外賣牛筋腩飯 Take Away Beef Tendon And Brisket With Rice

今日唔得閒煮飯，去街市麵檔買外賣。44元一盒牛筋牛腩飯。

呢檔嘅牛筋麵、牛腩麵做得唔錯。通常呢類麵檔都會賣埋飯，例如牛腩飯、牛什飯、豬手飯或雙拼飯等等。

分量都好多，一盒飯其實有成三碗。女士食一碗已夠晒有餘，中年男士如果食得晒成盒，九成係個大肚腩肥佬。牛腩其實好肥膩，食完個喉嚨成日都覺得有油黐住！

麵檔牛腩飯如果只係以鹵水腩湯代替正式炆牛腩的濃滑獻汁，效果不會好。例如我買呢盒，腩汁(即腩湯)浸到成盒飯濕晒，稍為加熱兜兩兜，飯已爛，不好吃。

買燒賣皮 Buying Siu Mai Wrapper

 

普通街市檔不易買到燒賣皮，於是專登走去深水埗搜購。傍晚五點幾六點，深水埗街市一帶超多人買餸，呢間粉麵廠門市幾位阿姐做到冇停手，顧客多到要排隊先有交易。

燒賣皮十二蚊一包，要雪藏保存。包裝上寫的是「麵皮」，這鮮黃色的麵皮含有人造色素「美國5號黃」。燒賣唔係日日食，睇怕食少少人造食用色素都冇乜問題掛。

一包成疊有成3.5CM厚，直徑約8.5CM。燒賣皮好薄，咁大疊應該有幾百張！

買到燒賣皮，一於燒賣就燒賣，整燒賣！

十一年前嘅五仁金腿月餅 Eleven Years Old Ham and Nuts Mooncakes

 

多年前（2009年) 買了三個牌子的五仁金腿月餅，做比較，結果食唔晒，放咗入廚房食物櫃，束之高閣沒再理會，點知唔經唔覺就一放頭尾十一年！

最近拾執廚房就執番佢地出嚟，三個牌子月餅都係獨立包裝，有防潮劑，在月餅盒內保存完好，放咗十一年都冇生蟲冇腐爛，只係顏色變深，香味消失但冇發臭，只係有一種微焦的氣味。

三個月餅都變硬了，要用大力先可以切開。

裏面嘅果仁同金華火腿大部分都已融為一體，睇睇下好似考古發掘古墓發現嘅古代食物，你敢唔敢食！？梗係唔食啦，月餅都掉晒，僅立此存照。

匯入2008至2013年的舊網誌 Importing old blog content from 2008 to 2013

各位網友，今天我把放在隨意窩的六百幾篇於2008至2013年寫的舊網誌匯入到這個新網址，與2013年後寫的新網誌大會合。肥哉廚房從今天起唔使分開兩個喇，大家唔使兩頭走喇。肥哉其實日日都有煮飯，不過停寫網誌兩年。我決定再寫返，以廚會友，各位失散咗嘅廚友為食鬼快啲返番嚟喇喂！

肥哉廚房新版在Blogspot

各位好朋友：

首先非常感謝大家捧場。肥哉廚房新版在Blogspot，網址是：
https://fatjoyskitchen.blogspot.com/

肥哉廚房隨意窩版保留了我的舊帖文，歡迎各位瀏覽。

另外，我最近又開了一個推特，網址是：
https://twitter.com/fatjoykitchen

謝謝各位的支持！

各位網友大家好 Hello

How are you everybody?

Just want to let you know that I am still here. I haven't uploaded new post for more than a year so I would like to know if you are still visiting my blog. Please leave me a word. I will upload new stuff here soon.

Have a nice day!

FatJoy

旺角平民麵包店 A Local Bakery In Mong Kok

 

旺角有間平民麵包鋪，賣傳統港式包餅。有日行街路過，入去睇睇，麵包餅食色澤鮮明，而且售價便宜。菠蘿包、雞尾包、火腿蛋包、芝麻包、甜餐包、椰絲奶油包通通都係六元三個。 



擺到成間鋪都係，仲有蛋撻、香蕉糕、燒餅、雞仔餅。我入去果陣就有人買緊雞仔餅。鋪仔細細，不過好多野賣！

花多眼亂唔知買咩好，見咁平樣樣都想試。卒之買左一個懷舊銻兜純味蛋糕，9元個。三個芝蔴包，三個火腿蛋包。

原味蛋糕湯碗咁大，質地軟中帶微韌，有陣甜味，香味則稍淡。

 

芝蔴包大大個，芝蔴夠多，味道微鹹，香味較淡。

 

 

火腿蛋包細細個，裏面有塊蛋有塊火腿。味道偏淡。 





平民包店薄利多銷，D包餅賣相唔錯，算係咁喇。小市民志在醫肚，唔會苛求，真係要多謝店主服務大眾。相信店主都係辛苦經營，間鋪如果唔係自己買落，睇怕都幾難捱貴租。

 

 

 

鹹肉排骨棠菜豆腐黃豆湯 Salted Pork Green Vegetable Yellow Bean Soup

自從雅虎網結束後，我到而家都未能暢快地寫網誌。

谷歌網並不user friendly，我都唔知佢搞出三個頁面成日轉來轉去做乜。

我又唔得閒慢慢去研究。而且佢同我部電腦既設定唔夾，我今日就傳極都上傳唔到相片。 在網誌區內又打唔到中文！

我呢個湯「鹹肉排骨棠菜豆腐黃豆湯」就轉貼左去隨意窩網站。

其實隨意窩一樣唔係好好用，不過好過谷歌少少。

果邊係台灣既網站，睇怕台灣人未必睇得明我D廣東話。

真係冇法子！

肥哉廚房隨意窩網址已搬家完成喇！

各位網友：

我將六百幾篇舊貼文搬去隨意窩，已經全部搬完喇！大家如果有興趣睇番我既舊貼文，請去隨意窩。網址係：

http://blog.xuite.net/fatjoykitchen/hkblog

而家搞出個兩頭住家，我都唔知點算。我可能會兩邊都試用下，鍾意響呢邊煮，鍾意又可以響果邊煮。現實世界我個廚房好細，而家網上有兩個廚房，真係發夢都估唔到呢！

谷歌呢邊個廚房，我上載資料好唔方便，個網站同我部電腦同埋IE瀏覽器既版本有衝突，成日都無法上傳資料，真係激死。我下個星期會去隨意窩果邊試下。

哈哈哈！希望大家繼續多多指呀！

肥哉

有冇人教下我點樣將yahoo的貼文搬黎呢度呀？

Yahoo幫我「輕鬆搬家」搬左去台灣個隨意窩。但係隨意窩個style我唔係咁鍾意。
我鍾意呢度多D。
你地點將yahoo既內容搬黎呢度架？唔通要逐篇逐篇搬？？我有六百幾篇呀！

游水石斑 Swimming Garouper

某日去晚飯，等位時睇到缸裏面既游水石斑，呢種魚其實好靚。睇佢體型優美，動作從容，儀態閒雅。。。可惜已成待宰之囚，一嘆。

買菜冇葱送 Buy Vegetable Without Green Onion

唔係掛，買斤菜芯冇葱俾？話說我響街市某檔口買左斤九元斤菜芯，果位菜檔姐姐入左菜入膠袋就放響度停晒手。

我企響度等葱，見佢有反應，就話：唔該俾條葱丫。點知佢好似放慢鏡咁，仲口Up Up話：買十元以下冇蔥俾喇。極不願意咁就搣左呢條蔥塞入個膠袋度。

我忍唔住話：唔係下麻！駛唔駛咁呀！以後都唔會再幫襯。

唔知你地有冇相同遭遇呢？

肥哉隨意窩試貼文

各位老友記：

肥哉搬左黎呢度實個幾月，不過我仲係等緊佢「贈送空間」，而家仲係「贈送空間中」。唔想令各位以為我失左蹤，所以試貼一文。

呢度似乎係台灣朋友睇多，香港老友記唔知慣唔慣。我都好煩，google個網我又貼唔到相又唔可以自動搬過去，呢度又好似空間有限。真係俾個也虎玩死。

你地見字就俾個回應我啦！

肥哉字

各位老友再見喇！Goodbye my good friends!

各位支持肥哉既朋友，幾年來好多謝你地黎睇我個網誌，無論你地有冇留言，我都好感謝！
你地既光臨，係我繼續落去既動力。我已在google開左個「肥哉廚房」網站http://fatjoyskitchen.blogspot.hk/，不過我唔係好識用google blog，我會慢慢適應。
我可能會將所有舊post搬去隨意窩，因為yahoo話可以全部幫我地搬過去，似乎好方便。如果我搬去隨意窩，個名都會用「肥哉廚房」。

我大後日就會㩒制「匯出資料」，下星期呢隻度就變左唯讀模式，即係唔可以post野又唔可以留言，只可齋睇。所以而家通知各位，加油加油、朱媽媽、半日安、莎莉、tdk Tang、美國既Mr.Yu、Angela MY等等等等各位網友(冇打你名唔好見怪)。。。。。。好多謝你地呀，我地後會有期喇！

肥哉祝大家開開心心，萬事如意，食得是福，身體健康！！

我響Google開左個新Blog

Yahoo提供既合作平台係Xuite隨意窩，你地會搬去嗎？

有冇好提議？其他網站又唔知Yahoo搬唔搬到去。

搬左既網友仔俾下意見。。。。

我唔係好鍾意個隨意窩。改為登記左個肥哉廚房google blog. 地址係：
http://fatjoyskitchen.blogspot.hk/

去探下我啦，乜都要由頭黎過，真係費時失事。

搬去邊好呀喂？

業主收樓喇！
各位網友仔，你地諗掂搬去邊未呀？Yahoo話有「輕鬆搬家」服務喎，通知佢新網址服務喎。
唔知點服務法呢。
總之就係要搵定地方啦，有咩好提議？我地可以一齊搬去果度咪又傾過囉。

譚公道食肆 Tam Kung Road Eating Places

你數唔數到有幾多間食肆？

邊個招牌最有型？
。
。
。
。
。
。
。
。
。
。
。
。
。
。
。
。


倫記車仔麵 (24小時營業)
新南風飧(餐)廳
榮豐粥麵茶餐廳 (24小時通宵營業)
慶發飯店
合隆牛什專家 (馳名牛什、原汁大腩、新鮮草肚、孖筋金肚)

「金肚」我估係「金錢肚」掛，乜野係「草肚」？查查維基百科：

牛胃(香港通常把牛的四個胃稱為:草肚、金錢肚、牛百頁和牛沙瓜)

呢條直頭係食街黎。

添飯 More！

呢間飯店個名起得好！中英都好！

所謂simple is the best，我認為就係咁解。

趁條馬路清晒場，即刻影一張。

搵日要黎試下！

三用梳打粉 Pure Baking Soda For Baking, Cleaning & Deodorizing

我少見多怪。呢盒「手瓜斧頭牌」梳打粉都夠神奇，可以用黎局麵包，可以用黎醫胃病，又可以用黎洗廁所除臭。



我記得以前響雜貨鋪買過盒係全英文美國製。而家多左簡體字。

三合一你話係咪正先。咁你會點用呢？

我就唔敢用黎整包同當藥飲，所以就用黎洗野。



果然潔力強，灑少少，用濕布卒兩卒，廚房油漬污漬清走晒。



跟手用黎洗浴缸同坐廁，因為同廚房無關就唔多講喇。

唔知有冇人試過用黎整包整餅呢，阿「加油加油」你敢唔敢試呀？

上網查一查，原來大有來頭，個使用說明檔有二十幾頁，可以稱得上係萬能粉。

白糖糕個籮？The LOR For White Suger Cake?

果日逛逛下逛到間食品製造廠門外，見到地下放左六個咁既野。

唔知叫咩野，有冇人知呀？總之知佢係用黎放白糖糕。

就咁劈響地唔知係咪舊得滯唔要既呢？

話時話白糖糕都幾有型，點解係要咁樣放？同埋白糖糕唔知點切既呢，成底都切好左好整齊可以逐件賣。