節瓜青口排骨湯 Hairy Melon Mussel Pork Rib Soup

而家煲個湯，閒閒地都要五六十元甚至上百元，真係唔係咁簡單。

今日買左兩包紐西蘭半殼青口，最初冇諗過要黎煲湯。不過睇下佢個說明，話可以用黎打邊爐。

又諗起用黎煲湯既「淡菜」，就煲左呢個湯。

計下錢先：

1) 青口兩包21隻，$42.3

2) 節瓜六個，兩斤半，$20
3) 排骨頭 $30
4) 花生眉豆一包 $4
5) 薑兩大片，蜜棗三粒，陳皮一角

材料費就用左＄92.3。



青口先用滾水煮熟拆肉。排骨頭洗淨出水除去碎骨。節瓜切滾度。眉豆花生浸洗乾淨。

將所有材料放入已有大半煲水既瓦煲內，中大火煲滾，再轉中細火煲三個鐘以上。



調味即成。

綠野仙蹤(金華火腿湯浸翡翠豆苗) Poached Bean Sprouts In Jin Hua Ham Soup

呢個菜，簡單易做，幫佢起個靚名，就更加有趣味啦！食都食得開心D！

綠野：翡翠豆苗



仙蹤：金華火腿

翡翠豆苗洗乾淨，瀝乾水。

金華火腿一塊，先用滾水放湯，做個金華火腿湯底。

將火腿撈起，切成碎粒備用。

在湯底中加入薑片、糖、雞粉、適量油。大火煮滾，加入豆苗。

較大火將豆苗同湯液煮至再滾，然後轉慢火，保持溫度以不滾為準，將豆苗浸熟。

在碟底灑上火腿碎。

倒入豆苗同湯液，再放入火腿碎在上面。



綠野仙蹤，大功告成！

魚蓉煎蛋 Fried Eggs With Dace Paste

整魚蓉釀冬菇，用剩一半，最簡單既做法，就係用黎煎蛋。



在魚蓉裏加入三隻蛋，攪勻。



燒熱鑊，煎至兩面金黃就做好。

香口，好味，經濟！

魚蓉釀冬菇 Stuffed Mushroom With Dace Paste

呢味送本應用百花釀冬菇，即係要用蝦膠，不過整蝦膠太麻煩，我懶，所以用鯪魚蓉代替。

而家鯪魚蓉越黎越貴，買10蚊得丁咁多，不過用一半都已經可以釀十隻冬菇。

冬菇揀夠圓既，十隻，浸軟剪掟，用少少紹酒、鹽、糖、豉油捽下佢醃一陣。

魚蓉加入少少陳皮絲、蝦米粒，少少水再攪至起膠。

在冬菇底搽少少生粉，再釀入薄薄一層魚蓉。

碟底放左用剩既腐皮，再鋪上冬菇，鋪左九隻已經鋪滿碟，有一隻冇入鏡。

放入鑊隔水蒸12分鐘。

淋上蠔油獻，搞掂。

咁樣全用蒸，食味較清。如果先給冬菇魚肉向下煎香再蒸，可能更香口。

南瓜蒸肉排 Steamed Pork Rib With Pumpkin Slices

南瓜蒸肉排係一個幾有特色既做法。蒸好之後，南瓜腍甜，肉排多汁又肥美，都幾好食架。



街市冇圓形南瓜，只有長形南瓜，買左一份，約六分一個，五元。肉排二十元，就係咁簡單。



南瓜只須用一小半已夠，將佢批皮切片，鋪在碟底，圍在碟邊。



肉排調味，醃一小時以上，最後用生粉撈勻封住味汁。將肉排鋪在南瓜片上，用大滾水隔水蒸15分鐘。



灑上蔥粒即可上檯。

萵苣炒豆豉鯪魚 Stir-Fried Lettuce With Fried Dace And Salted Black Beans

一直覺得萵苣(萵筍)係怪物，唔知點整，所以冇買。最近響網上討論區見到有人炒萵苣，於是又學人整下。



買一條試試，九個半。



用黎炒一條豆豉鯪魚。



萵苣莖部批去表面的硬纖維，然後切成條狀。可以切絲賣相會靚D，不過我懶切條算數。

豆豉鯪魚一條，搣絲，豆豉適量。先爆香豆豉鯪魚，鯪魚要爆炒至硬身少少，一陣回鑊炒萵苣先唔會變得太腍。



兜起豆豉鯪魚，再炒萵苣，落少少鹽，贊水贊紹酒。

再將豆豉回鑊，連同萵苣炒香，最後將鯪魚回鑊，炒至收汁即可上碟。



萵苣超爽脆，味道甘甘地，同豆豉鯪魚都幾夾！

咖哩紅白蘿蔔牛肋條 Braised Beef Rib Finger With Carrot And Turnip In Curry Sauce

買左包牛肋條，本來參考佢個說明，想試下用黎煲紅白蘿蔔湯。



但係煲煲下改變主意，想做個送送下飯多D，於是就變左紅白蘿蔔炆咖哩牛肋條。



因為原本落左紅蘿蔔同蜜棗，最後個咖哩就多左層甜味，都幾惹味喎。牛肋條要出水清洗乾淨先可以煲。紅白蘿蔔切滾度。



煲煲下湯，改放花椒八角陳皮香葉，變成炆牛肋條。



再加入細半樽油咖哩，落鹽、雞粉，炆至牛肉吸收汁液腍身，可以埋個薄獻。

呢度只係畢左半煲出黎，已經一大碟。仲有一半可以放入雪櫃留番第日食。抵過煲湯呀，哈哈！

臘鴨髀菜乾魚片粥 Cured Duck Leg Dried Vegetable Sliced Fish Fillet Congee

天氣轉暖，想清左雪櫃D臘味，將隻臘鴨髀拆肉煲粥都唔錯。於是就煲左呢個臘鴨髀菜乾魚片粥。



臘鴨洗乾淨，出水。然後用滾水煲至湯色變白，出味，再拆肉去皮備用。臘鴨湯去除表面油份，加入白米，陳皮，煲成粥底。



菜乾浸洗乾淨，剪好，煲腍，加入粥底中，再加入鴨肉，煲至粥綿。



最後落魚片，煲滾。



試味，應該唔駛加鹽，臘鴨本身已好夠味。



倒入粥碗。



灑上蔥粒即成。

鹿牌彩花保溫瓶兩個 Two "Deer Brand" Vacuum Flasks

鹿牌保溫瓶係北京名牌，我地香港地就叫熱水壺或者暖水壺。



呢隻壺既特色就係「娘」，銀紅底色係佢經典本色。



噴上大大朵牡丹花，大紅大紫又粉紅又金黃咁，真係娘到爆。



但係就係呢種獨特光色，佢成為北京日用品懷舊經典，呢隻鹿仔係有51年歷史既名牌。



睇下個壺蓋同個裸水松塞，真係有時光倒流三十年既感覺。



內膽有張合格證同說明書架！



壺底有螺旋可以上緊個內膽。



呢隻壺其實都係香港人回憶，佢雖然唔夠本地駱駝嘜咁流行，不過都曾經走入唔少平民家居。



睇下睇下，佢又娘得幾獨特，幾有性格，幾有型！



呢兩個北京生產既鹿牌保溫瓶(熱水壺)，一個莊滾水，一個莊熱茶。符合國家推薦保溫瓶標準，不過可能係最後一批絕版貨！



據報道，北京鹿牌係高污染工業，2012年中已停產，並要遷出北京，響內蒙設廠再生產。咁即係話以後既鹿牌就唔係原廠北京貨喇。



所以而家有買又係要趁手喇！