瑤柱臘味芋粒蘿蔔糕 Dried Scallop Chinese Sausage Taro Dice Turnip Pudding

哈哈哈，似唔似張「九龍壁畫」呀？

呢個糕又係我肥哉特製架，專登響蘿蔔糕入面加埋芋頭粒，咁就食蘿蔔糕同時食埋芋頭糕啦！

蘿蔔同粉既大約比例 (呢個配方可以整到一個11吋X6吋長形蛋糕模既份量)

蘿蔔二斤半。

粘米粉180克。

澄麵20克。

配料：

芋頭粒一碗半。瑤柱四粒。臘腸兩條。冬菇(係冬菇，唔要花菇)五朵。蝦米適量。

做法：

預備一個糕模，加一張鋁箔覆蓋糕模兩邊內壁同底部，仲要兩邊留掩，可以覆蓋糕面。

蘿白一半刨絲一半搞成濃汁。

瑤柱用水煮半小時以上至腍身拆絲(瑤柱水留用)。臘腸、冬菇切粒。蝦米洗淨。

燒熱鑊先落臘腸粒炒至出油，再放入冬菇蝦米炒香，最後再放入瑤柱絲，贊少少紹酒炒香上碟。

原鑊落瑤柱水，先加幾片薑煮滾至出薑味，撈起薑片，倒入蘿蔔絲同蘿蔔蓉，煮滾。煮至透明。

放入芋頭粒，再煮滾。收火加蓋局一陣。

此時用篩逐少篩入粘米粉同澄麵，攪勻。

再加入先前已爆香既材料(留起少少用黎鋪面)，攪勻。

調味，可加鹽、雞粉、蠔油等，唔好咁重手呀。

將攪好既粉漿倒入已掃油既糕模(鋁箔)，將粉漿面抹平，兩邊掩上鋁箔密封好。

用大火蒸一小時以上，最後十分鐘打開鋁箔掩在糕面鋪上先前留起既部分材料做裝飾，再掩好蒸十分鐘，熄火局多十分鐘即成。

今日唔准食，要等到過年先准食。

 

 

 

黑芝麻椰汁年糕 Black Sesame Coconut Cream Chinese New Year Pudding

要食黑芝麻年糕，就要自已整啦。呢款係肥哉特製架。

材料：

黑芝麻、紅棗、靚片糖(要深啡色)、椰漿、糯米粉、粘米粉、澄麵、水、油。

各樣材料比例同做法唔多講喇，舊年做過。可以睇呢度。http://hk.myblog.yahoo.com/fatjoykitchen/article?mid=807

比較特別係落黑芝麻，要先洗一洗再用白鑊炒香就得。

所有材料搞掂倒入隻大雞公碗度，落鑊蒸45分鐘變成咁↓

攤凍放入雪櫃雪硬，食前切件煎香。

 

 

 

 

豉油王乾炒一丁麵 Stir Fried Instant Noodle With Soya Sauce

買左牛肉味一丁麵，本來用黎看門口做下早餐。點知有人話唔岩口味，佢地食慣原味同雞蓉味。唔肯食。

於是拆出黎整碟炒一丁麵啦，個麵係包包一樣，冇分別既。

材料好簡單：

唐生菜一棵，雞蛋一隻，一丁麵兩個，靚老抽適量。

先將唐生菜切絲。雞蛋煎成蛋皮再切絲。一丁麵用滾水滾兩滾至岩岩散開撈起過冷河備用。

洗乾靜隻鑊，我今次都係用隻碳鋼鑊，落少少油，落一丁麵炒開，逐少逐少加入靚老抽，如果唔中意包牛肉味粉，就索性改晒味，落少少鹽同雞粉，或者落蠔油都得。不過要唔好太重手，如果唔係鹹得滯。

炒呀炒，呢隻鑊仲可以玩埋拋鑊，拋呀拋，然後落大部分蛋絲同生菜絲，又炒又拋將材料撈勻，即可上碟。

在上面再落幾條蛋絲，碟邊放少少生菜絲做裝飾就OK啦。

 

金銀魚球魚尾豆腐湯 Double Fish Balls Fish Tail Bean Curd Soup

鯇魚尾一條13元，洗淨抹乾用薑片起鑊煎香備用。

鯪魚肉10元，揑成魚球，一半煎香至金黃色備用。

布包豆腐一塊切長粒備用。

用瓦煲落兩片薑煲滾水，放入已煎香之魚尾滾半小時以上。

半小時後，放入金銀鯪魚球，再用中火滾半小時以上。

半小時後，放入豆腐粒，又用中火滾十五分鐘。

調味，灑上葱粒趁熱飲。魚尾可以起點豉油食。

備註：如果想濃味D，可以用淡豆漿做湯底，或者先落一塊豆腐煲個湯底。

 

價升質降 Rising Price but Deteriorating Quality

而家D街坊食品真係又貴又差。今日又行過旺角，走去X園食左碗牛筋丸麵，又去X記食左碗魚蛋粉，又走去X利買左四個港式麵包：兩個叉燒餐包，兩個火腿蛋包。

先講下碗牛筋丸麵，牛丸都算「尚可」啦，麵已經差左D，湯就再差D，要24元碗。好耐冇去X園食喇，今次去佢變左喇。以前枱上會有一隻碟仔俾客人斟魚露呀豉油呀辣油呀咁，用黎點牛丸食，而家冇左，慳番D功夫。以前D辣油又香又辣，而家得個辣字，一D香味都冇。

跟住講下碗魚蛋粉，呢間X記有五十幾年歷史，佢而家仲話湯底用正豬骨同大地魚。我幫襯左好多年，睇住佢退步，越黎越差。今日碗粉既湯底毫無鮮味，同滾水加味精冇乜分別，只係靠浸住既魚蛋幫下味。魚蛋既質量都差左好多。而家百物騰貴，做生意始終要賺錢，唯有偷工減料。仲加左2元，要20元碗添。18元加到20元，加左11個巴仙。價升質降，真係「雙管齊下」咯。

再講下X利四個麵包，上次賣3元個，而家賣4元。質量就冇乜變，都算仲有D本心。不過3元加到4元，足足加左百分之33.33架，都好狼胎。

冇法啦，而家樣樣都貴。碗魚蛋粉我越食越無耐喇，因為我睇唔到佢會「改善」，老字號都係咁，睇怕只會越黎越差。真正用心做既街坊魚蛋粉其實一早已經絕左跡咯。

 

隨街飲食？ Eating and Drinking on the street?

你地會唔會隨街飲飲食食呢？

企響街度篤魚蛋呀食牛什呀咭燒賣呀飲貢茶呀咁，會嗎？係咪真係咁肚餓咁頸渴？

 

 

乾炒牛河 Fried Flat Rice Noodles With Beef

卒之都要整番碟乾炒牛河！

我用左隻炭鋼鑊，買左一片河粉5元，十幾片炒既牛肉16元，韭黃2元，芽菜3元(其實只係丁咁多)。

河粉先摷開，灑少少雞粉，摷勻。

牛肉用糖、生抽、水、紹酒醃一個鐘以上。

芽菜摘成銀芽適量，韭黃切度，蔥切度。

做法：

1 先用少少油燒熱鑊，然後將油全部倒走，放入河粉煎一煎，兜起。

2 落油大火爆炒牛肉至七成熟撈起。

3 洗乾淨鑊，落少少油炒銀芽，放回河粉，此時逐少逐少加入頭遍老抽，炒勻。

4 加入牛肉炒勻炒至牛肉全熟。

5 加入韭黃、蔥，快炒，炒勻即可上碟。

落D潮州辣油撈勻食，仲正！

 

駱駝牌湯∕飯壺 Camel Vacuum Flask

香港名牌駱駝嘜黎架。

不鏽鋼殼水銀膽，以前細個帶飯返學，用既就係呢停飯壺，不過細個過呢個。

呢種傳統飯壺睇怕都係要被淘汰咯。佢已經在我家退役，唔會輕易出山架喇。

 

 

蘿蔔清湯牛腩 Beef Brisket in Turnip Soup

呢煲野整左四粒鐘，考耐性。

買一塊崩沙腩用左99元，一個白蘿蔔7元。

煲完切埋一隻中碟裝晒，都幾貴架。

用兩個煲黎煲呢味野。一個煲煲蘿蔔湯，另一個煲煲牛腩。

牛腩洗乾淨，用薑片出水10分鐘，撈起過冷可，剪走肥油，沖洗乾淨，再用薑片飛多一次水至滾起，過冷河備用。

蘿蔔切大塊，放落滾水中，落幾片薑，用中慢火煲個湯底。

另一個煲落八角兩粒，陳皮一塊，薑幾片，片糖一角，煲滾放入牛腩用中慢火煲。

總之兩煲野都係慢慢煲。蘿蔔煲煲到蘿蔔腍可以熄火。牛腩煲有排未腍，要不時要撇走水面既油份，係咁慢火煲，撇油，煲，撇油。

煲到咁上下，牛腩開始有諗既感覺，逐D逐D加入蘿蔔湯，又煲，撇油。最後將蘿蔔同湯都倒入牛腩煲內，扯一扯乾水，煲到牛腩腍度咁自己心水就可以校味。

將牛腩撈出攤凍，切片，鋪回蘿蔔上，淋上滾湯，灑上蔥粒，趁熱開飯喇喂~~~~~~

 

 

 

游水石斑 Swimming grouper

今日2011新年，祝大家生生猛猛，身體健康！

同屋企人去西貢行左一轉，食海鮮。唔好誤會呀，冇食到佢呀，好大條食唔起。

行行下見到兩隻籠貓，唔知點解俾人困係籠裏面呢？係咪流浪貓等人收？睇下佢眼神幾幽怨。。。

 

甜梅菜蒸鯇魚腩 Steamed Grass Carp with Sweet Preserved Vegetable

蒸之前

蒸之後

點解縮左咁多架？因為本來蒸15分鐘就得，但係今日蒸完仲要熱住等左15分鐘先開得飯，耐左喇，結果縮左好多。

鯇魚腩25元，甜梅菜兩棵，薑絲，蒸魚豉油。

鯇魚腩刮清晒肚內的黑衣，用鹽醃放入雪櫃一個鐘以上。之後沖水乾淨，用廚房紙索乾水。

甜梅菜徹底沖洗，浸水中幾分鐘，榨乾水，重複呢個步驟幾次。切絲。落少少老抽、糖、油撈勻。

蒸既過程：

1 魚碟底搽少少油，鋪上一半薑絲，三分一梅菜絲。

2 鋪上魚腩，再在面上放餘下薑絲，再用梅菜鋪面。

3 燒滾水，蒸約十五分鐘。

4 十五分鐘後熄火，淋上蒸魚豉油同少少滾油即可上枱。