碭山梨雞骨草南北杏排骨湯 Pear Pork Rib Soup

各位大家好嗎？呢個幾月佔中佔到社會撕裂，整左野都冇心機貼上黎，成個十月都冇貼文喇！

呢排好多種梨可以在街市買到，其中有一種其貌不揚，外皮粗鞋既叫碭山梨，12元買左3個，加埋少少乾雞骨草、南北杏同排骨，煲左呢個湯。

三個梨其中一個大到好似沙田柚咁，大過隻食飯碗。三個梨批左層粗皮，內面其實係爽甜既梨肉，真係梨不可以貌相。

將梨、南北杏、雞骨草、排骨全部掉晒入煲內，煲到夠火候就掂。

個湯甜到不得了，落鹽平衡下味道，非常正。煲完湯既梨肉出奇地軟滑清甜，夠晒滋潤。每人飲一碗就好，飲太多可能吸收太多糖份。

***Please leave your feedback, thanks!***

  

葡汁鱈魚 Braised Hake Fillets In Coconut Curry Sauce

響「屋仔」買左包「鱈魚片」Hake Fillets，係葡國產，成包文字似係西班牙文，冇個識。只係靠張中文標貼知係「鱈魚」。

上網查查鱈魚，原來名目好多，Hake又叫無鬚鱈魚。解凍拆開共有五片，用少少鹽、胡椒粉、薑粒醃透。

索乾水用易潔鑊煎至兩面金黃。

切開試下，肉質比較粗，口感同食味都一般，同銀鱈魚冇得比。呢種鱈魚用黎清煎唔太合適，燴番個葡汁落去可能會好少少。

於是就用葱頭起鑊，爆炒紅蘿蔔，加埋芥蘭頭，落兩包李X記葡汁四蔬汁炆煮一陣。再將剪成細塊既鱈魚回鑊，落少少香草，炆煮至略為收汁。

葡汁鱈魚大功告成，加左葡汁同配料，美味好多！

***Please leave your feedback, thanks!***



荷蘭雞翼 (可樂雞翼) Soda Water Chicken Wings

可樂係汽水，汽水又叫荷蘭水，加埋如假包換既荷蘭豆，呢碟炆雞翼就名正言順叫做「荷蘭雞翼」啦！

呢味菜式好便宜，我買左一磅四隻雞全翼，只需14元。再加適量荷蘭豆同一碗荷蘭水(可樂)，就係主要材料。

雞翼先出水洗淨，切開雞搥部分，就有八件。先燒熱鑊落油，用較多薑片爆香起鑊，落雞翼爆炒一下，再加水、可樂、冰糖、老抽、鹽、紹酒，煮滾後轉中細火慢慢炆。

荷蘭豆另行炒熟，待雞翼炆約20分鐘熟透至汁液濃稠後，加入荷蘭豆兜勻即可上碟。

荷蘭雞翼做好喇！雞翼軟腍，蘭豆爽脆，非常美味！呢味菜式關鍵係要落足夠薑，薑味要出。油不要太多，因為雞翼本身會出油。要落冰糖，增加光澤。要用中細火炆煮雞翼先唔破皮，能保持外觀完整，大家都試下啦！

 ***Please leave your feedback, thanks!***



四喜烤麩 (肥哉版) Four Happiness Bran Dough (Fat Joy's Version)

早排去左九龍城一轉，買左舊烤麩，學下人整四喜烤麩，結果整左呢個肥哉版。

我用既「四喜」料係：金針、冬菇、雲耳同栗子。我諗比較少用既係栗子，因為多數會用花生或者筍片。今日響街市見到去衣栗子幾靚，於是就用黎配料。

烤麩用手搣成一塊塊，浸水揸水多次，浸至水清，再煮佢五六分鐘，再過冷河揸乾水就可以用。傳統做法似乎要炸，但係我唔想太肥膩，只係略煎一下就用。

配料栗子先煮至八成腍，金針洗淨出出水再打結爆香，冬菇雲耳浸軟煮腍。四樣野再一齊落味料(老抽、冰糖、紹酒、雞粉、蠔油)炒香。落埋烤麩加水炆煮。

煮至入味軟腍，落麻油，埋獻收汁即可上碟。

呢個菜式聽講係冷盤，不過我當普通送菜送飯食，煮埋一大兜一餐食唔晒，剩番既就自然變左冷盤啦，見上圖。呢個肥哉版油量較少，味道偏甜帶鹹，最好味入味既除左烤麩，竟然係金針！總之成碟既味道無論熱食定冷食我都好滿意！

***Please leave your feedback, thanks!***

五青汁 Five Green Juice

  

今日買埋咁多青BB既野，睇怕都估到我想整乜啦。咪五青汁囉。要整呢個汁，買既料多於所需，計一計：八元一份苦瓜四個、八元一份青瓜兩條，青椒同西芹一齊買二十二元，青蘋果六個二十四元。總共用左六十二元。 



 

整一次所用既材料只係好少：苦瓜一個、西芹兩條、青蘋果一個、青瓜三份一條、青椒一個。

洗淨切碎放入攪拌機加水就可以。搾左一次，可以整到四杯。

味道清淡，連碎渣都飲埋，都幾容易入口。聽講可以清熱洗腸，不妨試試。

蝦米肉絲冬菇白菜煮旱藕粉絲 Braised Noodle Casserole With Dried Shrimp, Musroon, Pork Slice and Vegetable

早前裕華有個廣西農產品展覽，買左包「旱藕粉絲」放響廚櫃頂，一直冇理佢，今日睇睇原來八月已到最佳食用期限。於是當佢普通粉絲咁煮左呢碟。

我用左蝦米、肉絲、冬菇仔同少少切開既學斗白菜仔一齊煮。

包裝袋後有一大段介紹同做法說明，佢係芭蕉芋粉造既粉絲，同蓮藕其實冇關係。

質地比普通粉絲韌，有彈性，而且較耐煮。先用溫水浸軟，再爆香冬菇蝦米，加埋肉絲炒熟，再落粉絲加水加味料炆煮一陣，最後落埋白菜仔，收汁即成。

我呢碟煮得比較耐，粉絲比較腍身，如果想爽身有咬勁一點，可以早點上碟。鍾意多汁可以埋獻，我呢次想乾身點，冇埋獻。

百合綠豆沙(樽裝夏枯草湯底) Dried Lily Green Bean Sweet Soup (Spica Prunellae Drink Base)

上次買既綠豆未食完，今日煲埋佢。試下用百合陳皮煲。另外用兩樽夏枯草水做湯底。

呢個綠豆沙夠晒清熱，大熱天時岩晒。不過寒底既人就唔好飲太多喇。

綠豆先用清水煲散，臨煲好前先加入夏枯草水再煲至成沙。

我落左兩樽，煲好試味，唔駛再落糖，已經夠甜。味道有特色，相當唔錯！

北芪眉豆柴魚花生豬骨粥 Dried Milk Vetch Root, White Bean, Bonito Stick, Peanut and Pork Rib Congee

柴魚花生豬骨粥煲得多，今次落多兩樣料：北芪同眉豆。煲出黎碗粥又綿香，風味獨特。

豬骨我用左排骨頭，用鹽醃過夜，出水去除碎骨。眉豆、花生洗淨。柴魚、北芪浸軟，撕開剪段。

預先已煲緊粥底，將所有材料加一片陳皮放入，煲至粥綿，調味即成。

好味道，成大煲粥唔駛三兩下手勢就清晒！



越南春卷肥哉版 Vietnam Spring Roll Fat Joy's Version

早前行超市買左包越南春卷皮Rice Paper，一直都冇時間整。今日終於可以試下用黎包春卷，不過真係要幾多時間，唔得閒係做唔到架。

越南春卷皮特別之處係浸下水就會軟身兼「自動黏貼」，而且好有韌性唔易穿破，容易包餡料。包完就可以即食或者油炸。

我用左既餡料有：粉絲、綠豆芽菜、木耳，呢三樣用油鹽味水煮好瀝乾水備用。仲有用左少少白飯魚煎蛋切絲、青瓜條、火腿絲。仲有芫茜葉，洗淨浸下鹽水，用黎裝飾同增加香氣。

呢條餡料可以包十幾條春卷，我用左大半碟已經包左八條。每條放三片芫茜葉做裝飾。再整個汁料就大功告成，個汁我用左魚露、蜜糖、水、檸檬汁、泰國乾辣椒。

口感同味道都唔錯喎，放入雪櫃雪凍仲好食添！

蒸白飯魚乾煎蛋卷 Steamed Fried Dried Siver Fish Egg Roll

去樓上買左包泰國白飯魚乾，用黎整左呢碟蒸白飯魚煎蛋卷，先煎後蒸。

魚乾洗淨浸十幾分鐘，先起鑊落薑片爆香備用。再打三隻蛋，發勻，用魚露調味，加入魚乾同適量芫荽或青葱。用平底易潔鑊煎成蛋餅。

將蛋餅捲成圓柱體，切開四段，再蒸八分鐘。

打個玻璃獻或者好似今次咁打個茄汁獻就可以開餐啦，好味道！