瑤柱蛋白蘭度欖豉蝦仁炒飯 Fried Rice With Dried Scallops, Shrimps and Egg White

而家開始明白D鋪頭賣炒飯，名堂多多，例如：富貴炒飯、大班炒飯、錦繡炒飯等等等，因為料太多，如果樣樣都講明，就會好似我呢碟炒飯咁，個名太長。

叫佢瑤柱蛋白炒飯，又好似漏左好多料。咁你話改個乜名好呢？唔通又叫肥哉炒飯？

五種料，或者可以叫五福炒飯啦。

瑤柱先浸軟，搣去韌物，撕成幼絲備用。

幼身芥蘭幾棵，將莖切成圓片。

欖豉洗淨剪碎備用。

蝦仁適量洗淨去腸啤水備用。

燒熱鑊，落油爆炒瑤柱，贊水贊油炒散炒熟，再落蝦仁炒至八成熟上碟。

再先燒熱鑊，落油、薑粒，炒蛋白，再落飯炒勻。炒到咁上下撥埋一邊，落少少油炒蘭度，再爆香欖豉，炒勻。

將瑤柱絲同蝦仁回鑊，全部炒勻，再落芫茜同蔥粒，炒至乾身調味上碟。

加左欖豉，鹹中帶甘甜，既有蛋白清香，又有芫茜同蔥香，更有蝦鮮味，蘭度又增添清爽，正！

一輪狂風掃落葉，斬下眼就食清光。