粉彩綠地洋蓮萬壽無疆湯鍋 Green Wan Shou Porcelain Soup Pot

此湯鍋多年前購於佐敦吳松街某瓷莊。早前舊地重遊，瓷莊已無影蹤矣。

當年老闆攀梯上高閣，取下大包發黃舊報，蟲蝕處處，塵垢斑斑。掀開封皮，乃見此鍋。

老闆抹拭一新，遍體綠彩燦目，古意盎然。老闆云此乃舊瓷，不復作矣。

觀其手工花紋圖案，於同類中可稱精細，似為較早期所製。雖非珍品，亦足悅目賞心也。

附記：呢隻鍋係我家中擺設，但係我間中興起都會用黎裝湯架，睇下↓
http://blog.yahoo.com/_GTVKXK26JCKSEBAIIJPTGF4PU4/articles/34782/category/%E7%85%B2

白糖糕個籮？The LOR For White Suger Cake?

果日逛逛下逛到間食品製造廠門外，見到地下放左六個咁既野。

唔知叫咩野，有冇人知呀？總之知佢係用黎放白糖糕。

就咁劈響地唔知係咪舊得滯唔要既呢？

話時話白糖糕都幾有型，點解係要咁樣放？同埋白糖糕唔知點切既呢，成底都切好左好整齊可以逐件賣。

室內街市 Indoor Wet Market

上次出外景出漏左幾張相，貼埋上黎。

呢度係石硤尾室內街市，一般人我諗唔會久留，但係其實裏面有好多舊鋪，好有懷舊feel。

舊區人口老化，呢度長者比較多，公公伯伯著件汗衫背心就去買送，呢D就係生活實景。

睇唔睇到個左顯記添丁甜醋牌？間雜貨鋪都幾大，好多野賣。

可惜我唔敢對住人鋪頭影相，驚太唐突俾人鬧。

鋁煲 Aluminium Pot

而家仲有冇人用鋁煲煲野？應該問仲有冇人敢用鋁煲煲野。

其實佢好輕身，幾方便，又平。以前仲有隻銻煲，唔知仲有冇得賣？

不過話用鋁煲煲野，食多左會令人痴呆。不過其實人遲早都會呆。

傳統電飯煲個膽都係鋁質，我屋企就有兩個鋁膽電飯煲，煲左好耐飯。



呢個大鋁煲買左番黎煲過一次粥，就用左黎裝水洗菜，當升盤用。

豆腐炆二手豬大腸 Braised Bean Curd And Second Hand Pig Intestine

我肥哉唔主張浪費，幾個朋友去潮州鋪食飯，唔驚死叫左煲鹹菜豬大腸煲。個師傅手工了得，豬大腸係一條套一條架。



當然有陣豬腸味，食一件好和味，兩件已經夠喉。根本食唔晒。

食剩好浪費，拎左返屋企，又變左二手貨。

買舊豆腐，煎香，落埋豬大腸，埋個蠔油獻，炆腍。咁又re-cycle左一碟送。

豬大腸當然唔好多食，一年食一兩次好喇。

估下係咩 Guess What it is?

肉質爽脆。

短白豆角炆叉燒 Braised Medium White Bean With BBQ Pork

行街市見到檔口有一袋短身白豆角，其實唔知係乜豆，總之比玉豆長，比白豆角短。

買左一斤10元。冇諗過要黎炒乜，屋企食剩D叉燒，於是就整左呢碟短白豆角炆叉燒。



最初冇諗過要影相，所以摘好晒落埋鑊先影。

我唔鍾意食太腍既豆角，炆到夠熟就收火，唔想炆得太腍。

食味比白豆爽甜。

配料落左：薑、蒜頭、鹽、糖、紹酒、蠔油、栗粉、豉油。

秋風起食臘味 Chinese Sausage

行政總廚好鍾意食臘味，不過佢買黎買去都係買榮X，最近都有買蛇王X既膶腸。

有日行過上環和興，走入去買左臘腸、膶腸同臘鴨髀。買左一百六十元。



臘腸好乾身，一打開膠袋就好大陣酒香味。

三孖臘腸，三孖膶腸，一共120元，即係10元條，係七三比瘦肉腸。

兩隻臘鴨髀，每隻20元，共40元。

今日蒸一條臘腸一條膶腸試下。

都幾好味，唔錯，臘腸比較硬，膶腸就岩岩好。

紅蘿蔔貢梨炆豬腩 Braised Pork Belly With Carrot And Pear

上次用貢梨煲排骨湯，甜到不得了，一D都唔會酸。



今次想試多次，睇下係咪用貢梨入饌唔會變酸。於是整左呢鍋紅蘿蔔貢梨炆豬腩肉。



用既廚具仍然系Lodge十二吋Skillet，要埋個原裝超重鍋蓋。



豬腩肉先出水，切大塊，用隻skillet爆佢一爆，再落切好滾度既紅蘿蔔，加水煮滾，再加蓋用中慢火炆之。

Lodge廚具既特色係蓋內有鐘乳式滴水設計，個蓋又重，可以保持食物原汁原味。

炆到咁上下，落埋貢梨(三個切細塊)，加水，加調味(鹽、生抽、糖、紹酒)再炆。

炆到貢梨又腍又滑，溶咁滯，炆至略收汁。

原鍋上枱！

再一次證明，貢梨入饌一D都唔酸，反而有甜美梨香。

富有柿 Persimmon

柿子的橙紅色，又是自然界的「美色」，加上頂端的蒂瓣，感覺好古典，非常悅目。



今日經過生果檔，富有柿十元個，好奪目。

見到佢色水咁靚，又飽滿，真係唔捨得切開黎食。

羅漢茶葉蛋 Poached Eggs In Chinese Tea And Dried Grosvener Momordica Fruit Soup

買左盒韓國啡蛋，十隻。用陳年普洱茶葉同細半個羅漢果，一於浸個茶葉蛋。



仲要落兩粒八角、一茶匙丁香粉、家樂鮮露、一湯匙冰糖、兩湯匙鹽、一角陳皮。

雞蛋洗淨，材料沖乾淨，全部放入凍水慢火半煲半浸加熱。

慢火浸煲至蛋熟，略搞碎蛋殼，再浸煲。

煲下、浸下、又煲下，又浸下。煲至水位減半，熄火浸蛋，浸佢一兩日先食更入味。不過忍唔住已經食左幾隻。



落左羅漢果，鹹香中帶甜味，係出面街檔買唔到架。

鹹魚肉粒豆腐煲 Braised Salt Fish, Pork Dice And Bean Curd In Cast Iron Pot

呢個煲用既廚具係：Lodge 平底鑊同雙耳煲仔。

兩塊布包豆腐，一塊軟豆乾，二十元脢頭豬肉，半塊三牙劃鹹魚，蝦米一撮，中芹三棵。



就係呢D材料，就整左呢個鹹魚肉粒豆腐煲。

三塊豆腐，一塊切大片，一塊切中片，一塊切粒。脢頭豬肉切粒，鹹魚剪碎，蝦米浸軟，中芹切粒同短度。煎好豆腐上碟，另外爆香鹹魚蝦米，放入醃好既肉粒，贊水炆煮至全熟。再放入豆腐，埋個蠔油獻，煮一陣。

另一邊燒熱個鐵煲，將材料倒入煲內，加中芹，炆到佢姐姐聲。

炆到入味微收汁就可以原煲上枱。



趁熱開飯喇喂！