果占魚手指 Fruit Jam Fish Fingers

屋企樽果占食極食唔晒，你有冇試過用來煮餸呢？今日我就整咗呢味「果占魚手指」，果占汁風味多變，絕唔輸俾傳統嘅甜酸汁架！

呢碟餸嘅成色最後取決於果占嘅顏色，我今日呢樽果占係深紫紅色。取適量果占，落白米醋、少少鹽，如有蜜糖可加少少，加栗粉同水開一個獻汁備用。唔好問我落幾多果占幾多醋，人人口味唔同，你可以一路開汁一路自己試味。

我用咗越南急凍石斑柳三塊，解凍索乾水，切成長條手指狀，再落魚露、鹽、糖、胡椒粉調味。

放入雪櫃醃一個鐘，取出再索乾水準備上粉。我唔鐘意太多太厚粉，只係用生粉加一隻蛋，開成濃稠粉漿將魚手指放入攪勻，再逐條取出沾上乾粉。

之後，放入油鍋中炸之，先炸一次，撈起瀝油，稍稍放涼。

再炸第二次，炸至香脆硬身撈起用廚紙索乾油。

跟住煮果占獻汁，煮到開始收汁時，放入魚手指拌勻。

一路收汁一路放入已烘香之黑白芝麻，直至收汁上碟。

嘩，果占汁甜酸香脆石斑魚手指整好喇！你一條我一條，未裝飯已清咗半碟矣！肥哉今日嘅介紹，各位真係要試下。