早有預謀留起左少少自家製叉燒，用黎整番碟叉燒煎蛋。
打開雪櫃，剩番兩隻雞蛋，一隻鹹蛋，一於就煎鴛鴦蛋啦。
材料：
叉燒適量。雞蛋兩隻。鹹蛋一隻。蔥適量。
做法：
1 叉燒切小三角塊，落鑊爆香備用。
2 鹹蛋蛋白混合雞蛋，打勻備用。
3 鹹蛋蛋黃蒸熟，壓碎，落鑊用少少油細火炒溶備用。
4 蔥切粒備用。
5 將以上1至4混合。
6 燒熱鑊，落適量油，傾入5。此時可決定炒滑蛋定煎蛋，炒滑蛋即快炒至蛋液剛凝固就上碟，不能見焦。煎蛋則煎至兩面金黃微焦才上葉。
呢碟煎蛋，就咁睇未必睇得出有鹹蛋，食落就發現蛋味鹹香，同一般煎蛋唔同。
肥哉焗叉燒第二版之：蜜汁肥叉
唔忿氣點都要買番舊肥脢頭，再焗一次。
做法同蜜汁瘦叉一樣，只係將針扒換左脢頭，將蜜汁加倍。
舊脢頭買左38元。
我已經要左舊肥既，但係肥瘦唔夠均勻，唔知係唔係最岩做肥叉既脢頭一早已經留俾燒臘鋪，又或者俾燒臘檔買起左呢？
我個焗爐焗肥叉中。。。
肥叉出爐喇！
伙記，黎一碗肥叉飯加色！
脢頭肥叉好食過針扒瘦叉，冇得傾。我已經加倍落蜜汁，仲係唔夠甜，燒臘檔D叉燒真係落好多糖架！
買左個焗爐好少用，驚佢發霉，今日點都要開下佢，學人整下叉燒先。
去街市本來買脢頭豬肉架，但係去到幫襯開既肉檔，我話想試下整叉燒，佢就介紹我買「針扒」。我見到一大舊瘦肉，同腦海中果碟製成品「肥叉」差好遠。不過又試下啦，切左一舊33元。於是本來諗住整肥叉，變左整瘦叉，健康D唔食咁肥都好既。
屋企有用剩既一大樽麥芽糖同叉燒醬，可以慳番自己調醃料既時間。
將舊針扒切開三條，洗乾淨就落少少鹽、雞粉、兩湯匙叉燒醬醃佢，朝早放入雪柜留番下晝整。
以下方法係響網上學番黎，火候時間冇完全依到足，差唔多啦：
預熱焗爐220度10分鐘。
焗盤同鋼格都包上錫紙，鋼格錫紙篤窿用黎流汁，焗盤裝住D汁，鋪上錫紙可以容易清潔。如果唔係整完有排清理。
放上豬肉，放入焗爐220度焗15分鐘，然後翻轉再焗15分鐘。
然後取出搽勻麥芽糖汁，再入爐每邊都焗5分鐘。
取出攤凍切片，就係一碟「瘦叉」喇。哈哈，都幾似模似樣喎。
針扒肉食落係腍瘦而不太鞋，帶少肥，有肉味。我落左成兩匙蜜汁，都唔夠食開既叉燒咁甜。整過先知燒臘檔既叉燒落左好多糖，係又肥又高糖既野黎，自己整可以控制調料，可以食得健康D。
材料：
冬菇八隻。髮菜一撮。雪耳一朵。花膠一隻。翠玉瓜一個。
準備：
冬菇浸洗好，剪去蒂。先行炆好，(做法同平日炆冬菇一樣)再剪成角粒。
髮菜浸洗乾淨，用油省過備用。
雪耳浸洗好清除硬物，摘細朵備用。
花膠隔一兩日前先浸發好，剪成麻將大小備用。
翠玉瓜切厚片再切大角粒。
炆的步驟：
一、先燒熱油鑊，落薑爆香，落翠玉瓜爆炒，晒少少鹽，將翠玉瓜炒至五成熟上碟。
二、原鑊再燒熱，落雪耳爆炒，贊少少酒、水將雪耳炒透。
三、放入冬菇，加水、加入髮菜、蠔油炆之。
四、炆至汁水略收，加入花膠，再加水或雞湯加蓋炆約15分鐘。
五、此時汁液漸收，加入翠玉瓜，兜勻，埋獻試味後，即可上碟。
花膠有益對皮膚好，但係都幾「膠口」，所以我加入「爽口」既雪耳同翠玉瓜平衡番，用冬菇同蠔油提味，效果都唔錯架。
呢碟野主角雖然係花膠，但係食落最好味既唔係佢，你地想像下邊樣最好味？
冬菇？翠玉瓜？雪耳？髮菜？
溫室翡翠豆苗一包13.9元。
用黎炒既靚牛肉20元。
薑絲適量。
牛肉用糖、生抽、蠔油、水、油醃勻至入味。
豆苗洗淨瀝乾水。
先用溫油泡炒牛肉，牛肉落鑊略兜即可熄火，撈起備用。
大火再燒熱油鑊，落薑絲，落豆苗快炒。
牛肉回鑊兜勻，贊酒，埋獻略收汁即可上碟。
豆苗都幾爽脆好食，炒時記得要落薑絲紹酒擘走豆腥味。牛肉香滑又帶咬勁，好味！
芙蓉蛋聽落平平無奇，但係要響住家整，就屬於麻煩菜式，因為要買呢樣果樣料，立立雜雜，樣樣要丁朵，越想多料越麻煩，整過你就知味道。
材料：
蛋、叉燒、火腿、銀芽、韭黃、蔥。
做法：
四隻蛋打勻，放入鹽、糖調味，仲可以按個人喜好加入雞粉、麻油、魚露等等。
銀芽用薑起鑊炒香索乾水備用。再爆炒叉燒同火腿絲，炒至微焦香備用。韭黃唔駛炒。再將所有材料混合蛋液。
落油燒熱鑊，傾入蛋漿用慢火煎至兩面金黃而內裏剛凝固。
趁熱裝一大碗飯，落D煲仔飯甜豉油，配清茶一杯，就係一餐晏晝飯啦！
整飛碟都係貪好玩得意，如果唔享受整既過程，就咪制呀。因為都好煩下架。為左整呢四隻飛碟仔(叉燒酥餡)，要做齊以下功夫：
一、摷番架飛碟機出黎，大大話話呢架野買左有四、五年未用過喇。
二、買方包，我買左蜜糖方包，成色靚D架。注意要買未裁邊方包，自己裁，裁左邊既多數都細得滯。其實只係要四塊，但係起碼要買八塊。
三、買叉燒，唔好意思淨係買10元，結果買左一條，要27元，其實只係用丁朵。
四、買叉燒醬，只係要一羹，但係要買成樽9.9元。想話買一包仔，一買要買三包，仲要十幾元，結果都係買左一樽，呢樽野用完呢次，睇怕有排都唔會再用。
五、買生菜，只係想用三幾塊放響碟底做裝飾或者包住飛碟黎食，當然要買成斤啦。
六、買洋蔥，只係要用小量，當然要買成個啦。
整完四隻飛碟仔，有大把剩餘物資，仲要收拾、清潔現場，你話係咪好煩，如果處理不善，仲好唔環保添。所以，想買飛碟機既朋友，要諗清楚呀。
做法：
一、半個洋蔥切幼條。叉燒適量剪粒備用。
二、用易潔鑊落少少油，先爆香洋蔥，放埋叉燒粒落去，再落一羹叉燒醬，再落大約半碗生粉+麵粉+水，將全部野攪勻，煮至洋蔥腍身，汁料杰身即可熄火。
三、打開飛碟機，底座先放上剪裁好既方包，再放入餡料，用D汁液搽下四邊，再覆蓋方包，關上飛碟機，烘至紅燈熄了即成。
四、伴生菜食清新D，冇咁熱氣。
飛碟仔個樣又真係幾靚，食落仲好好味添！
補記：清潔部機時先發覺D餡擺錯左對角位，好彩都整到似模似樣。
