果占魚手指 Fruit Jam Fish Fingers

屋企樽果占食極食唔晒，你有冇試過用來煮餸呢？今日我就整咗呢味「果占魚手指」，果占汁風味多變，絕唔輸俾傳統嘅甜酸汁架！

呢碟餸嘅成色最後取決於果占嘅顏色，我今日呢樽果占係深紫紅色。取適量果占，落白米醋、少少鹽，如有蜜糖可加少少，加栗粉同水開一個獻汁備用。唔好問我落幾多果占幾多醋，人人口味唔同，你可以一路開汁一路自己試味。

我用咗越南急凍石斑柳三塊，解凍索乾水，切成長條手指狀，再落魚露、鹽、糖、胡椒粉調味。

放入雪櫃醃一個鐘，取出再索乾水準備上粉。我唔鐘意太多太厚粉，只係用生粉加一隻蛋，開成濃稠粉漿將魚手指放入攪勻，再逐條取出沾上乾粉。

之後，放入油鍋中炸之，先炸一次，撈起瀝油，稍稍放涼。

再炸第二次，炸至香脆硬身撈起用廚紙索乾油。

跟住煮果占獻汁，煮到開始收汁時，放入魚手指拌勻。

一路收汁一路放入已烘香之黑白芝麻，直至收汁上碟。

嘩，果占汁甜酸香脆石斑魚手指整好喇！你一條我一條，未裝飯已清咗半碟矣！肥哉今日嘅介紹，各位真係要試下。

糖醋鱸魚 Deep Fried Sea Perch Fillet With Sweet And Sour Sauce

買左包急凍海鱸魚片，整左另碟糖醋鱸魚。酸酸甜甜，可以補救鱸魚稍欠鮮味的缺點。

呢包鱸魚片，劏得乾乾淨淨，解凍後用鹽醃過夜，索乾水，搽上乾粉就可以落油鑊炸。

炸至兩面金黃色，上碟。我用左包現成糖醋排骨醬，加少少乾葱煮個汁，淋上魚面，灑上葱粒就可以上枱。

 

用酥炸法，魚塊香口D，加上糖醋汁，幾開胃架！

 

肥哉廚房2013年之前六百幾個貼文載於「隨意窩」網站，觀迎光臨指教：http://blog.xuite.net/fatjoykitchen/hkblog

 

肥哉四喜酥角 Deep Fried Four Happiness Chinese New Year Dumpling

 

 

今日年26，肥哉響度同大家拜個早年，祝大家馬年事事如意，身體健康！我仲帶左包四喜酥角上黎同大家賀年添！

   

呢包酥角唔係買架，係我肥哉特製架！話說本來想買包角仔過年算數，點知見到鋪頭既角仔又貴又唔靚。街檔果D都貴，普通平民麵包鋪都賣成60元一磅，而且好多都甩皮甩骨，買唔落手。於是今年自已整啦！

 



 

呢個肥哉版角仔，用左四種餡料：合桃、杏仁、芝麻、花生。過年嘛，起個好意頭既靚名，一於叫做四喜酥角！

 



加入合桃同杏仁，更健康，口味更豐富！

 

先整個酥角皮，我上網參考左阿韋太既配方，不過開粉既油我就全用橄欖油代替。 





搓好皮用碌棍仔開皮，再用水杯給出圓形酥角皮，就可以包。

餡料先將花生用白鑊烘熱，剝衣，再將合桃、杏仁烘一烘香，再烘香芝麻。將四喜料放入膠袋內打碎。唔駛太碎，由得佢大大細細一粒粒就好。再加白砂糖撈勻就搞掂。

呢個皮料既份量，我一共包左三十隻角仔。

 

開油鑊，用中火將油燒熱，放入角仔慢慢炸，火唔要太猛，要控制油溫唔好太高，咁樣可以令角仔表面滑淨D唔會爆開。

 

 炸到金黃色就可以撈起瀝乾油份。

 

用廚紙索油後，可以上碟！嘩，正呀！真係夠膽講正過街買架！

 

忍唔住偷食左兩隻，好好味！傳統角仔多數只用花生砂糖，我加左合桃同杏仁，好食好多喎！

     

酥角攤凍後可以入膠袋保存或者送俾朋友，同賀新春！肥哉響度恭祝各位四季平安，喜氣洋洋！

 

 

 

酥炸雞排 Deep Fried Chicken Steak

開開油鑊，唔想浪費成鑊油，於是炸埋屋企最後一塊雞扒，就整左呢碟酥炸雞排。

雞扒解凍後，略為片開部分厚肉，再用刀背將肉打鬆。用豉油、喼汁、紹酒、鹽、糖、胡椒粉、雞粉、麻油調味，放入雪櫃醃至入味。

之後將雞扒均勻拍滿麵粉同碎麥片，放入滾油中炸至表面金黃酥脆。

炸好後用廚紙索油，斬件上碟。

雞扒外皮香脆，裏面雞肉剛熟，軟滑有肉汁！不過都幾熱氣，每人限兩件好喇。

玉桂鹽炸豆腐角 Deep Fried Triangular Sliced Bean Curd Sprinkled With Cinnamon Salt

呢味炸豆腐角係肥哉童年回憶，唔知大家有冇印象？如果有印象，你都係同我一樣，係老餅一塊喇！

記得細個時，間中會同大人去沙田萬佛寺，附件仲有間西林寺。果時去要行一條條好長既石級，響石級旁邊，就有好多檔賣油炸豆腐既檔口。

果D油炸豆腐切成三角形，有幫襯店主就會用紙摺個三角兜裝住，沈少少鹽就俾客人。細個時去萬佛寺同西林寺，最記得既唔係果D佛象，而係呢D外面脆口裏面軟滑既炸豆腐角。

我其實好少炸野，今日貪得意試整下，懷下舊！

呢款炸豆腐角真係抵食！四元磚豆腐，可以切出二十幾塊豆腐角。唔洗落任何粉同調味，就咁放入油鑊炸就得。

逐D逐D炸，最後全部放入油鑊再炸一炸即可，用廚房紙吸油就上碟。

再灑上自製玉桂鹽(用白鑊燒熱鹽，加少少玉桂粉撈勻)，趁熱食。

嘩！正呀！簡簡單單已經非常好食！

 兒時回憶返晒黎！

酸甜魚手指 Fish Fingers In Sweet And Sour Sauce

炸野好「晒」油，今日貪得意又忍唔住，於是整左呢碟酸甜魚手指。整完剩番成一大湯碗「魚油」，你話點算好呢？

材料：



1）急凍龍利柳一包14元。想個送正D梗係買靚魚好似石斑呀、銀雪魚呀咁啦，平民百姓買十零元包魚就可以喇。
2）乾葱頭兩粒。

汁料：



茄汁+喼汁+玄米醋+水+生粉+糖+雞粉。我冇譜架，隨意自己試岩味就得啦，不過一定要落醋先可以吊出可口既酸味。

做法：



1）龍利柳（其實唔知係咪龍利，佢個包裝係咁話，總之唔係腍魚)，解凍後徹底索乾水。用少少鹽、紹酒、胡椒粉醃佢一小時以上（最好放入雪㰓)。




2）將醃好既魚手指上勻生粉，逐D逐D放入已燒熱油鑊中炸。全部炸完一次後索乾油，再全部放入油鑊炸第二次，炸至表面金黃色撈起索油。
3）倒起鑊中油，剩番少少，爆香乾葱頭，倒入汁料煮至濃稠。



4）放入魚手指，兜勻令魚手指索滿酸甜汁再略為收乾，即可上碟。



嘩，正呀，一路偷食一路趁熱開飯喇喂！！

蛇年黃金滿載(炸三角豆腐) Deep Fried Triangle Bean Curd

蛇年吉祥！！！恭祝各位靈巧若蛇，一年到晚笑騎騎！！

今晚團年家家大魚大肉，先黎一碟好意頭既「蛇年黃金滿載」！平、靚、正架！！

滑豆腐一塊，而家都要三個半，但係都算抵食。



將豆腐裁成一二至十四塊三角片，如果有時間整，可以先浸入白鹵水中浸一日。



然後燒熱油鑊，改用中火炸至兩面金黃。

此時可以灑少少淮鹽食。



又或者好我呢次咁，用蠔油、豉油、糖、酒、雞粉炆煮至收汁上碟。



滿載一碟黃金豆腐，索晒汁料，皮香肉滑，非常好食！