紅蘿蔔粟米椰子海底椰煲雞湯 Carrot, Corn, Coconut and Chicken Soup

我知咁講一定俾大師傅鬧。其實平民煲湯真係幾容易，買好材料放晒入煲度煲三個鐘就飲得，而家有埋湯料包，就更加乾手淨腳。容易過炒送。

響惠記執左包湯料，有紅蘿蔔、粟米、椰子、海底椰、蜜棗、南北杏，企企理理，只係二十四元。

煲咩好呢，唔想成日煲豬肉。諗過煲牛腩，不過好貴，結果買左半邊雞28元。實行煲個4C湯----Carrot, Corn, Coconut 同 Chicken，哈哈！

如果怕肥，可以去晒雞皮。我唔想個湯一滴油都冇，所以只係去左一半雞皮。雞翼同雞髀都冇去皮。

將雞洗淨出一出水，湯料洗淨切好，全部放晒入瓦煲內，先大火煲滾，再校慢火煲三個鐘以上。

根本唔駛調味，已經好清甜。可以落少少鹽平衡下，更好飲。

湯渣可以點豉油食，紅蘿蔔、粟米、椰子都好食。雞煲到綿軟，入口即化開。