西芹炒青殼帶子

買左8隻青殼帶子，40元，開左半邊。

本來想用蒜頭豆豉蓉連殼清蒸，不過睇真D帶子其實都幾污糟，尤其係個殼。

於是心念一轉，就削晒D帶子肉出黎，唔要殼。洗帶子時，又覺得佢滑潺潺，於是徹底清洗。買埋西芹，改整「西芹炒帶子」。

做法：

1 帶子落鹽、生粉省勻，用薑蔥大滾水拖下水至略為收縮撈起。

2 將帶子肉粒、裙邊、內臟分開處理。

3 帶子肉片薄一開二。裙邊、內臟沖水洗淨。

4 帶子肉同裙邊內臟落少少鹽、酒醃一陣備用。

5 西芹削左絲，切斜度。用薑起鑊，落少少鹽爆炒一陣兜起。

6 用薑起鑊，落帶子肉同裙邊爆炒至全熟。(最終冇落內臟！)

7 落西芹，埋獻(蠔油、栗粉、糖、生抽)至收汁即成。

 

花雕蛋白蒸紅蟹

行過街市，見到D紅蟹(花蟹)幾靚，揀左一隻，秤左先問「點賣」，原來104元一斤(6.5元一兩)！隻蟹12兩都唔夠，連咸水草膠袋。。。要90元，好貴呀！

材料：

1 紅蟹(花蟹)一隻。

2 蛋白3隻。

3 花雕酒兩湯匙。

做法：

1 蟹清除內臟洗淨，在碟底放薑片、一湯匙花雕，放上蟹大火蒸10分鐘。

2 準備蛋白汁：3隻蛋白(份量作一份計)打勻，加一湯匙花雕，鹽，兩份水打勻。

3 10分鐘後，倒出蟹汁備用。取走薑片，注入蛋白液。再用中火蒸8分鐘。

4 加入一湯匙蟹汁，贊少少熟油即成。

蒸蛋其實唔簡單，呢碟野蛋白老左少少LU!

玫瑰豉油雞翼

雪雞全翼7隻22元。

主要味料：

1 玫瑰露酒。

2 頭遍老抽。

3 片糖。

做法：

1 雞翼解凍，用老抽、生抽、糖、陳皮、薑蓉、乾蔥、玫瑰露酒醃兩小時。

2 玫瑰豉油汁：清水三碗，老抽3湯匙，片糖三分一塊，玫瑰露酒一瓶蓋，薑片、蔥條適量，八角幾粒。大火煲滾一陣。

3 將雞翼放入玫瑰豉油汁內，中火煲5分鐘，熄火，浸10分鐘，取出雞翼。

4 煲內汁液再煲滾收水，煲至較濃稠攤凍備用。

5 雞翼攤凍後斬件，放入已攤凍之汁液內浸過夜。

6 第二日用慢火加熱已凝結之汁液，取出雞翼上碟即成。

雞翼入晒味，好和味架。

肥哉缽仔糕[第二版]

食過名店缽仔糕後，憑口感改良一下上次個配方，今次既效果好好多。

粘米粉：80克

木薯粉：25克

糯米粉：1平湯匙

澄麵：1平湯匙

開粉用水：100克

糖：50克

煮糖用水：150克

紅豆適量

做法：

1 紅豆隔夜浸好，落少少糖煮至腍身備用。

2 所有粉用水開成粉糊備用。

3 煮好糖水，沖入粉糊中攪勻。

4 在蒸籠內放入四隻碗仔，先蒸熱。(唔駛搽油)

5 放紅豆入碗內，多少隨意。

6 注入粉漿至滿。

7 大火蒸20分鐘。

攤凍後即可享用。呢個配方可以整4個糕仔，更軟滑，更好味！

 

西洋菜炒魚崧

西洋菜炒魚崧

街市見到好嫩既西洋菜，買黎炒先得。

材料：

西洋菜一斤。鯪魚膠10元。蟹味菇適量。薑絲、指天椒絲適量。

做法：

1 西洋菜洗淨，摘去較粗既莖備用。

2 鯪魚膠煎到金黃，切條備用。

3 蟹味菇洗淨，摘去根部備用。

4 薑絲、油起鑊，落少少鹽，落蟹味菇，落魚崧再炒勻，贊少少酒，鏟起備用。

5 燒熱油鑊，落少少鹽、糖，落西洋菜大火快炒。

6 魚崧、蟹味菇回鑊，同西洋菜炒勻，落指天椒絲兜勻即可上碟。

咖哩粉絲肉蟹煲

咖哩粉絲蟹煲

材料：

汕頭肉蟹一隻40元。粉絲、蟹味菇、薑片、蔥度、乾蔥頭、咖喱粉適量。

做法：

1 蟹洗淨斬件，瀝乾水備用。

2 粉絲浸軟、乾蔥頭切片備用。

3 燒熱油鑊，放入薑片、乾蔥頭炸一陣。將部分油贊入咖喱粉開勻備用。

4 原鑊再燒熱，放入已撲上生粉既蟹件半煎炸，贊酒。

5 蟹全轉色後，加入粉絲，加適量水，蓋上炆一陣。

6 加入蟹味菇、咖喱油，調味(生抽、老抽、糖、鹽)，再加蓋炆之。

7 開蓋，視鑊內汁水情況，埋少少獻。

8 燒熱瓦煲，搪油，將所有材料放入煲內，加上蔥度，加蓋乾燒之。

9 燒至滋滋聲，粉絲乾身，即可上桌享用。

名店缽仔糕

深水步名店缽仔糕，黃糕兩個9元。

好好食呀，紅豆大小適中，又夠腍，豆味沁入糕中。

糕身輕微黐牙，感覺剛好，甜味適中，果然好野。好過肥哉整既好多好多！