沙葛韭菜花炒鹹肉

琴日屋企煲湯，買左一大舊「不見天」，唔用得咁多，我切左一忽將佢醃鹹醃過夜，今日用黎炒沙葛韭菜花。

先將鹹肉蒸熟，然後切片備用。肉汁唔好倒，用黎炒時贊入鑊。

沙葛同韭菜花切好，燒熱鑊，落油，落薑片爆香，落沙葛炒至半透明，落韭菜花，贊汁大火快炒。

落鹹肉片，全部兜勻，贊酒埋個薄獻，即可上碟。

沙葛同韭菜花都係爽口野，又帶少少甜味，同韌韌地既鹹肉可以互補，都幾得意啦。