環保雞粥

你地煲雞粥係咪專登去買雞黎煲架？我屋企就好少咁做，煲親雞粥多數都係「環保式」，將琴晚食剩既料第二日用黎「循環再用」煲粥，唔好浪費食物呀。

琴晚阿媽整左白切雞，又煲左菜乾陳腎豬肉湯。雞呀、陳腎呀、豬肉呀都食唔晒，阿媽想話倒左佢，我話唔好，聽日用黎煲雞粥啦。

於是就整左成煲雞粥喇。粥底係用一半白米加一半糙米煲架。如果琴晚食剩飯，用黎煲呢個粥，仲環保呀。