好耐好耐冇食過鮮魷，今日炒番味鴛鴦魷先。明知膽固醇高，不過呢碟送真係好好味，好日都唔食一次，冇所謂啦。
材料：
1 鮮魷三隻19元。乾土魷一隻屋企買落。
2 大青瓜一個7元。
3 蝦糕、指天椒適量。
做法：
1 鮮魷洗淨，切花(我應該切錯左，我響外面切，似乎要響裏面切，實在太耐冇整喇)。土魷洗淨浸軟。用鹽、魚露、糖、生粉、酒醃均備用。
2 青瓜刨一半皮，切片備用。
3 燒熱鑊，落油，落薑，少少鹽，爆炒青瓜至微透明，鏟起。
4 落薑、蒜、爆香蝦糕。先落土魷炒香炆一陣，再落鮮魷大火炒。
5 青瓜回鑊快炒，埋獻(生粉、生抽、糖)，收汁上碟。
鴛鴦魷口感各有不同，一樣濃郁惹味。青瓜清甜爽脆，兩樣材料非常配襯。
肥哉雙喜椰汁年糕：
一、紅棗杞子片糖椰汁年糕(加左油)
二、合桃薑蓉冰糖椰汁年糕(冇加油)
材料：糯米粉、粘米粉、澄麵。椰漿、片糖、冰糖。紅棗、杞子、合桃、薑適量。
年糕配方多籮籮，究竟邊條方最正呢？響網上睇左一排，自己編左條配方，貪佢容易記，順便試整「雙喜椰汁年糕」，打孖上，請各位指教下。祝各位新年進步，年年高陞！
呢個配方可以整到個五吋半直徑，一吋半高既圓形年糕。
糖：片糖或冰糖 200g
水：200g
糯米粉：200g
粘米粉：20g
澄麵：80g
椰漿：100g
油：1湯匙 (可不落)
做法：
1 煮糖水：慢火將糖溶入水中，攤凍備用。
2 開粉：糯米粉、粘米粉、澄麵篩勻，落糖水攪勻，再落椰漿再攪勻。
3 加油：落1湯匙油攪勻，怕肥可不落。
4 落料：黃糕(片糖)落紅棗杞子，白糕(冰糖)落合桃薑蓉。
5 蒸糕：把粉漿倒落糕模，我用左個五吋半圓形糕模，大火蒸1小時。
岩岩蒸起。
攤凍用保鮮紙包好，放入雪櫃雪一日先可以煎黎食。聽日先可以試味。
冰鮮蝦半斤24元。
龍口粉絲細半包(大包裝)。
土魷一隻。
大豆芽菜半斤。
中芹、芫茜、指天椒適量。
準備：
1 粉絲用凍水浸軟，瀝乾水備用。
2 冰鮮蝦洗乾淨，用大滾水白灼一下即撈起。蝦水放入一粒金華火腿雞湯粒，開成上湯備用。
3 土魷浸軟洗乾淨剪成絲，用糖、豉油、油、魚露、酒、鹽醃勻。
4 大豆芽用白鑊烘乾水，剪碎。
5 中芹莖切短度，芫茜切條、指天椒切粒。
做法：
1 蝦用廚房紙完全吸乾水，用油鹽乾煎蝦，煎至香脆鏟起。
2 燒熱鑊，落油，用薑起鑊，放入土魷絲爆炒至香。
3 落上湯煮滾後，放入粉絲。
4 兜炒粉絲，煮一陣待其吸收湯汁。放入大豆芽碎兜炒。
5 落中芹再炒至粉絲完全吸收湯汁。
6 用瓦煲仔，落油搪勻，燒至夠熱。把上述5放入煲內，落指天椒，埋獻汁(生粉、老抽、蠔油)，用筷子撈勻。
7 放入乾煎蝦，加蓋乾燒一陣。
8 燒至滋滋聲，開蓋，用筷子略撈一下粉絲同蝦，加入芫茜，再加蓋局一陣即成。
呢個乾燒粉絲要完全乾身才算成功，食落非常惹味架！
沙葛清甜爽脆，用來煲湯一流。沙葛煲花生雞腳湯，無論味道同湯水既質感都非配合，大家一定要試下。
材料：
1 沙葛一個11元。
2 雪雞腳八隻11元。
3 排骨頭20元。
4 花生2元。
5 陳皮一塊。
準備：
1 雞腳解凍出水(慢火煲一陣)，沖洗至爽身，剪去腳甲備用。
2 排骨頭出水洗淨，去碎骨備用。
3 沙葛切片洗淨備用。
4 花生、陳皮洗淨備用。
煲湯法：
1 清水三分二煲，先放入雞腳、排骨頭、花生、陳皮中慢火煲半小時。
2 放入沙葛，先煲滾再用中慢火煲二個半小時。
3 調味即成。
沙葛的爽甜可以中和雞腳的膠質感和膻味，可謂最佳拍檔。
