黃花魚肉厚嫩滑，骨少，無論煎、炸、蒸、炆都好好味。今次我用檸檬汁、鹽加少少花椒粒做主要醃料，整咗呢碟檸汁花椒煎黃魚。
煎好上枱開飯，斬下眼成條魚食剩棚骨！
材料好簡單：買咗條一呎長黃花魚，27蚊。一個檸檬、少量花椒、鹽、糖。
黃花魚必須處理好，將肚內黑膜完全清除，通常街市魚販都唔會清乾淨，買返屋企一定要清走晒所有黑膜同殘留的內臟同紅啡色嘅血塊。清除乾淨後如上圖所示。
此時加入較多的海鹽同鮮檸檬汁將魚搽勻，再將檸檬碎放入魚肚內。（我冇落紹油同薑，唔想味道太複雜。）
灑上適量開邊花椒粒，再落少少糖平衡下鹹酸味。將魚用保鮮紙包好，放入雪櫃最少醃半日，最好醃過夜。
醃至入晒味後，用廚紙徹底將魚內外索乾就可以煎。我用既廚具係區利昌生鐵鑊，燒熱加較多油。油熱後放入黃花魚，轉中小火慢慢煎。要煎至魚身變硬定型先可以轉動條魚。
將魚反轉再煎，煎至兩面金黃色，聞到香氣四溢！
煎幾耐、煎幾燶無定準，隨個人喜好。煎至合心水焦度，瀝乾油就可以上碟喇！
嘩香噴噴，趁熱開飯喇喂！
***Please leave your feedback, thanks!***
