炆豬柚皮 Braised Pomelo and Pork Skin

豬柚皮即係豬皮同柚皮，哈哈！

買碌柚我最想食既係佢層皮，唔係肉，所以我一定唔會買綠色薄皮果種柚。我會買厚皮多核既碌柚。

有時生果檔剝左碌柚，唔要皮，可以免費送添！再買D豬皮(我買左13元)，就可以炆個豬柚皮啦。

柚皮批好，浸水渣水幾次，落幾滴白醋再浸一陣，就可以去左部分澀味(唔好去晒，醋少少就夠)，仲特別容易炆腍。用魚露、地魚粉、糖、頭抽，八角慢火炆至腍。

豬皮洗淨，出出水再沖淨，渣乾水，用蒜頭豆豉薑粒起熱油鑊，爆香，就可以落適量炆柚皮水，蠔油炆至入味收汁。



柚皮兩片內面向上放碟上，再放上豬皮，埋濃獻，呢味炆豬柚皮就搞掂。



一個碌柚開四塊皮，可以整到兩大碟。呢度只係半份，真係抵食夾大件啦！

罐頭三絲春卷 Spring Rolls Stuffed With Canned Pork, Mushroom And Bamboo Shoot

春節食春卷，都算應節掛。

屋企買落兩罐炒三絲，係時候清左佢，一於整碟罐頭三絲春卷。

一罐係水仙花牌，一罐係古龍牌。

水仙花牌油水色澤似乎靚D，古龍牌竹筍夠多，我好鍾意食筍，見到都流口水。

用現成炒三絲，可以慳番好多刀工，又慳食材。

兩罐足夠包十幾二十條。我今次只係整左八條，一罐料都用唔晒。

我平時絕少炸野，今次先係第三個炸既貼子。

用少量油逐條慢火炸至金黃色。索乾油即可進食，一路炸一路已經有隻為食鬼偷食喇。

用罐頭三絲做餡，效果都唔錯架！

點埋鎮江醋就更似去酒樓食啦。

龍年吉祥 Prosperous Year Of The Dragon

新年快樂！秀秀我家總煮----媽咪典藏寶貝：水晶膠全盒。

開呀！新年喜氣齊來：

敬祝大家

家肥屋潤

龍年吉祥！

蒸鬆糕 Steamed Sponge Cake

嘩，蒸蒸蒸高高高呀！哈哈哈！！

今次蒸鬆糕蒸到頂起個蒸籠蓋，真係節節上升，發到爸爸聲呀！

肥哉恭祝大家龍年龍精虎猛

長命富貴
萬壽無疆
蒸蒸日上
步步高陞

牛油軟包兩食 Soft Butter Bread In 2 Styles

 

用麵包機整左舊牛油軟包粉糰，做左兩款麵包：

合桃牛油軟包三個

午餐肉薑粒蛋牛油捲兩個

今次跟足牛油軟包配方，落足牛油，有成湯殼(三份一杯)咁多。真係整過先知，麵包越香越軟滑越肥。

合桃牛油軟包用新鮮合桃肉，係原粒拍散取肉，用粉糰搓勻就得。

午餐肉用梅林歐盟午餐肉，煎香裁長片。再煎個薑粒蛋皮裁長片，用粉糰捲起就得。

我鍾意個合桃牛油軟包多D，好好食。不過唔敢多食。

不過一諗起粉糰入面成大殼牛油，就怕怕。

淡榨菜欖豉蒸鯇魚腩 Steamed Fish Belly With Preserved Vegetable And Salted Olive

榨菜爽脆，欖豉腍，兩種鹹味一齊同黎蒸魚，效果都唔錯。

為免太鹹，買左淡榨菜，仲要浸水減鹹。欖豉浸洗沖乾淨。

鯇魚腩刮淨膜垢，索乾水。

再準備葱粒，薑絲，辣椒乾就搞掂啦。

碟底抹油，鋪少少榨菜，放上魚腩，薑絲、欖豉、辣椒乾。水滾蒸十二分鐘。

加入葱粒，適量蒸魚豉油，贊滾油即可上碟。

魚汁美味，用少少撈飯，胃口大增。

 

士多啤梨浸酒 Strawberry Wine

 

琴日去CitySuper買左一包日本福岡甜王士多啤梨，九粒要139元！



終於都決定買過罌酒，今次買左遠洋九江雙蒸，其實想買三蒸，但係超市冇大罌裝。

呢罌雙蒸酒精含量只係29.5%。招紙上面雙蒸酒既拼音都標準。不過「九江」既拼音都係唔岩。

我估計香港經銷既大陸酒，招紙係香港印，用繁體字，拼音就冇咁考究都唔定。

你睇下呢的士啤梨幾靚！

參考網上資料，另外仲要落冰糖同蜜糖。我既份量冇定，隨意為之。

將士多啤梨洗淨去葉吸乾水風乾一陣，冰糖洗淨吸乾，就可以放入罌，加一大羹蜜糖

再加酒。

浸佢一個月，睇怕都飲得掛。

廣西三蒸米酒 Guangxi Triple Distilled Rice Wine

新年買左一大甖三蒸酒，祝大家蒸蒸日上再蒸上呀！哈哈。

揀左幾間鋪頭，決定買呢甖(不過……)。

廣西象山牌三蒸米酒， 2.5升，38度，95元(唔知有冇買貴到呢)。

買呢甖酒，諗住兩樣野，第一樣係浸士多啤梨酒，第二樣遲D先話你地知。

今日唔得閒整，下星期先去買盒靚士多啤梨。

補記：其實對大陸酒真係有戒心，睇真D，佢既招紙既拼音有D古怪。

廣西漢語拼音應該係Guangxi，但係佢張招紙係Kwangxi
三蒸漢語拼音應該係Sanzheng，但係佢拼成Sancheng

冇理由連廣西既拼音都搞錯喎。你話係咪要買過呢？

補補記：今日留意睇下其他牌子雙蒸三蒸酒既招紙，發現唔少都係亂拼音。例如珠江橋牌醇舊三蒸酒，三蒸就拼成Sancheng，酒更拼成Chiew。雙蒸更有拼成Sheung Jin。其實蒸應拼zheng, 酒應拼jiu。可見招紙原來亂咁黎。再留意下，招紙都係用繁體字印，唔知係唔係響香港印製，D人唔識拼音是是但但呢？