豉油皇魷魚絲炒麵 Stir-Fried Noodle With Soy Sauce And Dried Squid

大家一定要試下，呢碟炒麵非常和味！

碱水麵餅兩個，乾土魷兩隻，靚老抽適量，韭菜適量，就係咁多料。

麵餅先用凍水浸開(我唔用滾水淥)，再沖洗乾淨，瀝乾水。

然後加入老抽、蠔油、紹酒，先用手摷勻，摷時仲可以用手指「卒」，令麵身入味。

然後靜置一陣，炒之前再落油，將麵再摷勻備用。



燒熱鑊，落油，然後放入已浸洗乾淨並已剪成絲兼調過味既土魷絲，爆炒至香味四溢。

此時放入麵，用中慢火半煎炒，最後放入韭菜，炒至收乾汁液，韭菜熟，就可以上碟。



兩個麵餅已可炒出一大碟，非常好味！

士多啤梨酒(完結篇) Strawberry Wine (Final)

浸左兩個幾月，開左黎試飲，都算OK啦，不過屋企其實冇人飲酒！

用隻雞尾酒杯飲，夠風味！

浸酒係為左貪玩，買罐七喜溝黎飲，加埋冰……

仲好味！

五餸車仔麵 Cart Noodle With Five-Kinds Of Dishes

車仔麵出街食冇咩特別，但係響屋企整就多功夫。

呢一大碗五餸車仔麵，整左我兩日。好彩整出黎效果同街鋪一樣！

材料：
1)  碱水麵一大個(我買左三個10元，只須用一個)。
2)  豬大腸三條27元。
3)  豬皮(乾品，自己浸發，5元，只用一半)。
4)  白蘿蔔一條4元。
5)  韭菜4元。
6)  炸魚蛋一包11.9元。

整料：
1)  咖喱豬皮：豬皮兩塊浸水渣水浸過夜，然後原塊用調味同咖喱粉炆至微腍身。
2)  水煮蘿蔔：一開四用地魚粉同其他味料煮至腍。
3)  滷水大腸：豬腸徹底洗淨，落少量白醋先出水，再用八角、老抽、味料炆至腍。
4)  魚蛋：用蘿蔔水煮。
5)  韭菜：用淥麵水灼至八成熟。

淥麵：
碱水麵放入滾水快速弄散，過冷河瀝乾水放入大碗內，再淋上滾湯(用炆煮豬皮、大腸、蘿蔔既湯汁做湯底。)

剪料：
最好玩係呢個步驟，出動肥哉廚房鎮房之寶，牛雜大較剪，將豬皮、豬腸、蘿蔔剪落大碗內。

嘩嘩嘩，一大碗五寶車仔麵做好喇！拿碗來！食喇！！

花膠淮杞雞湯 Fish Maw Chicken Soup

花膠食開唔好停，今日又食六隻，用黎煲雞湯。

材料：花膠適量，雞半隻，脢頭瘦肉一塊，瑤柱適量，淮山杞子圓肉適量，冬菇適量。

工具：樂聲牌電子瓦撐(煲)，紅福壽湯鍋(上枱)

做法：花膠發好洗淨切好備用。淮山杞子圓肉冬菇浸洗乾淨備用。瘦肉、雞出水洗淨備用。

電子瓦撐注入十二碗清水，放晒所有材料入去，開高火後轉自動火煲六個鐘，調味即成。

用電子瓦撐煲好方便，唔駛睇火，又可以做出同燉湯差唔多既效果。個湯好清，好正！

韭菜花肉絲炒雙荳芽 Stir-Fried Chives Flower Double Bean Sprout And Shredded Pork

呢碟送既特色係大細荳芽一齊炒，再加埋韭菜花同肉絲，好爽口，好好味。

大荳芽一斤，細荳芽半斤，韭菜花一札，脢頭瘦肉少量，陳年辣椒乾四隻。大荳芽用白鑊烘乾烘至微焦香兜起。

爆炒肉絲，落韭菜花炒勻兜起。

炒細荳芽，然後將大荳芽回鑊炒勻。

再將韭菜花肉絲回鑊，落乾辣椒絲，調味，炒至收汁，埋個薄獻上碟。

呢個份量可以炒出一大碟，除左送飯，仲有剩可以送麵！

花膠炆鳳爪 Braised Fish Maw And Chicken Feet

嘩而家花膠貴左好多，以前買一盒大大隻六百幾元，而家升到千幾元。

太貴，轉買八百元一盒，細隻過以前差唔多一半。

發左六隻，再買八隻新鮮鳳爪，八隻冬茹，就炆左呢煲野。

當然要阿Joel出黎幫手。先用鑊炆好冬菇雞腳，炆到差唔多夠腍，然後連汁倒入煲，此時加入切好既花膠，用慢火慢慢炆至花膠腍度適中。



花膠雞腳，夠晒補膠，食完「漏」到而家。

 

五味生炒牛肉飯 Five Tastes Fried Rice With Minced Beef

我好鍾意炒冷飯架，食剩飯多數會用黎煲粥，唔係就炒飯。

今次炒碟生炒牛肉飯。買左十元一包新鮮免治牛肉。本來諗住落生菜絲，去到街市轉左買中芹。

又落少少陳皮絲，多多薑粒，再加埋適量乾蔥頭同青蔥。

飯底係蛋炒飯，落左一隻雞蛋。整出黎就係一碟「五味生炒牛肉飯」。