喜歡這天真爛漫的傳統祝願：長。命。富。貴。
不起眼的飯碗，正在悄悄沒入歷史的暗角裏。。。。。。
2010年9月26日 星期日
2010年9月25日 星期六
佛掌摑肥豬 Buddha Palm and Sliced Pork
佛手瓜三個，半肥瘦豬肉一舊，雪耳一朵，指天椒適量。
做法：
1 佛手瓜批皮去核切片，浸洗清水，把瓜潺洗去。
2 半肥瘦豬肉用鹽、糖、生抽、酒醃勻，然後蒸熟切片。肉汁留用。
3 雪耳浸好剪淨，泡在蒸肉汁內。
4 指天椒原隻在中間切一刀(不切斷)去頭。
5 用薑、蒜頭、鹽爆炒佛手瓜，贊酒，炒至透明兜起。
6 雪耳連肉汁放鑊內慢火炆煮至收乾肉汁兜起。
7 爆炒豬肉片，雪耳回鑊，贊水炆一陣。
8 佛手瓜回鑊，落指天椒，全部兜勻，埋獻上碟。
蜜豆炒蝦 Stir-Fried Honey Bean & Shrimp
肥美蜜豆爽甜好食，用黎炒冰鮮蝦。
蜜豆搣頭撕走豆莢硬衣，搣埋尾小小。用清水泡浸一陣。
蝦剝好，用粗鹽省一省，過水，去腸，再啤水至爽身，放入雪櫃雪一陣。
蜜豆先用油、糖大滾水灼一灼，瀝乾水。
用薑片起油鑊，慢油半泡半炒蝦，炒至八成熟撈起。
原鑊大火爆炒蜜豆，贊油、水，炒至蜜豆熟，蝦回鑊，大火兜勻，埋獻收汁即成。
鹹雞燜飯 Dutch Oven Salty Chicken Rice
做節太多送，碟雞食唔晒，醃成鹹雞，用黎燜飯。
做法好簡單，如果有個荷蘭鍋就最正。
荷蘭鍋落少少油，爆香薑片，較慢火，放入鹹雞，爆炒一陣，贊少少酒。
放入飯在鹹雞面，加適量水(或雞湯)，加蓋慢火燜。
荷蘭鍋妙處之一係鎖水、蓋內滴水功能，用黎燜飯最岩。
一開蓋，陣陣雞香，此時加入葱粒，再加蓋燜一陣。
收火，拌勻，即成香滑鹹雞燜飯。
2010年9月23日 星期四
切月餅 Cutting My Mooncake
回油左四日，回到又肥又淋。
放入焗爐焗左十分鐘，攤凍先切。
細餅裏面咁樣。
大餅係咁樣 (一刀切唔正兩個黃添，要切成四份一舊先得)。
個黃冇漏油，可能係包時未焗透。
芋蓉唔夠滑，因為淨係用匙羹壓蓉乍。好在唔太肥，又唔太甜，自己整既好處就係可以控制油量同糖量。
切開樣就麻麻，食落都OK啦。
2010年9月19日 星期日
雙黃芋蓉四星伴月 Taro Paste Double Duck York Mooncake
整左我兩日喇。
肥哉版「雙黃蓮(芋)蓉」+「四星伴月」！四星太淺色，可以耐D先出爐。
預祝大家中秋節人月雙圓，闔家歡樂！
整到個廚房七國咁亂。唔寫咁多喇，影左好多張相。揀左一D貼上黎，你地睇下連環圖啦。
搓餅皮：
餅皮搓好放入雪櫃雪一晚。
預備材料預備左一日，放入雪櫃第日整。上面果包唔係蓮蓉黎，係自製既芋蓉。蓮蓉太難整喇，又唔想買現成既，所以用易整好多既芋蓉代替。
好好玩架！哈哈！
呢個係雙黃蓮蓉大模↓
打出黎個邊麻麻地。
四星「中」、「秋」、「月」、「餅」準備入爐。
大餅搽蛋黃液。
四星伴月出爐喇！！！
聽講話要等「回油」，咁等正日先食佢地啦。
切開裏面唔知係點樣既呢？好心急添。
補番個餅皮配料：
麵粉90克。油20克。糖漿60克。梳打粉四分一茶匙+水二分一茶匙。鹽少許。
2010年9月15日 星期三
2010年9月12日 星期日
蝦膏豆豉銀魚乾蒸豬肉 Steam Pork in Shrimp Paste
上次去大澳買左都幾多野 [睇呢度：http://hk.myblog.yahoo.com/fatjoykitchen/article?mid=1334 ]，其中有全記既蝦膏，老闆娘仲送左兩包眉豆豆豉俾我地，今日一於試下先。
上星期去西環鹹魚欄買左一包銀魚乾，一於用黎蒸豬肉。
做法：
1 銀魚乾洗淨，用清水泡浸至軟身變白色。瀝乾水，落少少酒、油撈一撈備用。
2 半肥瘦豬肉切片，落糖、生抽醃勻備用。
3 眉豆豆豉洗淨備用。
4 燒熱油鑊，落一片蝦膏慢火爆香炒開，落豬肉快炒，贊水、酒至轉色表面已熟即撈起。
5 將銀魚、豆豉、薑絲、已爆炒既蝦膏豬肉撈勻，落少少生抽，鋪上薑絲，蒸10分鐘(水滾計)。
6 十分鐘後，取出，如汁液過多，可以稍為倒去一些，然後灑上蔥粒、紅指天椒粒，贊上滾油，趁熱開飯！
和味呀，淨係呢碟已經可以夠一家人送飯食一餐啦。
訂閱：
文章 (Atom)