食得肉多，要整番多D清淡有益既菜式。
黎個炒素三絲，三絲係：
1) 白背黑木耳，係降血脂聖物。
2) 西芹
3) 紅蘿蔔
主角係白背黑木耳，西芹同紅蘿蔔絲係配料整色水。
白背黑木耳浸軟，剪去硬蒂，切絲，再用鹽、糖、紹油、生抽、欖油撈勻醃一個鐘左右。
西芹、紅蘿蔔適量切絲。
先燒熱鑊，落油落薑片，先落白背黑木耳爆炒，贊水煮約十至十五分鐘，煮至收汁兜起。
爆炒紅蘿蔔幾分鐘後，再落西芹炒勻。
最後白背黑木耳回鑊，三絲炒勻，埋個薄獻收汁即可上碟。
睇真D，唔係乾炒牛河呀，係白背黑木耳，好爽口架。炒完睇下個賣相，可能改叫炒素三「條」岩D呀。
屋企成日食剩冷飯，你話點算好呢？多數都係用黎炒飯，呢次又食剩碗半，一於整個「蛋皮飯」啦。
買一細罐亨氏茄汁豆8.5元做伴碟伴飯汁。
先炒個薑米洋蔥粒飯底，清清地，只須落少少鹽。
再用兩隻蛋，煎塊蛋皮，蛋皮不宜太熟。
將蛋皮小心放落碟，再將炒飯放在蛋皮一邊上面。
覆上另一邊蛋皮，唔駛完全蓋上，要睇到裏面既飯，賣相靚D開胃D。
淋上茄汁豆，俾佢流到碟空出的一邊做伴碟伴飯汁。
灑上蔥粒即成。
嘩，好食呀，蛋滑飯香，又有茄汁豆食，又係唔駛一陣就搶食一空！
洋葱好有益架，聽講最好日日都食。平時最多食既係洋葱炒蛋，其他有洋葱做配料既菜式我都麻麻。咁今日洋葱唔做配料，做主角，先試下清炒洋葱啦。
兩個白洋葱加一個紫洋葱炒埋一大碟，就係一個送啦。
大自然天然構圖，真係好靚，仲令我諗番起以前讀地理既等高線圖添！
用欖油清炒，先落蒜片起鑊，再落白洋葱，再落紫洋葱，生熟程度隨個人喜好，最後灑少少幼鹽調味。
好清甜！
食左兩舊罐頭紅燒排骨，覺得都幾「漏」喉，想食番D青菜平衡下。
黎個灼油菜啦。菜心摘好只要菜薳部分。
用少少水，唔駛好多水，落較多油，落少少鹽、多少少糖，仲可以落少少梳打粉約細半茶匙，令菜即使灼較長時間灼腍D都可以保持青綠，唔鍾意就唔好落。
逐條排好上碟，可以就咁食，又可以落蠔油。如果嫌油多，梳打同蠔油又係化學野，鹽、糖味多，可以就咁清烚，會健康好多。
唔好誤會呀，呢個唔係咩功夫菜，只係水煮蝦子麵餅，煮都收乾水咁解乍。
呢個做法可以食到蝦子麵餅既原味，我已經試整過乾炆張榮記既蝦子麵，見呢度：http://hk.myblog.yahoo.com/fatjoykitchen/article?mid=3289
今次整既係北角振南製麵廠既蝦子麵。用適量清水煲滾，落少少油，放入麵餅煮至收水，收水程度隨個人喜好。
佢地既麵餅一個份量少D，兩個炆埋都係一隻中碟裝晒。
麵身都幾有咬勁，本身都夠鹹味，完全唔駛落其他調味，蝦子味淡左少少。
一向冇乜留意罐頭，屋企買左有時唔夠餸就會開。最近想寫下罐頭，開始留意市面賣既罐頭。
梅林一向係「名牌」，而家我先發現有兩家「梅林」。一家係中糧梅林(北京)，一家係上海梅林。兩家差唔多都出相同既罐頭，例如午餐肉、回鍋肉、竹筍等等，可說形影不離。都唔知以前細個食既梅林，係邊家，還是兩家都唔係。商場營運分分合合，我唔知咁多啦。某日響深水步某非名牌超市見到呢罐紅燒排骨，係中糧梅林生產，22元(我唔會格價，見到就買)，買黎試下。
由底開罐，係咁樣。
再反扣出黎，係咁樣。
蒸番熱，佢個汁係稀汁，足足有成半碗，唔係獻狀。味道偏甜，都唔錯。排骨係一字排，有大有細，一共有六舊。有瘦肉、肥肉、筋鍵、軟骨，味道同口感都唔錯。
呢味紅燒排骨全部係肉，而且比較肥，用黎加餸，配個灼青菜墊底應該更好。
梅林紅燒排骨每百克含65毫克膽固醇，多過榨菜肉絲一倍有多架。幾年前仲驗出有問題(可以上網睇)，都係要記住「少食多滋味」原則啦！
我知咁講一定俾大師傅鬧。其實平民煲湯真係幾容易，買好材料放晒入煲度煲三個鐘就飲得，而家有埋湯料包，就更加乾手淨腳。容易過炒送。
響惠記執左包湯料，有紅蘿蔔、粟米、椰子、海底椰、蜜棗、南北杏，企企理理，只係二十四元。
煲咩好呢，唔想成日煲豬肉。諗過煲牛腩，不過好貴，結果買左半邊雞28元。實行煲個4C湯----Carrot, Corn, Coconut 同 Chicken，哈哈！
如果怕肥，可以去晒雞皮。我唔想個湯一滴油都冇，所以只係去左一半雞皮。雞翼同雞髀都冇去皮。
將雞洗淨出一出水，湯料洗淨切好，全部放晒入瓦煲內，先大火煲滾，再校慢火煲三個鐘以上。
根本唔駛調味，已經好清甜。可以落少少鹽平衡下，更好飲。
湯渣可以點豉油食，紅蘿蔔、粟米、椰子都好食。雞煲到綿軟，入口即化開。
走左去北角一轉，響春秧街有幾間粉麵廠，幫襯左兩間買蝦子麵餅，可以比較下。
一間叫雙喜粉麵廠，我買左一斤皇牌蝦子麵(幼麵)，42元，有十個。
一間叫振南製麵廠，我買左一斤蝦子麵(幼麵)，50元，有十五個。
雙喜既麵長身而厚，所以重稱D。振南既麵圓身而薄，輕身D，各有特色。
未試食呀，而家好飽，遲D先試味！
而家開始明白D鋪頭賣炒飯，名堂多多，例如：富貴炒飯、大班炒飯、錦繡炒飯等等等，因為料太多，如果樣樣都講明，就會好似我呢碟炒飯咁，個名太長。
叫佢瑤柱蛋白炒飯，又好似漏左好多料。咁你話改個乜名好呢？唔通又叫肥哉炒飯？
五種料，或者可以叫五福炒飯啦。
瑤柱先浸軟，搣去韌物，撕成幼絲備用。
幼身芥蘭幾棵，將莖切成圓片。
欖豉洗淨剪碎備用。
蝦仁適量洗淨去腸啤水備用。
燒熱鑊，落油爆炒瑤柱，贊水贊油炒散炒熟，再落蝦仁炒至八成熟上碟。
再先燒熱鑊，落油、薑粒，炒蛋白，再落飯炒勻。炒到咁上下撥埋一邊，落少少油炒蘭度，再爆香欖豉，炒勻。
將瑤柱絲同蝦仁回鑊，全部炒勻，再落芫茜同蔥粒，炒至乾身調味上碟。
加左欖豉，鹹中帶甘甜，既有蛋白清香，又有芫茜同蔥香，更有蝦鮮味，蘭度又增添清爽，正！
一輪狂風掃落葉，斬下眼就食清光。
罐頭食品不起眼，其實同我地既生活息息相關。屋企都常備一D罐頭看門口。由今篇開始，我會不定期寫下罐頭。
第一篇想寫既係呢隻梅林牌既榨菜肉絲。佢最有特色既地方係「二合一」式既上下罐連體設計。
上面係榨菜，下面係肉絲。
食時分別由頂同由底開罐，再將榨菜同肉絲撈勻。咁樣就唔會令到D肉絲因為長時間同榨菜放埋一齊而變得太鹹。呢種設計真係抵讚。
味道都好唔錯架，榨菜夠爽口，夠鹹而不太鹹。肉絲帶少少肥，雖然不免有D鞋，但有肉香，同榨菜好夾味。
百記賣12.5一罐，佳記賣11.9一罐。十零蚊可以慳返自己買材料整既時間，都算係超值啦。
撈勻蒸一蒸趁熱食，好味。
用黎配上海湯麵，偷懶唔煮飯，間中食下都好正架。
罐頭的「營養資料」列明每100克含膽固醇31毫克。成罐淨重240克，即係共有膽固醇74.4毫克架，唔好話佢唔事先聲明呀。
哇哈哈！有冇攪錯呀，係咪呃post呀，榨橙汁都要post上來？
好彩係post係自己blog，如果唔係真係有呃post之嫌。其實係想玩下呢兩件好可愛既「架生」，一隻玻璃多嘴(三嘴)量杯仔，同一隻玻璃「真人手動榨汁碟」。
而家D橙又貴左又冇以前咁靚，有時錯手買左D多渣橙，用黎榨汁都幾好。當然仲可以專登買靚橙鮮榨橙汁啦。
一個橙，榨呀榨，就係榨出咁dur dur唔夠半杯汁。
要用三個橙先可以榨到一杯，雪凍佢飲，正！
