煲粥炒麵 Congee And Fried Noodle

細個時屋企間中會唔煮飯，阿爸阿媽話今餐唔食飯喇，一於煲粥炒麵啦！果陣時覺得好開心架。

最鍾意食既係柴魚花生豬骨粥，阿媽最鍾意炒既係肉絲炒油麵，落埋韭菜芽菜。

而家油麵太肥喇，我改左用乾麵餅黎炒。

錦興全蛋麵四個，我用左「肥哉摷炒法」整左個青菜摷炒麵。

麵既調味料落左地魚粉、蠔油、頤和園生抽、糖、雞粉，摷勻醃至入晒味先炒。

粥就用粥鼎煲好一巨煲柴魚花生豬骨粥。

嘩，正呀，成朝個個就係食呢大煲粥同一大碟炒麵。

區利昌單柄平底生鐵鑊 Au's Single Handle Flat Bottomed Cast Iron Wok

需要補記一下：我今日(30-11-2011)煎蛋之後洗鑊，抹乾時就抹出黑色呀。D油都有微黑。可能未做好開鑊，要用一段時間先會改善。唔想誤導大家，特此補記。

上海街有間唔起眼既半邊鋪，叫區利昌刀庄，有兩位大叔睇鋪。

佢地賣既生鐵鑊，係好野黎。

我買左隻單柄平底生鐵鑊，95元。冇隻耳仔既就賣90元。仲有大D既就貴D，不過我覺得呢個size就岩，我可以輕鬆拋鑊，女士就可能仍然重左D。

番黎省乾淨，燒熱，落油搽勻再燒熱，沖洗省勻就已經開完鑊(大叔教既仍然係肥豬肉韭菜)。

首先煎隻荷包蛋，完全唔黐，可以輕易翻起。不過冇影到相。

之後又煎過雞扒，又唔黐，非常好用。

炒菜當然冇問題，冇出黑野。
(補記：不過今日30-11-2011煎蛋後抹鑊就抹出黑野)

炒蛋一樣掂。

其貌不揚，手工粗糙，此所謂實而不華也！

昆布海藻綠豆沙 Sea Kelp And Sea Algae Green Bean Paste Sweet Soup

早前在沙田城市超市買左昆布海藻，仲有好多未食完。

今日買包有機綠豆，煲番煲昆布海藻綠豆沙。
綠豆一碗，陳皮一角，昆布一條，海藻適量。

將綠豆浸一個鐘，再煲滾水，將綠豆煲至變沙。
此時放入已浸水剪好既昆布同海藻，再煲至昆布腍身。


加入冰糖，調校至甜度適中即可享用。

 

Patrick and Joel: Staub 圓形琺瑯鑄鐵煲 Round Cocotte 20cm and 24cm

唔買唔買終於買，仲一買買兩個！

事實上呢款煲又真係好靚，我鍾意佢既硬朗外形設計，一睇已經比另一個同類名牌吸引好多。

當然仲有就係煲內壁係黑色搪瓷，唔係白色，我認為呢樣係好重要既加分因素。點解，日子有功，煮落就自然明白。

再加上煲蓋內既「自循環水珠設計」，真係一絕。而且煲蓋頂粒「的」(手柄)係燿眼既金屬「的」，更加醒目。

於是我就做左百貨公司同代理商既「戰利品」喇。

個「羅勒綠」Basil green 20CM 煲仔係由Patrick做檢查員既，就叫呢個煲仔做Patrick仔啦。

個「櫻桃紅」Cherry 24CM 煲既檢查員就係阿Joel(男定女？)，就叫佢做阿Joel啦！




兩個廚房玩具用左我二千幾蚊！

我一向用慣粗野，呢兩個煲而家有D唔捨得用添，真係大鄉里。尤其係唔捨得就咁擺上明火燒，睇怕又要晒錢買塊散熱板喇。

 

日本岩鑄鐵茶壺 Japan Iwachu Cast Iron Teapot

日本南部鐵器，「岩鑄」生鐵松葉圖案茶壺。

造型美觀，內附茶隔，方便泡茶。

壺下方鑄有「岩鑄」字樣，字體方正。

另一邊竟鑄刻英文MADE IN JAPAN，古雅茶壺鑄此英文，有傷雅趣矣，此舉舊品當無？

泡茶一壺，有云鐵壺能釋鐵質入茶，有益健康，信乎？

 

西芹合桃炒珍肝 Stir Fried Celery, Wallnut and Chicken Liver

雞肝美味，間中食少少，都唔錯呀。今次買左新鮮雞肝十元(四個)，西芹半棵，原個合桃適量。

雞肝先用玫瑰露酒、豉油、糖、鹽、雞粉、麻油等醃過夜。
西芹去外皮切斜度，合桃拍開取肉。
我唔想「生炒」雞肝，所以先蒸熟，再沖洗乾淨放入雪櫃雪硬再取出切片備用。

合桃先炒香炒至脆身備用。燒熱鑊，落油，薑，爆炒西芹，兜起。(按：隻鑊就係區利昌生鐵鑊。)

再大火燒熱鑊，放入雞肝爆香，贊酒。將西芹回鑊。

再放入合桃，埋獻收汁即可上碟。

乾燒蝦子麵餅 Braised Shrimp Egg Noodle Cakes

_{琴日行過砵蘭街，無意中見到一間粉麵鋪，原來係香港名牌，買左一包蝦子麵餅(23元6個)，一包全蛋麵餅(18元6個)，每個麵餅都係獨立包裝。有粗麵有幼麵。}

<sub>睇賣相麵餅造得相當唔錯，精緻幼細。我用乾燒法整左兩個蝦子麵餅。


完全冇落任何調味，麵餅本身都好夠味，佢原本預你會放湯，而家我用乾燒，味道略鹹。


麵質幼滑而有韌度，賣成四元一個，都係物有所值。</sub>

 

 

 

 

 

 

水煲雪梨水 Pear Drink In Kettle

再黎一煲雪梨水。

雪梨四個，蜜棗三粒，南北杏適量，一煲煲埋細半煲就飲得。

唔駛落糖，原味已經好好飲。

水煲番茄薯仔肉排湯 Tomato And Potato Pork Rib Soup In Kettle

番茄薯仔排骨湯，好普通既家常湯。

用水煲黎煲，就好玩好多。

煲完斟湯飲，超方便，唔駛用野畢。



用水煲煲湯，梗係用隻杯黎飲啦。

如果廚房細細唔夠位，買個大少少既水煲就可以兼埋做湯煲。而且比較平。

 

牛腩粒日本素麵 Diced Beef Brisket Japanese Fine Noodle

今次試食包日本島原手延素麵。麵條素白精細，包裝雅潔，煮都煮得開心，

買左支日本鰹魚昆布汁，用黎開個日式風味湯底。

再落少少牛腩粒、葱粒，就變成咁樣。

呢隻麵非常爽身，又軟滑幼細，食落口中，可以感覺到一條一條既麵條。製麵既功夫了得。賣得貴都係物有所值(49元一包四札)。