煲完湯既瘦肉你地會點處理？係咪會掉左佢？
我記得細個時，屋企附近有間包辦筵席鋪頭，鋪頭外面另設一個粥檔，專賣一種粥，就係皮蛋鹹瘦肉粥。
佢呢個粥特別之處，就係瘦肉唔係刀切，而係順肉紋撕成極幼絲。
而且瘦肉似乎係「二手貨」，可能係煲過湯既肉，用鹽醃鹹。
呢個粥善用廚餘，可見以前既人又環保又有生意頭腦。粥比較稀，細個時覺得好好味，大既係落左味精掛。
今日呢個粥就係兒時回憶，用既就係煲完湯既「不見天」，取其瘦肉搣絲煲成。
一碗平平無奇甚至可以講係好cheap既粥，但係滿載了不能磨滅的回憶！
蒸左隻上次響和興買既臘鴨髀，加薑絲蒸至熟透。
蒸完拆肉，用手撕應該比較好，不過我懶，用較剪剪肉。臘鴨蒸好，可以洗米煮飯，落適量蒸臘鴨汁，加幾片鴨髀肉。煮熟飯局透，摷勻。裝好一人一碗，油香四溢，少少鴨肉已經可送一碗飯。
灼碟生菜平衡下(冇出鏡)，就係一餐，臘鴨高脂高鹽，間中試下好喇！
又過左三個月，樽梅酒已經幾香，有陣果香同有種杏仁味。
今日試左少少，甜度適中，酒味都可以用香醇形容。
屋企人平時唔飲酒，最快都要農曆年過節先飲！
響街市買左兩筒生蠔，買埋紅綠尖椒，整個薑蔥尖椒爆生蠔。
兩筒生蠔每筒十隻，共二十隻，將潺沖乾淨，再用鹽省，再洗，用生粉卒，再洗，沖水至乾乾淨淨。
再放入滾水落兩塊薑片將生蠔煮熟，過冷河備用。
燒熱鑊，落油，落薑片爆香，再落蔥度爆炒，然後落生蠔，用大火爆炒，再加蓋局。
至生蠔香噴噴表面呈金黃色，加入切好既尖椒，炒勻，贊少少酒，加入汁料(糖、老抽、雞粉、鹽、水)，加蓋局至收汁即可上碟。
生蠔勁縮水，炒埋只得大半碟。
喂，趁熱開飯喇喂！！
2013新年快樂！生活愉快！
今日整個簡單容易香煎比目魚扒。比目魚響大昌買，標韱話係挪威出產。
將魚自然解凍，然後用鹽醃一個鐘以上，就可以煎。
比目魚魚肉較易散，最好用易潔鑊煎，比較容易煎到兩面金黃色。
就咁食已經好好味，比目魚肉質較油滑，可以煎香煎乾身D，更加可口。
一煎好趁熱，你搣一塊我搣一塊，仲未裝飯就已經食鬼晒！
