韭菜炒蜆仔肉

響街市魚檔買左兩包蜆仔肉，10元包。再同菜婆買左兩札韭菜3元。

呢個送好似好簡單，但係功夫都幾多。原因係包蜆仔肉有好多雜質，一定要啤水啤到乾乾淨淨。

啤左成半粒鐘，再揀晒D怪物呀，殼呀出黎，再用清水浸住，落兩湯匙白米醋浸15分鐘以上。

再瀝乾水，再落適量幼鹽同兩瓶蓋紹酒醃佢15分鐘，先可以備用。睇下幾白滑！

韭菜就好簡單，洗淨切長粒備用。

做法：

1 用白鑊，落兩片薑烘炒蜆仔肉至收水微焦香兜起。

2 炒韭菜粒，炒至七成熟就要兜起。

3 落薑粒、乾蔥粒、指天椒粒爆香油鑊，落蜆仔肉爆炒之，再埋個生粉獻(糖、生抽、雞粉)，炒至微乾身，熄火。

4 拌入已瀝乾水既韭菜粒，兜勻即可上碟。