沙薑雞腳 Zedoary Chicken Feet

呢碟沙薑雞腳唔係要黎做送，係用黎做零食架。

唔係用黎送飯，係用黎楂住咬，咬入晒味既筋腱軟骨，當然仲有滑而不膩既皮肉啦。

食下一隻，食下一隻，好快就食到一碟都係骨。

咬雞腳又係我兒時回憶，諗起細個放學後，去街邊幫襯賣鹵味既小販，其中一味就係橙色一隻隻既雞腳。

買一隻都有交易，小販用紙包住雞腳長骨部分，露出腳掌，就搋俾你。然後我就自己搽豉油，搽甜醬，搽芥辣醬，就咁響街一路咬一路番屋企。

而家橙色既雞腳好少見到，橙色外皮既豬大腸仲成日見。

講番呢碟沙薑雞腳：



材料：
1) 新鮮雞腳八隻15元。
2) 沙薑粉一包2.5元。

做法：
雞腳用慢火慢滾出水，要慢火，盡量唔煮爛煮爆腳皮。過冷河，剪去指甲。另外用大半包沙薑粉、冰糖、魚露、八角、薑片、鹽、玫瑰露酒，加入約半鑊清水中煮滾。
加入雞腳，再煮滾轉慢火，保持在微滾狀態，煮至收水成汁，雞腳筋腱軟骨開始轉稔身即可撈起。
用乾淨鑊，落少少油，加入餘下沙薑粉爆炒之，再加入適量煮雞腳汁，煮成炒薑濃汁，淋在雞腳上即成。



我覺得呢款雞腳要凍食先過癮，所以我會攤凍佢再放入雪櫃。食時要用手拎住咬，慢慢咬開關節，品嚐皮肉筋腱軟骨之美味。咁仲邊得閒爬飯丫，所以呢味野唔係用黎送飯既，而係一味助興小食！