碗

無限回憶在飯碗。。。碗碗常滿

 

牛油蛋糕仔[試爐版]

試下整蛋糕仔先。

響網上有好多整蛋糕仔既配方。呢次用料配搭係：

自發麵粉150克。牛油40克。奶水50克。砂糖100克。蛋2隻。

200度焗18分鐘。

呢個份量可以整到9個撻模蛋糕仔。

都幾好食喎，哈哈。

 

西洋菜陳腎豬肉湯

西洋菜斤半。陳腎兩個。豬肉(不見天)一舊搭埋豬骨。羅漢果三分一個。冬菇四隻。南北杏適量。

豬肉出水洗淨。菜浸洗乾淨。

大鋼煲煲滾水將所有野放晒落去，先大火後中火最後細火煲三個鐘即成。

調味後即可享用！

胡椒白果咸菜煲豬肚湯

雪豬肚一個。白果肉一包。咸菜、大芥菜、白胡椒粒適量。惠記豬脊骨一包。

雪豬肚出水，剪開洗淨清除油脂，一開四備用。豬脊骨出水備用。

咸菜切件浸鹽水備用。大芥菜洗淨切件備用。

大瓦煲燒滾水，放入豬脊骨、豬肚、白胡椒粒先煲至湯變白色，落鹹菜。

煲至鹹菜腍身，落白果再煲至豬肚腍身。

撈起豬肚切件，放回煲內，放入大芥菜，煲至腍，即成。

好好味呀！

 

 

雲吞麵+蝦子撈麵

響元朗阜財街食既雲吞麵同埋蝦子撈麵。

食味都OK啦，賣相就好普通。雲吞麵D麵唔係梘水麵，冇咁彈牙。冇落韭王，冇落豬油，個湯係濁湯唔係清湯。有佢既特色，不過我鍾意梘水麵、韭王、清湯加少少豬油多D。

個蝦子撈麵都幾多蝦子，都幾好食，不過都係唔係幾夠油水，可能係要賣健康D掛。個湯都係濁既，湯味只算一般。

整體黎講，都可以啦，只係有少少失望。

清炒黑白雙煞 [雲耳清炒椰菜花]

今日街市菜檔椰菜花好新鮮，即刻買左一個，6元。

番屋企本來諗住就咁清炒，開雪櫃見到包雲耳，於是黎個「黑白雙煞」啦！

做法：

1 雲耳洗淨浸軟，用酒、糖、生抽、鹽、蠔油、雞粉、油醃透備用。

2 椰菜花切碎，洗淨，用輕鹽水浸一陣備用。

3 燒滾一煲水，落油，落椰菜花白灼一會撈起，瀝乾水。

4 薑起油鑊，落雲耳爆炒，贊水加蓋炆煮一陣(時間視個人喜好雲耳爽或腍而定)

5 落椰菜花，蒜片，椒絲，贊少少酒、水再炒，加蓋局一陣，收汁即可上碟。

呢個清炒黑白雙煞，質感、滋味都好夾，幾正架！

白灼蝦 Fast Boiled Shrimps

游水蝦仔一斤36元。蝦仔細細隻，肉更嫩滑。

蝦洗乾淨，煲大滾水，落少少油鹽，放蝦入水白灼之至僅熟即成。

用指天椒豉油點食，鮮美可口。

 

格仔餅(試機)

想學人整格仔餅，響上海街見到兩款圓形既傳統明火格仔餅模，一細一大，都要百幾元，幾乎買左，不過諗起傳統餅模會漏到個爐頭胡呢馬叉，就忍左手。行行下又見到一部格仔餅機，賣一百八十元，似乎間間鋪都只係賣呢部。雖然係長方形模，唔係我最想要既圓形，但係貪佢簡單乾淨，結果買左部。番屋企是但開D粉(主要係pan cake)粉試機，似乎完全冇難度，整格仔餅快靚正，易過借火。下次買齊材料再整過！

芽菇炆腩肉

芽菇炆腩肉超好味。

芽菇買番黎要最少風乾一日，抽乾水。腩肉先出水再切厚件。

中芹幾棵，南乳兩舊。

將芽菇批皮，一D拍碎，一D切片備用。

用薑、鹽、蒜起鑊，先爆香芽菇，贊少少水爆炒一陣上碟。

再用南乳、蒜起鑊，爆腩肉，贊酒、水、加老抽、八角、陳皮、片糖大火炆至開始腍。

轉落瓦煲，落芽菇，再用中慢火炆至腩肉腍身。

落中芹，再炆至開始收汁，即成。

 

臘腸煲仔飯

中國絲苗米嘜半

台灣臘腸兩條

佛山鐵線瓦煲一個

爐頭散熱板一塊

米洗淨浸水一小時。臘腸洗淨。放米面一齊蒸。

爐上放散熱板，再放上瓦煲中高火燒至飯熟。

取出臘腸切片，將煲內飯摷鬆，再局十分鐘。

裝飯，鋪上臘腸，淋上煲仔飯豉油。

絲苗飯香軟，臘腸甘美，好好食架。不過臘腸好肥，唔好食咁多呀。

蒸蛋糕[第一版]

肥哉蒸蛋糕第一版

美國石榴

在惠記偶見美國石榴，賞心悅目。

 

一柱擎天[芽菇]

乾水芽菇