黑芝麻蓉湯丸 Black Sesame Paste Sweet Dumplings

你地買埋買埋呢樣醬果樣醬，一樽樽，會唔會真係食晒架？定係好似我咁，淨係為左某次想整某樣野，就買樽醬，結果整完之後，成樽野就會被打入冷宮，擺到過期都唔記得左佢呢？

例如整叉燒果樽叉燒醬同果罋麥芽糖，蒸烏頭果支普寧豆醬，整占醬多果幾樽士多啤梨占、花生醬，炆南乳豬手果罋南乳……好多好多，都係用一兩次就成樽放到過期。

唉，真係好浪費。

今次就係樽台灣黑芝麻醬，為左整黑芝麻醬包，就要買成樽，只係用少少。另外仲有好多粉，例如今日執廚櫃就見到細半包糯米粉，好似係過年整年糕用剩的。

於是，就諗到整「黑芝麻蓉湯丸」。

我其實唔係好食甜野，麻蓉湯丸我唔係咁鍾意食，不過為左清咁D材料，就試下整啦。

做法(其實冇咩法，係憑直覺亂做)：

先將黑芝麻醬放入雪櫃冰格雪硬，以便包餡。如果唔係會攪到烏糟馬叉。

糯米粉逐少逐少加入水，搓成粉糰。

煲水，落黃冰糖、薑片做湯底，煲至大滾改中火。

搣一舊粉，包入麻蓉，搓圓。

將湯丸放入滾水內以中火煮至完全浮起，熄火加蓋局一陣就食得。

呢隻麻醬都幾杰身，咬開冇流沙添。我對湯丸麻麻，食一粒就已經好「漏」。