鴨掌炆鮑魚蝦子麵 Braised Duck Feet Abalone Shrimp Egg Noodle

屋企有好多乾麵餅，有D係自已買，仲有D係過年時人地送既。

今日屋企唔食飯，要清咁D存貨。

整咩好呢？記起有次出街食過款鮑汁鵝掌炆生麵，於是就憑記憶試下整啦。

鵝掌太貴，用鴨掌代替，六隻八元。先出水，修剪好，用八角蠔油紹酒老抽慢火炆佢兩個鐘以上至夠腍。

阿一鮑魚麵三個，用清水加少少油炆煮至收乾水。唔駛調味，麵餅已用味湯製過。

將麵轉落呢個預熱可愛煲仔，圍兩條生菜，鋪上鴨掌，淋上炆鴨掌汁。



加蓋燒一陣至微芝芝聲，開蓋，嘩，話咁快又搶食一空喇！

日本南部鐵瓶 South Japan Cast Iron Kettle

呢排忙到嘔電，睇怕要忙到復活節之後先會得閒少少。所以冇時間煮野食喇。

黎人呀！沙煲罌撐個個排好隊，同我逐個上場頂住檔先！

打頭陣既係呢個日本南部鐵茶壺，寬扁平圓底，無論用明火或者電爐都適合架。

煲水沖茶，水質聽講正好多，仲可補充身體鐵質咁話。

呢個叫「平丸正形櫻」，矮扁平圓底，全身灑滿櫻花瓣圖案，幾有型架！

黎多幾張特寫：

煲完水個底滾熱辣，又平又大，可以做燙斗！

冷水瓶 Cold Water Bottle

上次買罌廣西三蒸酒，話諗起兩樣野，另一樣而家開估。其實主要係俾佢個樽吸引！佢令我諗起細個時屋企一款家品，就係冷水瓶。冷水瓶以前屋企撞崩坎裂淥爆過好多個，老媽子一個都冇留低。

童年時印象中既冷水瓶，全個用玻璃造，係個長嘴大肚罌，瓶身刻有暗花，「瓶蓋」其實係一隻高身玻璃水杯，都雕有暗花，覆蓋套住個瓶嘴。

要斟水，就拎起個杯形「瓶蓋」，可以就咁當水杯用。

果時人既設計都幾聰明架，而家呢款冷水瓶我搵唔到了。

果個三蒸酒瓶，我一睇見就俾佢吸引，真係醉翁之意不在酒！佢個嘴唔係「羅絲」嘴，更加似個冷水瓶。

再加番隻玻璃杯做蓋，真係fit晒。



唯一不足之處係，個酒瓶造得好粗糙，玻璃唔夠平滑。冇法啦，因為佢預左你飲完酒就掉！

士多啤梨浸酒一個月 Strawberry Wine One Month

上個月浸左一樽士多啤梨酒，而家就係咁樣。

今日將酒過濾，取出酒渣就係咁樣。

酒味都算OK，不過雙蒸都幾「辣」，果味同甜味都不足。

於是再買盒美國長柄士多啤梨，再加多冰糖，兩片檸檬。

加料再浸佢一個月睇下點。

髮菜大蜆 Braised Clam Meat With Black Moss

買左斤半大花蜆40元，用黎炆髮菜，就係呢味發財大顯喇！

大蜆浸佢兩個鐘噴水吐沙，再蒸熟取肉，留起蜆汁，共有兩碗。




髮菜浸洗乾淨，再渣乾水，燒熱鑊落油，爆香薑片，落髮菜，再落蜆水慢火炆至軟身撈起。

再用蒜頭薑片爆香蜆肉，將髮菜回鑊再炆至收汁，埋獻即成。髮菜索晒蜆汁，超好味！