鹹肉排骨棠菜豆腐黃豆湯 Salted Pork Green Vegetable Yellow Bean Soup

自從雅虎網結束後，我到而家都未能暢快地寫網誌。

谷歌網並不user friendly，我都唔知佢搞出三個頁面成日轉來轉去做乜。

我又唔得閒慢慢去研究。而且佢同我部電腦既設定唔夾，我今日就傳極都上傳唔到相片。 在網誌區內又打唔到中文！

我呢個湯「鹹肉排骨棠菜豆腐黃豆湯」就轉貼左去隨意窩網站。

其實隨意窩一樣唔係好好用，不過好過谷歌少少。

果邊係台灣既網站，睇怕台灣人未必睇得明我D廣東話。

真係冇法子！

鹹肉排骨棠菜黃豆豆腐湯 Salted Pork Green Vegetable Yellow Bean Soup

 

去九龍城買左舊上海鹹肉，用左少少黎煲左呢個湯。

加埋小棠菜、排骨、豆腐同埋黃豆。落排骨同黃豆令湯味更鮮。 

黃豆浸透、鹹肉切粗條，同排骨一齊，先出出水，再清洗一下兼去左過多鹹味。 

小棠菜一開四，豆腐切細塊。

先煲排骨、鹹肉、黃豆。煲至湯色轉白、出味，再落埋小棠菜再煲一陣。

最後落埋豆腐，再煲滾即可試味上枱。

好好飲呀！

文章預存

文章預存

蛋白扒豆苗 Stir-Fried Bean Sprout With Egg White Sauce

街市有兩檔賣豆苗，一檔13元半斤，一檔10元半斤。10元半斤既豆苗比較大棵。

我為左慳3元，幫襯左10元半斤。雖然老左少少，都可以啦。

番黎炒番碟蛋白扒豆苗。屋企早前買左舊上海鹹肉，用剩細半舊。於是落埋鹹肉，貪佢個樣整起有D似火腿。

鹹肉浸一浸水去少少鹹味，切幼條，落糖同紹酒撈一撈再蒸熟備用。

豆苗洗淨瀝乾水(一定要做呢步)，燒熱鑊落比較多油(豆苗好索油)，燒至大熱，落豆苗大火快炒，落少少糖、鹽，贊少少酒，將豆苗炒熟鋪上碟。

最後推個玻璃獻，熄火後加入已打勻既蛋白一隻，將蛋白玻璃獻淋在豆苗中間，

再在上面放上鹹肉即可上枱。

臘味煲仔飯 Clay Pot Rice With Air-Dried Duck, Pork and Sausages



 

響就黎絕種既缸瓦鋪買左個瓦煲仔，想整番煲煲仔飯。

材料：臘腸兩條，臘肉兩塊，臘鴨一塊。絲苗米一碗。

工具：鐵線瓦煲仔一個，散熱板一塊。

做法：先洗米，浸米。沖洗乾淨臘味。瓦煲仔內櫳掃少少油，放入浸透既絲苗米，再加入一碗水。煲仔放在散熱板上，先用中大火煲滾，再改中細火煮飯。

煮到仲見到米水，但開始收水時放入臘味，加蓋。

再煮到聞到微微飯焦香時，熄火。

 

取出臘味，切好再鋪回飯面，加蓋局約十分鐘。

局完將飯同臘味撈勻就可以裝飯喇！呢煲飯其實唔駛再落豉油，臘味本身已夠味，且已滲入飯中，咁先至係原汁原味既臘味煲仔飯。

欖菜薑葱蒸鯇魚腩 Steamed Fish Belly With Preverved Olive Vegetable

整番碟欖菜蒸鯇魚腩，加埋薑葱紅椒絲，簡簡單單已好惹味！

用左呢隻加辣欖菜。

主要材料：鯇魚腩一塊24元。欖菜適量。

鯇魚腩洗淨用少少鹽同胡椒粉醃一醃，再鋪上欖菜同薑絲。

      

水滾後蒸約10分鐘，再局一陣，倒去多餘水份，鋪上葱粒同紅椒絲。

贊滾油，再落適量豉油(頭抽+糖+水)。

趁熱開飯喇喂！

豉椒排骨炒即食麵 Stir-Fried Salted Black Bean Pork Rib On Instant Noodle

即食麵要食得健康，可以改變整法，例如整個豉椒排骨炒麵。

做法其實係「二合一」。第一樣係豉椒炒排骨，第二樣係煮麵煎麵。

 

即食麵兩個，用水煮開，過冷河，瀝乾水，撈入大約四分一包調味粉，少少油用手摷勻，放入易潔鑊煎至兩面微焦黃，鋪在碟上。

肉排醃好，撲少少生粉，放入油鑊泡油至金黃色撈起。

切好三色椒，洗淨豆豉，燒熱鑊，落油，爆香豆豉，將排骨回鑊炒香，再落三色椒爆炒，贊酒，埋個蠔油獻，獻汁要多。

將豉椒炒排骨淋在麵上，即可上枱分享。

麵靚，豉椒排骨香，二合一，好好吃！

 

白汁龍脷柳 Braised Sole Fillets In White Sauce

   

整番煲白汁龍脷柳，可以獨立做送，又可以用黎做碟頭飯。

而家去平民超市買唔到龍脷柳，有既都係鯰魚柳，比較鞋。龍脷柳較滑，響街市檔口有賣，不過唔知係咪真係龍脷。

買左一包兩條，用鹽、胡椒粉醃過夜。另再買紅蘿蔔、洋葱、磨菇做配菜。

我既做法係咁：

紅蘿蔔切滾度，放入熱水煮至滾起，過冷河。

洋葱、磨菇切好，燒熱鑊落油，爆香。

龍脷柳切塊，撈少少生粉，泡嫩油。

跟住燒熱鑊爆炒紅蘿蔔，落埋魚柳塊，跟住再落洋葱、磨菇。

最後埋個白汁獻(麵粉、奶粉、水、鹽、糖）慢慢將所有材料同白汁撈勻，汁要比較多，煮至滾起即熄火，完成！

髮菜冬菇鱆魚蓮藕排骨湯 Long Thread Moss Lotus Root Pork Rib Soup

煲左煲髮菜蓮藕排骨湯，放左上去隨意窩果邊旺下個場。各位得閒去睇睇！

髮菜蓮藕冬菇排骨湯 Long Thread Moss Lotus Root Mushroom Pork Rib Soup

蓮藕鱆魚冬菇排骨湯係我家經典湯水，今次加埋髮菜，更豐富，更好味。

做法好簡單，將所有材料準備好，放入大雲鼎內，十五碗水煲三個鐘，調味即成。

呢個湯非常香，煲緊時已經香氣四溢，成屋都聞到。

 

水煲南瓜栗子湯 Boiled Pumpkin Chestnut Soup In Water Kettle

 

去超市執左個栗子南瓜湯包，湯料其實仲有紅蘿蔔、粟米、蜜棗同杏仁。

 

 

呢個甜湯，最岩用個水煲黎煲啦！
 
將材料處理好，就可以放晒入個水煲度，加大半煲水，用電爐煲到得番半煲。

 

 

斟落蓋碗度飲，清甜！完全唔駛落任何調味！ 

 

 

呢煲可以斟出九碗湯，夠一家人齊齊享用。