蘿蔔真係鮮甜美味，又平又有益，冇得頂。買左個肥嘟嘟白蘿蔔3.5元，問菜檔要芫茜代替蔥，再買四兩鯪魚膠7元，就係咁簡單，就可以煮出一大碟。
做法：
蘿蔔切條。芫西切短度。
魚膠落適量水、一隻蛋白、加少少鹽、糖、蔥、再加入兩湯匙麵粉開成魚漿，目的係要魚崧軟滑D。
原本買番黎既魚膠煮熟後比較硬身，用魚漿煮起後幼滑D，咁樣同蘿蔔一齊煮口感豐富D。
先煎好魚漿，攤凍後切長條。薑絲起鑊爆炒蘿蔔，加水炆煮至轉透明色，此時加入兩隻乾辣椒(剪絲)，加入魚崧，蓋上蓋用細火煨煮。
煮至開始收汁，調味(蠔油、紹酒、鹽、雞粉)，埋獻，上碟前加入一半芫茜兜勻，上碟後再放少少芫茜裝飾即成。
學下人整鍋貼先，今日又唔食飯，屋企煲粥送鍋貼。
材料：雪菜一棵，小棠菜半斤，半肥瘦豬肉10元，薑絲少量。
皮：麵粉180克，生粉20克，鹽少量，油一湯匙，滾水150毫升。
做法：
1 雪菜浸鹽水去鹹味，再浸幾次清水，搾乾水切細碎，落麻油、糖撈勻。
2 小棠菜切碎，薑以幼絲備用。
3 半肥瘦絞碎，落紹酒、雞粉、少少生粉、糖、生抽醃勻。
4 將上面1-3撈勻做成餡。
5 粉料加入150毫升滾水，猜勻成粉糰。
6 取粉糰逐一掐成鍋貼皮，包入餡料做成鍋貼，呢個份量我可以做到17隻，如果皮整薄一些可以包更多。
7 燒熱平底鑊，落油，排好鍋貼在鑊上先煎一煎，再贊入滾水，加蓋煎煮至餡熟、收水、鍋貼底香脆金黃色。
都可以啦，皮整靚的整薄的仲好。
食完而家個口仲有陣陣辣感！
整左一大煲，要分兩餐食。材料：美國急凍雞中翼一大包(14隻)，薯仔四個，番茄四個，洋蔥一個，青瓜一條，咖喱粉一包(今次用冠益華記)，香葉兩片。
雞翼自然解凍，啤水去晒雪味，索乾，落紹酒、糖、鹽、老抽、雞粉醃至入味，最好醃過夜。將雞翼用鑊煎至兩面皮微焦香，約三四成熟熄火備用。
薯仔切滾度，將大半用薑起鑊落少少油爆炒至微焦邊。
煮咖喱汁：番茄、洋蔥切細切碎。起鑊，爆香洋蔥，落番茄、加水煮至溶爛，落兩片香葉，再加冇爆炒既薯仔同咖喱粉煮成濃汁。
此時加入全部薯仔，煮至開始腍身。再加入雞翼炆煮約十五分鐘，加入一湯匙潮州辣油更添風味，再試味調味即成。
食時加入新鮮青瓜番茄碎，可以平衡一下辣味。
呢個蛋湯又係童年回憶。做法簡單到無可再簡單，但係個湯蛋香濃郁，非常好味。
以前阿媽要返工，我地仲細，放工之後阿媽仍然要煮飯炒菜，要做出快、靚、正既菜式，真係唔容易。呢款蛋湯就係佢拿手好戲之一。
簡簡單單，回味無窮。
材料：雞蛋三隻，薑粒多量。
做法：打勻三隻蛋，落較多鹽調味並作為湯底既味道，加入薑粒，再打勻。燒熱鑊，落少少油，倒入蛋液煎炒至兩面金黃，用鑊鏟將蛋切碎。
此時倒入熱水，熱水入鑊混合蛋片即煮滾，加蓋滾至湯液成淡黃色。
調味，趁熱飲。
買左棵紹菜專登擺到佢乾水，用黎煮鹹肉，呢兜野好好食呀！
材料：
1 乾水紹菜一棵。
2 豬腩肉一塊。
3 豆卜四兩。
4 冬菇四隻，蝦米適量。
做法：
1 紹菜打直一開四破開，再橫切度。
2 豬腩肉洗淨，出水，再落大量鹽用水烚到腍身，撈起切碎。
3 豆卜洗淨，切成長條形備用。
4 冬菇浸軟切絲，蝦米浸軟切粒。
5 燒熱鑊落油落蝦米爆香，再落豆卜條炒香，炒至微焦收乾身兜起。
6 原鑊落油爆香大量薑絲，落紹菜炒勻，倒入適量烚豬肉水，將紹菜煮一陣。
7 依次落冬菇絲、豆卜蝦米、鹹肉，兜勻，落水加蓋煮至各樣材料出味。
8 煮至汁液略收後，試味即成。此菜要有適量汁液浸住，唔駛打獻。
好味！四隻冬菇仔好香！乾水紹菜同炒香豆卜條口感好正！
行街市見D大紅燈籠椒好靚，12元斤，買左四個14元。↓
再買10元鯪魚膠，整碟大紅燈籠高高掛。
紅椒洗淨一個開六，搽少少生粉，釀入薄薄一層魚膠，我覺得薄薄地就好，唔好俾魚肉搶左紅椒既獨特甜味。
先將釀好既紅椒逐少逐少走油，撈起。↓
洗淨鑊，燒熱，將紅椒回鑊(唔駛再落油)，一路炒一路贊水，用蓋蓋上炆一炆。↓
開蓋，贊酒，埋獻(粟粉、蠔油、糖、鹽)，灑上蔥粒，將汁液收至僅僅封住D紅椒，即可上碟。↓
補記：早餐蛋治一份。
嘩，肥哉第一包之：藍莓乾基本包呀！
諗住有六千蚊就快落袋，卒之都買左部麵包機，其實都幾敗家，正式未見官先打八十大板，淨係呢堆野就用左二千幾元。↓
跟住隨機附送麵包譜試整個「基本包」Basic Bread，只係冇落牛油，加左藍莓。
天光整，搞到天黑先有得食，搞左三個幾鐘。
肥哉第一包，算係咁啦，成個人仔頭咁大，今晚唔食飯要食佢，都可以接受。
