焗香蕉蕃薯餅 Baked Banana Sweet Potato Cake

 

雅虎blog今日正式執笠，真係好唔捨得，佢個設計好好用，好過呢度無拿拿搞出三四個頁面，轉來轉去，轉到頭暈。雅虎真係簡單直接好多，版面功能又好，谷哥唔該學下啦。

 

今日行街市見到雞蛋黃蕃薯大平，十元三磅，買左五個。返到屋企見到有隻冇人吼既梅花點香蕉，就諗住整呢個香蕉蕃薯餅食下。

 

蕃薯先蒸熟，再同香蕉一齊猜成蓉，用黎做餅餡。我仲響裏面落左少少丁香粉同荳蔻粉。

 

跟住本應要做個曲奇餅皮，不過我唔想食牛油同太多糖，於是用左一半香蕉蕃薯蓉加蜜糖同橄欖油，再拌入低筋麵粉，猜成餅皮。放入雪櫃雪一陣。

 



 

之後用餅皮包餡，搓成橢圓形放入餅模打出，做左十二個餅仔。

 



 

 

在面上抹少少蛋黃汁，放入焗爐用180度火焗20分鐘。

 



 

攤凍後可以上碟做小食，得閒玩下整餅仔都幾得意啦！

 

 

個餅皮微脆但帶韌，因為我唔想食牛油，完全冇落。如果唔怕脂肪太高，可以做曲奇皮，會好食香口好多。個餡料就唔錯，有香蕉、蕃薯同香料味，都幾特別架！