青瓜炒鴛鴦魷

好耐好耐冇食過鮮魷，今日炒番味鴛鴦魷先。明知膽固醇高，不過呢碟送真係好好味，好日都唔食一次，冇所謂啦。

材料：

1 鮮魷三隻19元。乾土魷一隻屋企買落。

2 大青瓜一個7元。

3 蝦糕、指天椒適量。

做法：

1 鮮魷洗淨，切花(我應該切錯左，我響外面切，似乎要響裏面切，實在太耐冇整喇)。土魷洗淨浸軟。用鹽、魚露、糖、生粉、酒醃均備用。

2 青瓜刨一半皮，切片備用。

3 燒熱鑊，落油，落薑，少少鹽，爆炒青瓜至微透明，鏟起。

4 落薑、蒜、爆香蝦糕。先落土魷炒香炆一陣，再落鮮魷大火炒。

5 青瓜回鑊快炒，埋獻(生粉、生抽、糖)，收汁上碟。

鴛鴦魷口感各有不同，一樣濃郁惹味。青瓜清甜爽脆，兩樣材料非常配襯。