傳統圖案筷子套 Chopsticks Wrapper With Traditional Graphic Design

同朋友去某食店晚餐，無意中發現呢款結婚酒席用筷子套。



龍鳳呈祥紅雙喜圖案，再綑如意邊，非常傳統。



後面竟是用英文介紹How to use chopsticks，其實而家好多中國後生人都未必識渣筷子，不妨學學。



呢D傳統圖案，其實好有睇頭，呢個紅雙喜都好靚架。

陳腎瑤柱花生豬骨粥 Dried Duck Kidney, Scallop, Peanut And Pork Rib Congee

用電飯煲煲粥真係方便，屋企食唔晒飯，就咁原煲加水就可以煲粥。

又唔會煲瀉，真係最岩懶人。



用左兩個南京大鴨腎，七粒瑤柱仔，四塊唐排，兩片陳皮，一撮花生(冇入鏡)就煲好呢個粥。

鴨腎拆埋肉，就更方便食啦。

冰廳紙袋 Paper Bag Of An Ice Cafe

買麵包，用紙袋莊，好平常。不過你地有冇留意個紙袋呀？

呢間冰廳用既紙袋，仍然沿用舊式圖案，西餅配熱飲西茶！而家係買少見少喇。以前既食物包裝圖案設計，係好有風味，同而家好唔同！

豬膶肉片刀削湯麵 Sliced Noodle With Pork And Liver In Soup

去裕華行左轉，發現有好多台灣食品賣，買左包刀削麵，七個裝十九元包。


買埋豬膶肉片，放湯整左呢一大碗豬膶肉片刀削麵。
我既做法如下：

1) 刀削麵兩個，用滾水煮至八成透心熟，過冷河備用。
2) 豬膶肉片醃好，醃一小時以上。
3) 豬膶慢火焯至九成熟，然後過冷河將「潺」洗走，清洗乾淨。


4) 燒熱鑊，落油，薑片，爆炒肉片，炒至九成熟。放入豬膶爆炒，贊酒炒至全熟。
5) 另燒大滾水，落薑片、魚露、鹽、雞粉、糖煮滾，放入約三分二肉片煮一陣至出味。


6) 將刀削麵放入肉湯內，煮滾，熄火局一陣，俾麵吸收湯汁。
7) 然後落三分二豬膶，煮滾麵湯即可用大湯碗盛起。


8) 最後放入餘下三分一肉片和豬膶在麵上，再灑上大量蔥花薑絲即成。

滑滑闊闊刀削麵，口感獨特，食得開心！

罐頭篇8：紅燒豬肉 Canned Food: Stewed Pork Sliced

哎也，真係嚇死人，肥到咁，油淋淋三十度室溫都擎晒油，食完真係即刻要去通波仔。



呢種中國罐頭真係好有懷舊Feel，選料仲係停響六十年代。那時，有得食豬肉已經不得了。平民所謂食豬肉，就等於食肥肉食豬膏。

見到呢罐野，感覺就係時光倒流五十年。呢罐共有四大舊肥豬腩肉，係好豐富既一餐了。



有冇人敢食丫，我地將佢蒸熱，淨係切左D瘦肉食，得丁多瘦肉。其他就變晒廚餘。

味道就好好，好惹味。

沙薑雞腳 Zedoary Chicken Feet

呢碟沙薑雞腳唔係要黎做送，係用黎做零食架。

唔係用黎送飯，係用黎楂住咬，咬入晒味既筋腱軟骨，當然仲有滑而不膩既皮肉啦。

食下一隻，食下一隻，好快就食到一碟都係骨。

咬雞腳又係我兒時回憶，諗起細個放學後，去街邊幫襯賣鹵味既小販，其中一味就係橙色一隻隻既雞腳。

買一隻都有交易，小販用紙包住雞腳長骨部分，露出腳掌，就搋俾你。然後我就自己搽豉油，搽甜醬，搽芥辣醬，就咁響街一路咬一路番屋企。

而家橙色既雞腳好少見到，橙色外皮既豬大腸仲成日見。

講番呢碟沙薑雞腳：



材料：
1) 新鮮雞腳八隻15元。
2) 沙薑粉一包2.5元。

做法：
雞腳用慢火慢滾出水，要慢火，盡量唔煮爛煮爆腳皮。過冷河，剪去指甲。另外用大半包沙薑粉、冰糖、魚露、八角、薑片、鹽、玫瑰露酒，加入約半鑊清水中煮滾。
加入雞腳，再煮滾轉慢火，保持在微滾狀態，煮至收水成汁，雞腳筋腱軟骨開始轉稔身即可撈起。
用乾淨鑊，落少少油，加入餘下沙薑粉爆炒之，再加入適量煮雞腳汁，煮成炒薑濃汁，淋在雞腳上即成。



我覺得呢款雞腳要凍食先過癮，所以我會攤凍佢再放入雪櫃。食時要用手拎住咬，慢慢咬開關節，品嚐皮肉筋腱軟骨之美味。咁仲邊得閒爬飯丫，所以呢味野唔係用黎送飯既，而係一味助興小食！

浸梅酒(九十天) Plum Wine (90 Days)

樽梅酒唔經唔覺已經浸左三個月，上次落既一百克冰糖早已經溶晒，酒既色水都幾靚。



今日又落多一百克冰糖，而家總共落左二百克。酒液已經上到樽頸，睇怕唔可以再落糖喇。

蠱惑廚房紙 Cunning Kitchen Paper Towel

一睇就知邊個出蠱惑。

你地有冇用廚房紙既習慣？我家一向都有買開S牌，但係我發覺香港代理既兩卷或四卷裝S牌廚房紙，價錢最貴，但係越黎越輕身。

中間個筒心直徑明顯加大左，即係紙量就少左啦。近年想攻佔市場既V牌，同樣係四卷裝，份量就明顯比S牌足秤好多。



比較之下，V牌↑個筒心直徑係4CM，卷紙拎起有墜手感。



S牌↑就係4.7CM，用肉眼都睇得出明顯分別，拎上手輕升升。S牌早佔市場，價錢貴但係而家出呢D蠱惑技倆，遲早自食惡果。



睇下進口S牌外國原廠大卷裝↑，個筒心直徑仍然係4CM，卷紙拎上手厚重老實。

好心呢度做生意就老實D啦，唔好以為僱客係羊牯啦。呢種情況同樣出現係圓筒形廁紙上，
而家D廁紙越黎越細，個筒心越黎越大，超快用完，仲以為係自己食得多痾得多所以用得多。唉，真係奸！奸！奸！

臘腸炒甜豆 Stir-Fried Chinese Sausage Slices And Sweet Pea

今日清理雪櫃，發現仲有兩條臘腸未食，未來想掉左佢，但係見佢仲好鮮明，唔應該浪費，於是就炒左呢碟臘腸炒甜豆喇。



臘腸條半切片，甜豆半斤搣好絲。燒熱鑊，落油，先轉細火爆炒臘腸，炒至轉色出油微焦即兜起。



原鑊落薑、蒜爆香，落甜豆轉大火爆炒，贊水、酒，炒至八成熟。



臘腸回鑊，中火快炒，炒至兩樣都全熟，埋獻試味上碟。

紅紅綠綠，增加食欲呀！

羅漢雞翼 Poached Chicken Middle Wings In Dried Grosvener Momordica Fruit Soup

呢個唔係豉油雞中翼呀，一滴豉油都冇落架！



雞翼係最平凡既食材，羅漢果都係煲湯常用材料，有冇試過將呢兩樣合埋一齊呢？

平凡加平凡就等於不平凡啦，呢款「羅漢雞翼」超好食喎！



去「樓上」行左一轉，真係大開眼界，可以近距離睇清楚各種藥材同中草本食材，呢個店鋪設計真抵讚，一早應該咁啦！

果D乜乜堂物物堂如果仲唔思改進，市場俾人搶走絕唔出奇。

樓上D野其實幾貴，因為包裝較大，花費就較多，不過勝在包裝企理討好。買左六個羅漢果，都幾靚。今次用黎整羅漢雞翼，搞搞新意思！



材料：

1) 羅漢果一個  2) 雞中翼八隻  3) 陳皮一角  4) 八角一粒  5) 薑片兩片  6) 冰糖三小粒

做法：



1) 雞中翼解凍後，落鹽、紹酒醃過夜。
2) 羅漢果破開沖洗乾淨，捏成小塊。
3) 陳皮浸洗乾淨



4) 用鑊燒滾水，放入羅漢果、陳皮、八角、薑片，再煲滾，轉中慢火煲至湯液轉深啡色，羅漢果出味。
5) 將雞中翼放入羅漢果湯液中，熄火加蓋浸十分鐘。
6) 十分鐘後，撈起雞翼，加入冰糖，再煲滾湯液，又放入雞中翼，熄火加蓋又浸十分鐘。



7) 重複以上5)6)直至將雞翼浸熟。
8) 上碟，放涼即可進食。

好味！雞翼充滿羅漢果獨特既「回甘」甜味，同豉油雞翼完全唔同架！

就黎食唔起既飯麵 Rice And Noodle Dishes That I Can No Longer Afford To Order

碟福建炒飯賣相唔錯，蛋炒飯底，上面淋上濃汁，材料有翠玉瓜、紅蘿蔔、冬菇粒、雞粒、帶子粒、瑤柱絲。好好味。



碟蟹肉燴伊麵色水就麻麻，上面淋上玻璃獻，材料有銀芽、磨菇、韭黃、蟹腳肉、蛋白。味道比較淡，但蟹肉尚算清鮮。下面既伊麵色水較淡，可能冇乜落豉油啦。



三個人去某公屋屋邨內酒家食晏，冇去一排，隨便叫左呢兩碟野：福建炒飯同蟹肉燴伊麵，埋單先嘩左一聲，俾埋加一同貼士，用左兩張紅衫魚。

三個孤寒鬼，睇下單，福建炒飯同蟹肉燴伊麵，都係78元一碟。食完先牙痛咁聲。喂，人地真材實料喎，帶子、瑤柱喎，真蟹肉唔係蟹柳喎。

我都知，不過連埋加一成八十幾元碟，唔係平民草根可以輕易負擔得起喇，下次要去茶餐廳喇。

番茄牛肉炆關廟麵 Braised Guanmiao Noodle With Tomato Paste And Beef

關廟麵號稱煮唔爛，最岩用黎炆。

食剩一個大番茄，買埋牛肉，就整左呢碟番茄牛肉炆關廟麵。

做法好簡單。先醃好牛肉，醃佢一個鐘以上要入味。番茄切碎。關廟麵先煮開再過冷河。



燒熱鑊，落油，落薑片，落牛肉爆炒至轉色兜起。原鑊落番茄，加水煮至番茄溶成茄醬，調味，落牛肉再煮一陣。

煮成一個番茄牛肉濃汁。

最後落關廟麵，拌勻炆至開始收汁，再落芫茜。

炆煮至麵全部吸收醬汁，即可上碟。



分開一人一碟，三扒兩撥已經食晒！