乾燒蝦子麵餅 Braised Shrimp Egg Noodle Cakes

_{琴日行過砵蘭街，無意中見到一間粉麵鋪，原來係香港名牌，買左一包蝦子麵餅(23元6個)，一包全蛋麵餅(18元6個)，每個麵餅都係獨立包裝。有粗麵有幼麵。}

<sub>睇賣相麵餅造得相當唔錯，精緻幼細。我用乾燒法整左兩個蝦子麵餅。


完全冇落任何調味，麵餅本身都好夠味，佢原本預你會放湯，而家我用乾燒，味道略鹹。


麵質幼滑而有韌度，賣成四元一個，都係物有所值。</sub>

 

 

 

 

 

 

蝦乾蝦子乾燒伊麵 Braised E-Fu Noodle With Dried Shrimps and Shrimp eggs

我咁講一定會俾大師傅鬧：整乾燒伊麵真係易到痺。

屋企有蝦乾、蝦子，想食伊麵，就係咁簡單。

大伊麵兩個(兩個已經可以整到一大碟，隻碟細D都裝唔晒)。

用凍水沖一沖乾淨，瀝乾水。我既做法係完全唔駛先煮再過冷河，咁樣做個麵會變得太腍同好易爛。

蝦乾浸軟剪成粒，用薑起鑊，爆香。

加入已浸軟既日本冬菇，加水，加味(鍾意咩味隨個人喜好)，炆煮十幾分鐘。

此時加入伊麵，吸收汁液，煮軟，控制鑊內水量，燒到伊麵有乾身感覺。

加入蝦子、韭黃，撈勻，熄火上碟。

碟邊圍上菜遠，好睇又好食。

呢碟乾燒伊麵出街食一定冇咁大份量，一定冇咁平。

抗通脹，就要多D自己煮食。

紅燒豆腐

布包豆腐2塊。菜遠、冬菇、草菇、雪耳、紅蘿蔔適量。

一、布包豆腐一塊開四，索乾水，灑少少幼鹽，落多少少油煎至兩面金黃備用。最好炸至表面平均金黃，內裏幼滑，不過好晒油，住家冇咁做。

二、菜遠炒熟拌碟。

三、冬菇浸軟剪半，草菇洗淨切片，雪耳軟軟剪細朵，紅蘿蔔切片。

四、薑片起油鑊，爆炒第三項材料，落水，可落蠔油炆一陣。

五、豆腐回鑊，與上面材料四一齊紅燒，燒至略收水，調味埋個厚獻即可上碟。

鍾意食肉可以加入肉片，唔加，用豉油代蠔油，就係一道齋菜。

瑤柱地魚乾燒伊麵

大伊麵3個，每個5元，共15元。

鮮草菇4兩5元。韭黃一札2元。

瑤柱適量，地魚乾適量。

做法：

1 草菇、瑤柱洗淨。草菇切幼，瑤柱浸腍煮一陣搣絲。

2 韭黃切短度。

3 伊麵沖水洗一洗，伊麵唔駛先煮(因此唔駛過冷河，伊麵好快熟，切忌過熟過濕。

4 地魚炸香樁碎。

5 薑粒起鑊，爆香草菇，再落煮好搣好既瑤柱(連水)，煮一陣。

6 加埋地魚碎，加適量水(不要多)，落蠔油、糖、生抽、老抽煮滾。

7 放上已洗水瀝乾既伊麵。(鑊內汁水不宜多，最忌搞到伊麵腍腍濕濕。)

8 控制火路，按情況如要加水，逐少加，邊燒伊麵邊用筷子搞動摷勻。

9 燒至伊麵乾身，試岩味即可熄火。

10 落韭黃，摷勻即可上碟。

三個大伊麵可以整到一巨碟(14吋長)，今日全家都唔駛食飯咯。

咖哩粉絲肉蟹煲

咖哩粉絲蟹煲

材料：

汕頭肉蟹一隻40元。粉絲、蟹味菇、薑片、蔥度、乾蔥頭、咖喱粉適量。

做法：

1 蟹洗淨斬件，瀝乾水備用。

2 粉絲浸軟、乾蔥頭切片備用。

3 燒熱油鑊，放入薑片、乾蔥頭炸一陣。將部分油贊入咖喱粉開勻備用。

4 原鑊再燒熱，放入已撲上生粉既蟹件半煎炸，贊酒。

5 蟹全轉色後，加入粉絲，加適量水，蓋上炆一陣。

6 加入蟹味菇、咖喱油，調味(生抽、老抽、糖、鹽)，再加蓋炆之。

7 開蓋，視鑊內汁水情況，埋少少獻。

8 燒熱瓦煲，搪油，將所有材料放入煲內，加上蔥度，加蓋乾燒之。

9 燒至滋滋聲，粉絲乾身，即可上桌享用。

乾燒鮮蝦粉絲煲

冰鮮蝦半斤24元。

龍口粉絲細半包(大包裝)。

土魷一隻。

大豆芽菜半斤。

中芹、芫茜、指天椒適量。

準備：

1 粉絲用凍水浸軟，瀝乾水備用。

2 冰鮮蝦洗乾淨，用大滾水白灼一下即撈起。蝦水放入一粒金華火腿雞湯粒，開成上湯備用。

3 土魷浸軟洗乾淨剪成絲，用糖、豉油、油、魚露、酒、鹽醃勻。

4 大豆芽用白鑊烘乾水，剪碎。

5 中芹莖切短度，芫茜切條、指天椒切粒。

做法：

1 蝦用廚房紙完全吸乾水，用油鹽乾煎蝦，煎至香脆鏟起。

2 燒熱鑊，落油，用薑起鑊，放入土魷絲爆炒至香。

3 落上湯煮滾後，放入粉絲。

4 兜炒粉絲，煮一陣待其吸收湯汁。放入大豆芽碎兜炒。

5 落中芹再炒至粉絲完全吸收湯汁。

6 用瓦煲仔，落油搪勻，燒至夠熱。把上述5放入煲內，落指天椒，埋獻汁(生粉、老抽、蠔油)，用筷子撈勻。

7 放入乾煎蝦，加蓋乾燒一陣。

8 燒至滋滋聲，開蓋，用筷子略撈一下粉絲同蝦，加入芫茜，再加蓋局一陣即成。

呢個乾燒粉絲要完全乾身才算成功，食落非常惹味架！