新春小炒之「五福臨門」Chinese New Year Stir-Fried Dish "Five Happiness"

 

我家食得最多齋既日子就係新年時，行政總廚新年除左整糕，就最鍾意煮齋。
食得太多魚魚肉肉，整番碟齋菜真係唔錯！

 

 

呢味新春小炒五福臨門，即係炒五樣：荷蘭豆、雲耳仔、粟米仔、小蠔菇同埋紅蘿蔔。
 
今次用既廚具係熟鐵鑊一隻，要佢既鑊氣。

 

 

做法：
1） 先將材料除小蠔菇外洗淨，雲耳浸軟，荷蘭豆搣絲，紅蘿蔔切幼條，粟米仔一開三。
2） 所有材料除小蠔茹外，逐一放入油鹽滾水灼至七成熟，過冷河瀝乾水。
3）落油入鑊，燒熱，放入薑片，先爆炒小蠔菇，贊少少酒。再將所有材料入鑊，大火顛炒，將材料炒熟，埋獻收汁上碟。

小炒五福，反樸歸真，樣樣各具美味。呢碟新春小炒要慢慢食，嗒真每種材料既天然真味！清、爽、甜，加埋熟鐵鑊既鑊氣，簡簡單單已好好食！