焗脢頭豬扒

新鮮脢頭豬扒四塊26元。節瓜一個。

脢頭豬扒索乾水，略拍鬆。落酒、鹽、糖、雞粉、生抽、少少梳打粉醃勻，最好醃過夜，令豬扒完全入味夠味。節瓜切條。

先用平底鑊煎豬扒至兩面略呈金黃色，唔駛煎熟。

預熱焗爐200度10分鐘。錫紙鋪在焗盤上，排上節瓜，再鋪上豬扒，包好錫紙加一張咭左窿既在面密封全包。

焗15分鐘。取出，取去面上的錫紙，在豬扒面排上少少芝士，打開包包再入焗爐焗8分鐘。

 

 

淮山杞子雪耳雞腳花膠湯

呢個湯潤肺、養顏，最重要係補充骨膠原蛋白。要飲多碗，仲要食埋渣。

材料：

花膠兩隻。雪耳一朵。雞腳八隻。淮山杞子適量。

預備：

1 花膠隔日預先浸發好。

2 雞腳出水剪去腳甲，沖洗乾淨。

3 雪耳浸軟剪除根部硬塊再搣細。

4 淮山杞子洗淨浸軟。

煲法：

1 先落雞腳、淮山杞子，煲至雞腳開始腍。

2 此時加入已剪成長方塊既花膠煲二十分鐘。

3 落雪耳再煲，要花膠同雪耳腍D，就煲耐D，隨個人喜好，煲至岩心水就熄火。

4 調味即成。

我唔鍾意煲得太耐，煲太耐會變「膠水」。

 

 

帶飯篇之：節瓜脢頭扒飯

帶飯有時好過出街食。呢個係節瓜脢頭扒飯盒。

響惠記買左包新鮮急凍脢頭豬扒，一包兩塊，帶D肥肉，煎時可以唔落油。

買多包節瓜仔，一包兩個。帶飯我鍾意食瓜多D，叮熱時唔會好似叮菜咁叮到乾晒。

用隻寶迪易潔平底鑊，一鑊過搞掂，鑊都唔駛洗。

煎扒，剪成條狀。煎煮節瓜條，脢頭扒回鑊，贊水煮，兜勻。

原鑊炒番熱D冷飯。

呢兩兜野就係我聽日既午餐喇。。。

皇后火腿通粉

早餐可以食清D。。。

藍莓汁煎釀豆卜

父親節快樂呀！今晚一家人出街食飯過節，上晝整左個特色煎釀豆卜，主角唔係豆卜，係個藍莓汁！好味道呀！

材料：

豆卜一包7.8元。鯪魚膠10元。藍莓果占適量(約4湯匙)。麥芽糖適量(約1湯匙)。

做法：

1 鯪魚肉加入少少葱、肥肉粒再攪勻。

2 豆卜洗淨剪半，釀入魚肉。

3 用平底鑊煎豆卜，先煎魚肉面。贊水贊紹酒，加蓋局煎。

4 煎至魚肉金黃色，翻轉煎一下豆卜，上碟。

5 煮藍莓汁：油鑊先校細火，落藍莓果占，加適量水煮開，再落麥芽糖，慢火煮溶。再埋獻(粟粉、雞粉、鹽)。煮至汁夠濃。

6 將汁淋在豆卜面，洒少少蔥花，即可享用。

普通送搞搞新意思，又靚又好味！大家一定要試下。

焗芝士龍利柳飯

買左個焗爐好日都唔用下，買左先發覺焗爐食譜同自己習慣煮開既路數根本唔同。不過冇理由將個焗爐當做裝飾品架，點都要學下焗野。

今日整左個白汁磨菇番茄芝士焗龍利柳飯，都整得OK啦，個飯都幾好食喎。

材料：

冷飯一碟。龍利柳一包(兩條17元)。車打芝士一舊(40.7元，好貴，淨係用少少乍)。番茄一個(要買成包，10元四個)。磨菇三個(要賣成包，22.5元)。

做法：

1 炒個蒜蓉飯底，放在焗兜底。

2 龍利柳切件索乾水，落鹽、糖、黑椒、少量雞粉醃勻。放落平底鑊煎香。鋪響飯面。

3 番茄切四大片，鋪響龍利柳面。食飯先知呢四塊番茄好重要，一定要落。

4 煮個白汁：先爆香已切片既磨菇，然後加入鮮奶(我開左兩羹奶粉水代替)，麵粉，鹽、雞粉，慢慢煮成白汁，淋響番茄面。

5 車打芝士切粒，洒在白汁面。

6 預熱焗爐180度，成兜野放入去焗18分鐘。

7 嘩，肥哉版白汁焗芝士龍利柳飯出爐喇，趁熱趙呀。。。。。。。

番茄發揮「清熱保濕」作用，令個飯唔會太燥太乾，食落口感更豐富。

 

勝瓜雲耳炒肉片[去豉油版]

炒個清清地既小菜。

勝瓜一個4元。豬腍肉20元(只需用一半)。雲耳適量。

勝瓜刨皮切滾度、丁度。豬肉切片，落少少糖、鹽、梳打粉、雞粉、紹酒、水、油撈勻。雲耳浸軟摘乾淨，落少少糖、鹽、油撈勻。

先用低溫油中慢火炒肉片至剛熟，兜起。

爆炒雲耳，贊少少水加蓋炆一陣。開蓋，落勝瓜，贊少少水炒至軟身。

肉片回鑊，埋個玻璃甗至收乾汁液，即可上碟。

呢碟小炒完全冇落豉油，我要個色水自然D，清D。

 

 

花膠衛生麵 Boiled Fish Maw Noodle

過節食剩左D花膠，今日唔食飯，煮衛生麵食。

張榮記衛生麵一筒。一筒已經可以煮一大煲，如果兩個人食，半筒已夠有餘。

花膠。魚塊。白菜仔。

濃湯寶一包。

依烹煮說明準備好衛生麵。校好個湯底，放麵、落料，煮滾即成。

 

青豆洋蔥魚蓉煎蛋角[肥哉版]

我整既係單面蛋角，冇做對摺。

材料：

青豆角半斤。洋蔥半個。鯪魚膠10元。蝦米適量。蛋4隻。蔥適量。

做法：

1 青豆角切粒。洋蔥切粒。兩樣落鑊爆香，落少少鹽，炒至八成熟備用。

2 蝦米浸軟切碎，加入魚膠內。蔥切粒加入魚膠內。加少少水，將魚膠攪勻。

3 蛋4隻打勻，放入2攪成魚膠蛋漿，再加入1再攪勻。

4 用平底鑊，落適量油，用大湯匙逐匙傾入蛋料，煎時用木匙推成三角形。

5 將蛋角煎至兩面焦黃甘香，上碟。

 

蓮霧

蓮霧造形、風味獨特，真係人間異果呀~~~

蓮霧蝦子清炒雙瓜條

行過街市見到蓮霧，14元磅，買左5個，18元。

用蓮霧炒冬瓜同節瓜條，爽脆清甜，健康有益。

冬瓜一片4元。節瓜兩個。兩種瓜都切條。蓮霧兩個切丁度。

用易潔鑊，落薑起鑊，先半煎炒節瓜條，邊煎邊逐少贊水，晒少少鹽，將節瓜煎炒至微焦並略收水。

再用薑起鑊半煎炒冬瓜，邊煎邊贊水，晒少少雞粉，將冬瓜煎至透明。

節瓜回鑊，撈勻，贊少少紹酒，將雙瓜煎熟但要脆身，不要過熟，不要腍身。

放入蓮霧，兜勻即可上碟。

屋企有樽蝦子，上碟前落左D。

變成蓮霧蝦子清炒雙瓜條！爽呀！

粟米豌豆炸魚塊

家常菜譜點都要有款粟米石斑(魚塊)既，買唔到石斑柳，都係用番龍利柳算啦。今次加左新鮮豌豆增加色彩同口感，效果都幾好喎。

急凍龍利柳15元。豌豆4元。地捫忌廉黃粟5元。蛋1隻。

龍利柳解凍索乾水，切一舊舊，用鹽、紹酒醃勻。豌豆破開豆莢，取出裏面既青豆。

做法：

1 龍利柳拍上粟粉+麵粉，放入煲仔內油炸至金香，撈上放涼一陣再翻炸至金黃色上碟備用。

2 粟米加生粉開個濃汁獻，加適量蛋液。再加入已爆炒過既青豆。

3 魚塊回鑊，索勻汁獻，即可上碟。

加左豌豆，食落又有唔同，你地都試下啦！