芥膽腰豆炆排骨 Braised Pork Rib With Mustard Green And Kidney Bean

自從雅虎收檔後，肥哉廚房煮煮下俾佢窒住度氣，搞亂陣腳。新網站又唔就手，寫篇網誌都費時失事，於是整下整下搞到冇乜心機。其實我都唔想就咁就停，我都希望自己可以堅持落去。

 

呢味芥膽腰豆炆排骨，都幾正架，大家都可以試下！

 

 

芥膽以前大平，而家買一個要十一個半。紅腰豆係屋企用剩，今日可以用晒。再買左三十元排骨。炆埋一大煲，可以分兩大碟食兩餐。



排骨出水洗淨去碎骨，先用薑片起鑊爆香，再落水炆至腍身。另芥膽裁好，用蒜頭葱頭起鑊先炒一炒，再加入炆排骨連汁液再炆至菜腍。

再加埋已預先浸水煮腍既腰豆，炆至略收汁再埋個薄獻即可上碟。

芥膽味道獨特又夠腍，紅腰豆綿軟仍帶少少咬勁，肉排又腍又滑。芥膽腰豆好快就掃清，淨番肉排，反而成為配角！