魷頭蝦子菜脯蒸豬肉餅 Steamed Minced Pork With Squid Head, Shrimp Eggs and Preserved Vegetable

乾魷魚越賣越貴，想食魷魚肉餅，改買魷頭，七元兩有交易。

屋企有地魚粉、蝦子，仲有菜脯，只須再買二十元半肥瘦就掂。



半肥瘦豬肉可以自己琢，不過琢肉餅係粗重工夫，發出既聲音，都幾干擾隔離左右架，隔離屋幾時食琢肉餅我都知架，因為琢野既聲音真係都幾大聲，如果你住岩響一個好鍾意食琢肉餅既隔離，三日唔埋兩日就琢琢琢，琢到地老天荒，都唔係講笑架。

其實我就唔係好食得出琢同絞既口感分別，又唔想琢壞把刀又唔想製造噪音，所以叫肉檔師傅絞碎，仲要先切走多D肥肉，呢個肉餅比較少肥。

今次請肉檔師傅切走較多肥肉，先絞碎。所以蒸出黎個肉餅冇咁肥。



豬肉用糖、生抽、紹酒、生粉醃勻，再拌入地魚粉同蝦子。

浸洗好魷頭，摘去硬物，切碎，拌入肉餅中，再加入薑粒。

先用中火蒸十分鐘，然後鋪上菜脯粒同乾指天椒絲，再蒸五分鐘即成。

三角粉果(肥哉版) Triangle Dumpling(Fat Joy's Version)

細個讀小學時，街口有檔大牌檔，佢賣既食物，我至今仍記得既就係白粥同粉果。

冇錯，係白粥同粉果，係咪有d怪呢？呢個配搭係當年我常食既早餐之一。

粥檔既白粥，係白果稀粥，見唔到米粒果種，用隻「綠豆青」粥碗裝住，而家粗用既「綠豆青」粥碗好似絕左種了。

印象更深既，就係碟粉果，粉果好大隻，可以逐隻賣，一碟就一隻，最特別既係佢係三角形既，成個金字塔咁樣。

真係念念不忘，今日終於手痕試下整，整到個廚房烏煙瘴氣，但係能夠尋回兒時回憶，都值得！

餡料：
醃好炒好既半肥瘦豬肉碎、中芹粒、韭菜粒、芫荽粒、薑粒、菜脯粒、蝦米粒、沙葛粒。
皮料：
澄麵：生粉：粟粉=7：1：1

將餡料炒好：
先爆香蝦米薑粒，再落肉碎，菜脯粒，沙葛粒，中芹粒爆炒香，再落韭菜粒略炒熄火，落芫荽粒撈勻攤凍。

開好皮(開皮見呢度：http://blog.yahoo.com/_GTVKXK26JCKSEBAIIJPTGF4PU4/articles/34580)，壓成圓塊，包入餡粒，收成三角形粉果。

放入蒸籠用中火蒸7分鐘即成。

呢個三角粉果蒸完後有少少塌左落黎，印象中兒時既粉果係好挺身架，唔知點整！

皮雖然厚左D，但係飽肚呀！

餡粒就勁和味，食兩隻已經可以飽肚！

雪煙囱(爛煮雪菜煙肉通粉) Overcooked Pasta With Bacon And Preserved Vegetable

我鍾意食腍到差唔多爛既通粉，響茶餐廳一定食唔到，只可以自己煮。



今次好懶，只想用最少工夫整呢鑊野，於是就買左罐雪菜，一包煙肉，一包大通粉。



做法實在好簡單，通粉先處理好，煮腍，落煙肉煮至出味。





再落雪菜又煮至出味，煮呀煮呀，通粉超腍，就係我要既口感。



呢個通粉，入口即爛。



最岩公公婆婆食架，哈哈哈！

炒俾阿媽食----荷芹炒肉絲 Stir-fried Green Pea And Chinese Celery With Shredded Pork

母親節快樂呀！祝天下阿媽身體健康，笑口常開呀！

今晚全家出街食好野，晏晝專登炒左呢碟野俾阿媽食。

清、爽、脆、香、甜，降血壓補纖維，好有益架。



材料：

1) 荷蘭豆半斤8元。
2) 中芹一棵2元。
3) 菜脯一兩1元。
4) 脢頭瘦肉少量。
5) 蒜頭少量。

做法：

1) 荷蘭豆揀靚既搣左個蒂撕去韌既絲，洗淨備用。
2) 中芹洗淨切度再切絲備用。
3) 菜脯切絲浸水一陣再瀝乾水備用。
4) 瘦肉切絲，用紹酒、豉油、糖醃勻備用。
5) 燒熱油鑊，落蒜蓉，落肉絲，爆香，炒至七成熟。



6) 落荷蘭豆，炒勻，贊酒。
7) 落菜脯再炒勻。
8) 最後落中芹絲，全部炒勻，調味，炒至收汁即可上碟。



阿媽食多D，正！好味道！

筍衣炆豬肉 Braised Bamboo Shoot Skin And Pork Belly

筍衣非常惹味，但係有說比較「濕毒」，間中食一餐無妨，例如炆豬腩肉真係勁好味架。



筍衣用清水浸泡至乾淨，再渣乾水切開備用。



豬腩肉醃過夜，先出水或蒸，再攤凍切件備用。



燒紅鑊，落油落薑片，爆香南乳，落腩肉爆炒，落筍衣，加水或雞湯煮滾轉中慢火炆至肉腍。



呢個炆送要有多少少汁，用黎撈飯一流。不過唔好食太多喎。

三果豬肺湯 Three Fruits Pig Lung Soup

今日又重演碎屍案！豬肺湯去酒樓飲好貴，其實豬肺係「賤物」，大平。

行街市見到豬肉檔掛住個啤水啤得幾靚既豬肺，十元雞就買左。
結果搞左我六個鐘。豬肺已經煲過一次(見呢度：https://fatjoyskitchen.blogspot.com/2009/09/blog-post_20.html)，今次唔想又係煲金銀菜，於是搞搞新意思，煲個三果南北杏黃芪白肺湯，清熱潤肺化痰補氣，滋補有益。

材料：
1) 枇杷果八個(23元)
2) 蘋果三個(約8元)
3) 乾無花果八粒(15元，用左5粒)
4) 北芪一兩(22元，用左一塊)

5) 南北杏一包(4元)
6) 蜜棗四個(屋企買落，冇入鏡)
7) 豬肺一個(10元)
8) 瘦肉一塊(20元)

工具：佛山鐵線兩耳大瓦煲一個

做法：

1) 豬肺再啤多幾次清水，切大塊浸洗乾淨，用白鑊落幾片薑烘乾炒乾身外皮微黃色。
2) 枇杷果、蘋果、無花果切洗乾淨。
3) 北芪剪細段、蜜棗浸洗乾淨、南北杏樁開。
4) 瘦肉洗淨。
5) 將全部材料放入煲內，加滾水再煲滾轉中慢火煲四個鐘。
飲湯，食料，豬肺點豉油食。

呢個湯味道偏酸甜，至於要幾酸幾甜，可以調節枇杷果、蘋果、無花果、蜜棗的數量而定。

罐頭篇7: 梅菜鯪魚 Canned Food: Fried Dace With Preserved Vegetable

豆豉鯪魚食得多，專登買罐其他配料既鯪魚試下，買左珠江橋牌梅菜鯪魚。

個罐用拉環式，要大力拉到手指痛先拉得開一大半個蓋掩，我諗柔弱少少既女士可能唔夠力拉。拉蓋掩要好小心，因為要出死力，一唔小心會界親。

開罐裏面就係咁樣：



倒晒出黎係咁樣，好乾身下，同豆豉鯪魚最明顯分別係佢冇浸滿油。



蒸左十分鐘之後就係咁樣，可以睇到真係冇乜油，D「汁」其實係蒸既水。



幾好味喎，梅菜係甜梅菜，唔會太鹹，不過始終都係罐頭，梅菜較腍唔夠爽口。

幾送得飯架，間中試下都可以啦。