蝦米腸粉 Rice Roll With Dried Shrimp And Spring Onion

嘩，整豬腸粉好好玩呀！見人整得咁開心，自己都試下。



首先要有個岩用既工具，就係蒸腸粉用既盤。個盤底一定要平，唔可以一度深一度淺。



屋企有個6吋X8吋玻璃局盤，盤底夠平，唔會變形，岩晒！



第二就係要校岩粉漿既比例。參考各路英雄做法後，我呢碗粉漿配方如下：

粘米粉：100g
澄麵：一餐匙 (西式餐匙，唔係茶匙，比茶匙大)
粟粉：一餐匙
油：一餐匙
水：350g
鹽：小量



用我呢個玻璃局盤同我呢個份量，每次落四餐匙粉漿，落蝦米蔥花，中火蒸四分鐘就可以卷一條腸粉。



一共可以做出十一條。



每條剪開三舊，就有33舊一大碟。



落埋甜豉油、熟油、海鮮醬(甜醬)同炒香既白芝蔴，就係肥哉自家製蝦米腸喇。



真係滑過、好食過街邊檔口既腸粉架！！