大同電鍋煲絲苗 Tatung Multifuntional Cooker

 

大家好！今日終於下定決心要寫返個Blog喇！2015年第一篇要用個新煲上場同大家見面。

 

 

幾個月前已留意到附近電器店有賣台灣的大同電鍋，一直都冇諗住要買。直至最近上網瀏覽文章，始知呢隻電鍋係台灣人家居廚房神器。

 

見佢個設計簡樸無華，而且色水大紅大綠，夠晒傳統，於是買左呢個我相信係「入門版」既黎試下。

 

呢個香港電壓220V版條電線係連住煲底，唔係台灣版本可以響煲邊拔出。條電線連住個煲，清洗同搬動或收藏都唔方便，唔知點解要咁設計呢？



 

大同電鍋應配蓬萊米，不過我食開絲苗，一於試煲下。用附件量杯量左兩杯米，按說明加水至內鍋刻度2，再響外鍋加一量杯水。

開始㩒制煲飯喇！呢個煲煲飯都幾「熱鬧」下，過程中外鍋水滾，會聽到內外鍋之間pet pet水聲，同內鍋被滾水衝擊至在外鍋內震動同移動既聲音。用開日式電飯煲第一次轉用呢隻電鍋，真係都幾「震撼」。煮到就水乾時仲會啪啪聲，但係仍未跳至保溫掣，當時真係啪到我有D驚，好彩最後佢都自動跳至保溫。相信係我未習慣，少見多怪而已。

 

保溫15分鐘後，摷鬆D飯，就係咁樣。飯煲得夠軟，效果都唔錯。我鍾意硬身少少，下次會落少一D水。