昆布海藻冬菇排骨湯 Kelp, Seaweed, Mushroom And Pork Spare Rib Soup

今日卒之可以試下響CitySuper買既「日本三寶」：昆布、海藻、原木菇。



一於煲番煲昆布海藻冬菇排骨湯。

屋企有人唔鍾意飲昆布海藻，未飲已經話腥喎。未飲又點知呢，試下先啦。

昆布跟說明做法，浸軟後用慢火煮5分鐘，去左D潺，再用清水過乾淨。

海藻同冬菇洗淨浸軟。

排骨頭30元，洗乾淨，出水，去碎骨。

先煲個排骨湯底，將排骨頭連同冬菇、兩粒蜜棗煲一個鐘。



跟住落埋昆布片，海藻，轉中慢火再煲一個鐘以上。

熄火、調味。



湯渣可以點豉油食，個湯其實好清甜滋潤，我唔覺腥喎。



昆布海藻含豐富碘質，間中飲下都幾好架。