冬瓜雪菜魚腩湯 Winter Melon Snow Vegetable Fish Belly Soup

大熱天時最好煲冬瓜啦。成日都煲魚尾，今次改煲魚腩，貪佢多肉少骨又夠滑。

加埋少少青雪裏紅吊下味，個湯都幾好飲架。

冬瓜一片4元，連皮切丁度。

鯇魚腩一塊21元，洗淨索乾水用鹽醃一個鐘以上。

雪裏紅3元(只須小量)，用鹽水浸一陣，渣乾水切粒。

燒熱鑊，落油落薑片，先煎香魚腩，煎至兩面微金黃。

湯鍋煲滾水，落薑片，將魚腩放入去，用中慢火煲一個鐘至出味湯色轉淡白。注意火路要校細，魚腩煲一個鐘後，要仍保持原樣，唔會煲爛為好。

小心將魚腩取出，此時放入冬瓜，煲至腍身，再落雪菜，滾三兩滾。

最後試味調味，再灑少少蔥粒即成。

魚腩可以用靚豉油點黎食，仍然好鮮甜！

冬瓜連皮煲，有賣相、有咬口又有益。