過夜。洋蔥、番茄、椎果切細粒。燒熱鑊落油，落咖哩粉爆香，落洋蔥、番茄、椎果，再落冰糖、加水先煮個咖哩濃汁，要煮到洋蔥番茄同椎果都溶入汁中。另外用薑片起鑊，落油，爆炒豬柳片，炒至微焦香，加入咖哩汁中，再煮至豬柳全熟，汁液夠濃稠即可盛起。


嘩，呢碟咖哩豬柳，可以夠送好多碗飯，唔駛整第二樣送啦。


咖哩豬柳飯到，熱辣辣，想食「大辣」就再加辣油啦，正！

學斗豆腐炆火腩 Stewed BBQ Pork Belly With Bean Curd And Vegetable

過節一定買燒肉，一餐食唔晒，第日用黎做咩好呢？
最常用黎炆豆腐啦，加埋學斗白菜，可以多一點變化，又有營養。



呢個送可以整多D汁，用黎撈飯好開胃。燒肉揀比較入味同較瘦既，例如近沙梨篤仲正。

材料：布包豆腐一塊，學斗白菜半斤，隔夜燒肉適量。

先煎好豆腐，再爆香火腩，又炒好學斗白菜至八成熟。

再將豆腐、火腩回鑊，轉中慢火炆之，落老抽、蠔油、紹酒、魚露調味，炆至火腩出味，豆腐索晒味，此時加入學斗白菜，轉大火快炒至全熟。



埋獻留適量汁液即可上碟。

辣椒腐乳炒通菜 Stir-Fried Hollow Vegetable In Chili Bean Curd Sauce

你地去酒家食晚飯，會唔會例必點一碟炒青菜架？
我越黎越覺得響酒家點炒青菜，價錢太貴，貴都預左，但係真係未必好過自己炒。
所以，去酒家食飯，我而家寧願食少碟菜。

父親節去某名廚名下酒家晚鈑，就叫左碟腐乳炒通菜，炒出黎真係差過我自己整，要收80元碟！
自己炒，用左香港名牌廖孖記辣椒腐乳三磚。

白通菜(柳葉通)一扎五元。適量蒜蓉，就係咁簡單。



新買一樽廖孖記衛生腐乳王，要40元樽。個包裝係傳統式，冇啤膠封口，難免「漏汁」，感覺唔係咁「衛生」，
但係開蓋後香氣四溢，佢既腐乳係有番咁上下水準既。

用三磚就岩岩好，唔駛落鹽。白通菜洗淨切好，一定要瀝乾水，以炒時唔會大量出水為合。炒就好簡單，燒熱鑊落油，爆香腐乳蒜蓉，爆至香噴噴，落通菜用大火快炒，炒到菜熟收水上碟。

簡簡單單一碟腐乳炒通菜，即使計二元一磚腐乳，成本都係十一元。行政總廚都話好食過酒家！

端午龍船 Dragon Boat Festival Greetings

趁行政總廚去廁所偷拍先----唔係偷拍行政總廚呀，係偷拍隻白斬雞，不過佢未斬呀。

薯蓉「比薩」 Potato Paste "Pizza"

唔好誤會，呢個薯蓉「比薩」唔係Pizza黎，冇落麵粉，全部係薯蓉黎架。



兩個大薯仔就可以整到一大碟，一家食完先出去wet慶祝父親節！

材料：

大薯仔兩個，煙豬腩三條，紫洋蔥半個，芫茜三條。

做法：



薯仔連皮切片隔水蒸熟，搓爛備用。煙豬腩切度，紫洋蔥切粒，芫西切碎。
燒熱鑊落少少油爆香煙肉，爆至出油，落洋蔥爆炒一陣。



將煙肉同洋蔥放入薯蓉中再搓勻，落鹽、糖調味。
放入雪櫃雪凍雪至較硬身。



燒熱平底鑊，落少少油，將薯蓉放入鑊中壓平鋪落鑊底，用中慢火煎至兩面黃，落芫茜再將兩面煎香即可上碟。



一大碟切開八大塊，阿爸食多塊啦！和味！

獨蒜炒細豆芽 Stir-Fried Green Bean Sprout And Single Clove Garlic

以前讀大學住宿舍，夜晚去食堂食飯，通常都係肉多菜少。果時食堂餐廳有一味「清炒芽菜」幾受歡迎，皆因又平又爽口又健康也。



間中我都會加送，就係呢味「清炒芽菜」，師傅炒得夠鑊氣，淨係芽菜炒芽菜，都幾好食架。



今次加埋五大粒獨蒜一齊炒，更香口。獨蒜炒熟左，好似食有蒜味既淮山，幾得意架。



你估細豆芽貴定係獨蒜貴？補番材料同做法：

細豆芽一斤，獨蒜五六粒，薑片兩三片。細豆芽洗淨瀝乾水，獨蒜切薄片，燒熱鑊落油，爆香薑片，再落獨蒜片爆香，落芽菜大火快炒，贊酒，落鹽或者魚露，炒香收水上碟！

新買鑄鐵平底鑊仔煎蛋 Fried Egg Using A New 6.5 Inches Lodge Skillet

嘩，搞乜呀，隻蛋煎到咁老，又乾。冇法啦，開新鑊呀！

屋企已經買左幾款Lodge鑄鐵廚具，都係響網站從美國訂購，而家香港都有Lodge賣。



行超市見到呢個六吋半Skillet仔，百幾炆，忍唔住買左。



Skillet仔最岩用黎煎蛋，你睇佢既logo都係煎緊蛋。

我都知道呢種鑄鐵鑊要用一排用到鑊面「起油積」先會好用，所以第一次開鑊預左會黐。



結果燒熱鑊，一放蛋入去就黐住唔郁得，真係黐到好貼服，鑄鐵鑊好傳熱，熄左火都繼續煎緊，就咁就煎到隻蛋又老又乾，即使攤凍晒都鏟唔起，結果監硬黎，真係「陷」包散！

睇怕要用呢隻鑊煎靚靚荷包蛋，先要用佢一排先得喇。

大蕉 Banana

蕉係好奇特既「生果」，蕉之中，我覺得「大蕉」比「香蕉」更有性格，味道更有「深度」。

呢排大蕉似乎「當造」，又平又靚，食多隻啦！

銀芽肉絲菜脯煎蛋 Fried Eggs With Green Bean Sprout, Shredded Prok And Preserved Vegetable

買左細豆芽同脢頭瘦肉，唔知做咩好。
屋企仲食剩少少菜脯，於是念頭一轉，就整左呢碟----銀芽肉絲菜脯煎蛋。銀芽炒蛋已經好好食，加埋菜脯同肉絲，就更和味！

材料：

銀芽、肉絲、菜脯其實只需要少少，剩番既芽菜可以清炒，都好好食。雞蛋三隻。

做法：



燒熱鑊落油、落薑粒，爆炒已調好味既肉絲，將肉絲炒熟。放入菜脯再炒，最後加入銀芽快炒贊少少油兜起。



雞蛋打勻，將炒好既材料拌入。再燒熱鑊，倒入拌勻材料既蛋液，轉中火煎，翻轉再煎，煎至外面金黃但裏面仍有適量滑蛋為合。

上碟趁熱開飯喇！！

花膠魷魚花生瘦肉粥 Fish Maw Congee

花膠煲粥，夠滋補。今次落埋水發魷魚頭鬚，有D艇仔粥風味。



花膠一隻發好切幼條，水發魷魚頭鬚洗淨切段切幼條。



脢頭瘦肉先醃鹹醃過夜，再蒸熟切粗條。花生浸洗乾淨，落塊陳皮，同米一齊煲個粥底。

煲至粥底夠綿，落花膠、魷魚、瘦肉，再煲半個鐘。放D薑絲，調味，食得。

蝦餃 Shrimp Dumpling

上次整三角粉果用剩左澄麵，今日試下用埋佢整蝦餃。

下，乜話，呢D係蝦餃？係呀，係蝦餃呀，係肥哉第一版蝦餃。
笨手笨腳，第一次整，唔識「推皮」，推到變晒形，算啦，照蒸照食。
除左個外觀唔係好對板之外，個餡同味道都好似蝦餃架。

餡料：

1) 蝦仔半斤。
2) 竹筍一個(罐頭)。
3) 肥豬肉適量。
4) 薑粒適量。

皮料(以下分量可以做約二十六隻)：

1) 澄麵140克。
2) 生粉20克。
3) 粟粉20克。
4) 水180-200克(約四分三隻食飯碗)。
5) 有人會落少少鹽。
6) 有人會落少少油。

做法：

1) 將蝦仔分兩份，一份原隻，一份拍扁整成蝦膠。
2) 竹筍切粒渣乾索乾水。
3) 肥豬切粒蒸熟。
4) 將以上三樣加入薑粒攪勻，落鹽、紹酒、糖、調味，再另入生粉攪勻放入雪櫃雪佢半日。

5) 開皮料，包入餡料，推皮捏成蝦餃狀。

6) 中火蒸八分鐘。

唔識「推皮」呀，又唔識收邊。第一次做係咁喇，但係唔影響味道喎，一蒸完就趁熱掃清！

以下整番張某大酒店既「蝦餃」，比較下，以此自勉！