白果花生豬肚粥 Ginkgo Peanut Pig Stomach Congee

初中年代家住灣仔，早餐經常響灣仔街市一間平民粥檔食豬肚粥、豬心粥。

間粥檔做粥方法係，先煮熟豬肚豬心，切成薄片(真係薄片)，然後倒入滾粥。

D粥係稀粥，不過好好味(落重味精)，撈勻豬肚、豬心，熱騰騰的粥水落肚，已經覺得好滿足。

我呢煲花生白果豬肚粥，已經係另一版本。

我仲加埋豬骨折肉，足料好多。

最能勾起回憶的，就係呢碗白切豬肚。

日本即食麵：黑豚骨焦蔥風味老麵 Japan Instant Noodle: Black Pig Bone Burned Spring Onion Soup Noodle

呢個黑豚骨湯麵，14元一包。

 

都幾好味，最特別係果D「焦蔥」粒。

食落有一種焦香味，成為呢個即食麵既賣點。


以前煮餸如果整燶左D蔥，會掉左佢，
原來燶左既蔥都可以變成獨特風味。

木瓜花生排骨雞腳湯 Papaya Peanut Chicken Feet Soup

屋企用過好多個鐵線瓦煲，燒裂左又買番。

發現鐵線瓦煲既質素越來越差。

琴日買番個鐵線瓦「雲鼎」，48元，好粗糙。

唔知點解中國人唔肯俾心機出產一D優質既傳統鐵線瓦煲(沙煲)，梗係粗枝大葉，手工差劣。

今日煲左煲木瓜花生眉豆排骨雞腳湯。

用左新鮮雞腳8隻16元。紅肉木瓜10元。花生眉豆4元。排骨頭20元。總共50元。

用呢個傳統瓦煲慢慢煲，煲足三個鐘。

一餐飲唔晒，繼續慢火煲，越煲越好味。

越老火，湯味越濃。

苦瓜酸菜辣椒乾炒牛肉配蜜糖芥末汁 Fried Beef With Bitter Melon, Sour Vegetable, Dried Chili In Honey Mustard Sauce

呢個小炒專登玩酸苦辣甜四味。

材料：
1) 大丁苦瓜一個7元。
2) 酸菜(冇葉)半棵7元。
3) 牛肉30元。
4) 乾指天椒八隻。
5) 熱狗芥末醬適量。
6) 蜜糖或麥芽糖或砂糖適量。

準備：
1) 苦瓜切好，用鹽醃半小時以上，渣乾水，沖洗乾淨瀝乾水備用。
2) 酸菜切好，用鹽水浸一陣，沖乾淨，放入白鑊烘乾備用。
3) 牛肉醃好，放入雪櫃一小時以上備用。
4) 指天椒乾切大段，去核浸軟備用。
5) 芥末醬用適量砂糖或蜜糖，加適量冷開水攪勻備用。

炒：
1) 炒苦瓜：燒熱鑊，落油，加薑片、蒜片爆香，落苦瓜大火快炒，贊適量水將苦瓜炒至八成熟鏟起。
2) 炒牛肉：燒熱鑊，落油，落牛肉大火快炒，炒至七成熟。
3) 此時加入酸菜、苦瓜，大火快炒。

4) 加入辣椒乾，贊酒，埋獻，炒至苦瓜牛肉全熟，完全收汁上碟。

5) 最後淋上適量甜芥末汁。

此菜色彩繽紛，味道酸甜苦辣俱全，仲好送飯添架。

日本即食麵：中華そば(蕎麥麵) Japan Instant Noodle: Chinese Style Soba Noodle

今次輪到試呢個福岡縣產既中華蕎麥麵。

配老媽子整既白切雞左髀、炆冬菇一隻，加多兩條油菜。

呢個麵有D似上海乾麵條，都幾軟滑。

麵本身帶少少鹽味，先用水煮好，再撈起另外以湯粉放湯。

湯清味美，都唔錯，不過麵條食落同上海幼麵、陽春麵冇乜大分別。

佢用料比較講究，賣26元一包，貴好多，煮出黎分量就係呢一碗。

試一兩次無妨。經常食我就食唔起喇。

 

辣味豬肉蒸蛋 Steamed Chili Pork Mince With Eggs

琴日包雲吞用剩一半半肥瘦豬肉，今日蒸水蛋清左佢。

今次整個辣味豬肉蒸蛋。材料有：

1) 半肥瘦豬肉10元分量。絞碎，隔日調好味。

2) 指天椒乾四隻。

3) 雞蛋三隻。

4) 蝦米、薑適量。

做法：

1) 豬肉加入指天椒粒、蝦米粒先蒸10分鐘蒸熟。呢個蒸肉餅都幾正，不過食左就整唔到蒸蛋。

2) 倒起肉汁，將蒸熟既豬肉壓散，置大而平既碟內。

3) 三隻蛋打勻，加入蛋液兩倍既水(連蒸肉汁)或味湯，攪勻。

4) 將蛋液倒入已放豬肉既大平碟內，攪勻。

5) 將4)放入慢火慢滾水既鑊內，加上蓋將整隻碟蓋密。

6) 再加鑊蓋用細火保持水在慢滾狀態。

 

7) 蒸至蛋剛好完全凝固，熄火。

8) 另用油爆香指天椒粒、蝦米粒、薑粒，淋在蒸蛋上面。

9) 淋上適量豉油，搪勻。

快D開飯啦！


又滑又好味，滑過芒果布甸呀！

淨係用佢撈飯已經可以食兩碗！

蝦肉雲吞 Shrimp and Pork Wontons In Soup

行街市見到雪蝦仔，細細隻，白白淨，最岩用黎包雲吞。

於是就整左呢碗一共有38隻既蝦肉雲吞喇。

睇下似唔似一舊舊雲響度飄飄下？

蝦肉雲吞即係蝦同豬肉餡雲吞。

餡料唔駛好多，雲吞細細隻一啖食晒就好。

買左半斤蝦仔，12元。半肥瘦豬肉絞碎20元，只需用一半即係10元。

廣東雲吞皮5元(13元斤)。

材料好簡單，成本總共27元。不過有一樣野唔少得，就係地魚粉。

屋企有地魚乾，可以自已整地魚粉，但係怕麻煩。

於是買左呢樽野，要63元！！

我既做法係咁：

1) 半肥瘦豬肉醃好最少要一個鐘，醃料味道要較濃夠味，另加地魚粉撈勻。

2) 蝦仔洗淨去腸，啤水索乾，唔駛調味，放入雪櫃雪凍。

3) 先將半肥瘦豬肉蒸十分鐘蒸熟，隔出肉汁留後用，將豬肉搓散。

4) 加入蝦仔，再加入一隻蛋黃撈勻。蛋白留後用。

5) 將4)放入雪櫃雪至稍為乾水同硬身，取出。

6) 包雲吞，一塊雲吞皮包一隻蝦仔同小量豬肉即可，用打散既蛋白搽邊捏實。我一共包到38隻雲吞。

7) 煲一煲大滾水，放入雲吞，煮約5-7分鐘即可撈出。

8) 另煲滾半煲水，放入蒸豬肉汁、雞粉，地魚粉、鹽、靚生抽，做個豉油湯底，煲滾後，過濾，成為清湯。



9) 將雲吞加入清湯中，再煮熱，灑上蔥粒、韭黃(今次唔記得買)。

好味！唔駛一陣又搶食一空喇！

馬蹄羅漢果薑水Water Chestnut, Grosvener Momordica Fruit And Ginger Drink

早排響超市無拿拿買左一盒「羅漢果沖劑」，

內裏係獨立包裝每包兩粒羅漢果粉磚，

試沖左一兩次，仲有好多包。

點樣可以用左佢呢，於是就買左一斤馬蹄，用左四粒羅漢果磚，



加埋幾片薑，整左呢個馬蹄羅漢果薑水，

都幾好味架，又可以啖啖食馬蹄，好爽口。

用正式既靚漢果煲，當然更好啦。

芝士香腸麥包 Cheese Sausage in Wheat Bread

 

切開好似個月餅咁添！

之前買左兩包外國香腸，屋企食極都食唔完。

今日仍食剩兩條芝士腸，見幾耐冇開個個焗爐，於是就整左呢四個香腸麥包。

呢隻芝士香腸味道濃郁，油量高，幾肥下一個包用半條已夠。



食完一個包已經唔駛食飯啦。

 

中秋節快樂！Happy Mid Autumn Festival!

唔駛講咁多，去餅！！！