水煲蘋果湯 Water Kettle Apple Soup

用水煲煲湯水真係好方便，最正係可以成煲拎起斟落碗或杯，翻熱又容易。今日呢煲就落左蘋果做主角，配一條紅蘿蔔、一支粟米，再落少少龍眼肉、杞子同適量羅漢果(冇入鏡)。

將所有材料準備好，放入煲，加水煲兩三個鐘就可以飲。本身已好濃郁香甜，唔駛調味。

雪菜肉絲冬菇蝦米新竹炊粉 Taiwanese Rice Noodle In Pork Mushroom Soup

響阿信屋買左一大包「新竹炊粉」，有十四個，今日用左三個，整左一大鍋湯米粉。

參考包裝說明，用左雪菜、肉絲、冬菇、蝦米做料。

個米粉幾有分量，質地好幼細。跟佢個做法，先爆炒材料，再落水煮成濃湯，再放入已浸開既米粉。

呢隻炊粉唔錯，口感軟中帶咬勁，轉轉口味，係唔錯既選擇。

旺角平民麵包店 A Local Bakery In Mong Kok

 

旺角有間平民麵包鋪，賣傳統港式包餅。有日行街路過，入去睇睇，麵包餅食色澤鮮明，而且售價便宜。菠蘿包、雞尾包、火腿蛋包、芝麻包、甜餐包、椰絲奶油包通通都係六元三個。 



擺到成間鋪都係，仲有蛋撻、香蕉糕、燒餅、雞仔餅。我入去果陣就有人買緊雞仔餅。鋪仔細細，不過好多野賣！

花多眼亂唔知買咩好，見咁平樣樣都想試。卒之買左一個懷舊銻兜純味蛋糕，9元個。三個芝蔴包，三個火腿蛋包。

原味蛋糕湯碗咁大，質地軟中帶微韌，有陣甜味，香味則稍淡。

 

芝蔴包大大個，芝蔴夠多，味道微鹹，香味較淡。

 

 

火腿蛋包細細個，裏面有塊蛋有塊火腿。味道偏淡。 





平民包店薄利多銷，D包餅賣相唔錯，算係咁喇。小市民志在醫肚，唔會苛求，真係要多謝店主服務大眾。相信店主都係辛苦經營，間鋪如果唔係自己買落，睇怕都幾難捱貴租。

 

 

 

淮杞汽鍋雞(試驗版) Steam-Pot Chicken Soup (Experiment Version)

想試下整汽鍋雞，一直都買唔到汽鍋。上淘寶其實見到好多，不過我冇戶口，暫時又唔想網購。有日響上海街唔覺意見到有間瓷器批發店有汽鍋買，明知佢賣貴好多，都忍唔住買左。

只係得呢隻款，買左個大鍋，蓋面印左個「中國宜興」印，但係個鍋做工十分粗糙，D泥料都睇得出係粗野。

買左隻雞，請檔主幫我斬件。再買舊瘦肉。加埋屋企已有既淮山、杞子、紅棗、龍眼肉、冬菇仔，就試整左呢個淮杞汽鍋雞。

雞件同瘦肉先出水，清洗乾淨。其他材料都浸洗乾淨，逐一放晒入個汽鍋內，再加入半杯仔紹酒。

將個汽鍋座在一個大煲上，煲內裝滿水，煲口圍上布。

開大火將煲內既水煲滾，水蒸氣就會由汽鍋中間既氣柱走入鍋內變成湯液。

期間要睇水加水，搞左四個鐘頭之後，開蓋，就係咁樣。

蒸左四個鐘，湯液只得半鍋。如果想多D，睇怕要蒸多兩個鐘以上。不過見又唔係好多人飲，又唔想太浪費煤氣就熄火算數。

呢鍋野隔左渣去埋油之後，共得湯約五蓋碗。

碗湯唔駛調味，本身已好香醇好味！ 

豆卜雲耳炆豬肉 Braised Deep Fried Bean Curd With Black Fungus And Pork

豆製食品一向都俾人又平又有營養既感覺。不過而家價錢一直提升緊，而家豆卜要賣8元4兩，即係32元斤。

今日就買左四兩，加埋屋企買落既雲耳仔，一齊炆脢頭豬肉。

用南乳、薑片起鑊，先爆香已預先醃好既豬肉。再加入已浸透既雲耳，加水炆至豬肉夠腍。最後加埋已浸水渣水幾次既豆卜，三樣一齊再炆。

炆到自己鍾意既腍度，埋獻就食得。最後上枱開飯食清光先醒起唔記得落紅蘿蔔片整色水！

鐵羅漢與水仙種泡茶 Two Boxes Of Chinese Tea

裕華而家做緊盤點大減價，去行左一轉，見到瓷器部賣舊日用瓷，巨型青花魚碟賣180元，佢話原價310元，不過我冇買到。走左落地庫，買左兩盒泡茶，不過冇減價！要60元一盒。

一盒「水仙種」、一盒「鐵羅漢」。廈門出品，鐵盒彩繪山水包裝，貪佢夠「娘」，呢種風格有懷舊feel，不出幾年睇怕會買少見少。

每盒內有12小包，包得好骨子架！



每包5元，打開呢包係鐵羅漢，就係咁樣。 

即刻煲水泡一包，攞番我珍藏既黑萬花蓋碗嗒真下味道！我沖左三四次都係茶一碗，都預左冇咩驚喜。

荷蘭豆炒牛肉 Stir-Fried Snow Peas With Sliced Beef

街市幾個檔口都賣大大隻既荷蘭豆，食得菜多，今日轉轉口味。

大荷蘭豆8元斤，買左一斤，呢碟只用左一半。 再買舊牛肉，要36元，不過我都係用左一半！

荷蘭豆洗淨，一定要搣左韌既絲。牛肉切好，醃好放入雪櫃等入味。



先燒熱鑊落薑片爆炒荷蘭豆，贊酒大火炒香即兜起，唔駛炒熟。

再落油爆炒牛肉，炒至七成熟時將荷蘭豆回鑊，落埋紅蘿蔔片大火再炒。





埋獻收汁即可上碟，荷蘭豆會碟上熟，呢碟送要趁熱開飯享用！起初仲驚大既荷蘭豆會老，但係食落冇渣，正！

青紅蘿蔔栗子粟米瘦肉湯 Green Turnip Carrot Chestnut Sweet Corn Lean Pork Soup

又去超市執左個懶人湯包，加舊瘦肉，就煲左呢個湯。

個湯包標貼話有蜜棗同南北杏，但係拆開洗淨放晒入煲先睇到，摷勻都冇！張單又唔知去左邊。唯有Good聲飲左佢。下次買呢D湯包要小心呀各位！



煲呢D湯簡單都極，所有材料洗乾淨放入煲加水，中火煲三四個鐘，調味就搞掂。

我今次用既係古老搪瓷煲，用電爐煲。